TAʼLIM MUASSASALARI PSIXOLOGLARI UChUN SEMINAR-TRENING TAShKIL ETILDI

Taʼlim muassasalarida faoliyat koʻrsatayotgan psixologlarning zoʻravonlik jabrlanuvchisi bilan ishlash hamda xotin-qizlar oʻrtasida oʻz joniga qasd qilish holatlarining oldini olish borasidagi tajribalarini oshirish maqsadida seminar-trening tashkil qilindi.

Amudaryo tumanidagi 82-sonli maktabda boʻlib oʻtgan seminar-treningda Qoraqalpogʻiston Respublikasi Ayollarni reabilitatsiya qilish va moslashtirish markazi psixologi Roza Amanova, Qoraqalpogʻiston Respublikasi Tumanlararo Ayollarni reabilitatsiya qilish markazi va moslashtirish markaz direktori Gavhar Chimbaychiyeva, tuman hokimi oʻrinbosari, Oila va xotin-qizlar boʻlimi boshligʻi Goʻzal Sobirova, tuman Xalq taʼlimi boʻlimi metodist psixologi Tatʼyana Pirlepesova va maktab psixologlari ishtirok etishdi.

Yigʻilishni tuman hokimi oʻrinbosari, Oila va xotin-qizlar boʻlimi boshligʻi Goʻzal Soburova ochdi va olib bordi.

Seminar-trening davomida Prezident Shavkat Mirziyoyevning shu yil 1-martdagi “Oila va xotin-qizlar bilan ishlash, mahalla va nuroniylarni qoʻllab-quvvatlash tizimini takomillashtirish chora-tadbirlari toʻgʻrisida”gi Farmoni va “Oila va xotin-qizlar davlat qoʻmitasi faoliyatini tashkil etish toʻgʻrisida”gi, 2021-yil 19-maydagi “Zoʻrlik ishlatishdan jabr koʻrgan xotin-qizlarni reablitatsiya qilishga oid qoʻshimcha chora-tadbirlar toʻgʻrisida”gi Qarorlari mazmun-mohiyati xususida keng tushunchalar berildi. Undan tashqari, xotin-qizlarga nisbatan zoʻravonlik holatlari, uning oqibatlarini yumshatish va koʻriladigan choralar, amaliyot, muammolar va keyingi rejalar haqida ham soʻz bordi.

Qoraqalpogʻiston Respublikasi Ayollarni reabilitatsiya qilish va moslashtirish markazi psixologi Roza Amanova esa zoʻravonlikning turlari, jamiyatimizda zoʻravonlikka uchrayotgan ayollarga yordam berish tartibi haqida psixologlarga batafsil tushunchalar berib oʻtdi.

Zoʻravonlikka uchragan xotin-qizlarni himoya qilish, ularni sogʻlom hayotga qaytarish, zarur boʻlsa ish topishga yordam berish, tibbiy tomondan koʻmaklashish uchun yurtimizning barcha hududida Ayollarni reabilitatsiya qilish va moslashtirish markazi faoliyat yuritayotganligini aytib, zoʻravonlikka duch kelgan ayollar bilan shu markazda jipslashish kerakligini aytdi. Barcha psixologlar ayollarga psixologik yozdam berishlari zarurligini ham tushuntirdi.

Trening davomida ishtirokchilar zoʻravonlikning jismoniy, psixologik, jinsiy, iqtisodiy turlari boʻyicha 4 guruhga boʻlinishdi va topshiriqqa koʻra, guruhdagi har bir ishtirokchi tomonidan zoʻravonlikning bitta turi boʻyicha maʼlumot yozildi. Maʼlumotlar yozib boʻlingach, har bir guruhdan bir ishtirokchi chiqib, yozilgan zoʻravonlik turi boʻyicha maʼlumotlarni oʻqib eshittirdi. Malakali psixolog tomonidan fikrlar umumlashtirilib, ularga psixologik konsultatsiyalar berildi.

Seminar-treningda avvalo har bir psixolog muammoli oilalarni oʻrganishi, tazyiq va zoʻravonlikka moyilligi boʻlgan shaxslarni aniqlashi va ularni reabilitatsiya markazi psixologi yordamida suhbatlar oʻtkazishi, oilasida, boshqa joyda zoʻravonlikka uchragan yoki oʻz joniga qasd qilishga moyilligi boʻlgan xotin-qizlarga yaqindan yordam koʻrsatishi, zoʻravonlik masalalari boʻyicha aholining xabardorligini oshirish lozimligini taʼkidlandi.

Trening davomida ishtirokchilar oʻzlarini qiziqtirgan, tushunmagan savollariga mutaxassisslardan javob oldilar. Shuningdek, xotin-qizlar va yoshlar oʻrtasida oʻz joniga qasd qilish, ularning tazyiq va zoʻravonlikka uchrashining oldini olish, bunday holatlarni barvaqt aniqlash maqsadida “Zoʻravonliksiz oila – sogʻlom oila”, ”Biz zoʻravonlikka qarshimiz” mavzularida huquqiy madaniyatini yuksaltirishga qaratilgan targʻibot tadbirlarini keng miqyosda, muntazam ravishda oʻtkazib borish boʻyicha topshiriqlar berildi.

Mavluda Toʻrayeva, 27-sonli maktab psixologi.