AMUDARYo TUMANIDA INTENSIV BOGʻLAR YaRATILIB, ERTAGI SABZAVOT EKISh NIHOYaSIGA YeTKAZILMOQDA

Bogʻdorchilik va issiqhona xoʻjaligini rivojlantirish maqsadida Amudaryo tumanida maxsus loyiha ofisi tashkil etilgan boʻlib, ayni paytda tumanda meva-sabzavotchilikni rivojlantirish, bogʻ, ekinlar hosildorligini oshirish va sifatini yaxshilash maqsadida Amudaryo tuman bogʻdorchilik va issiqxona agentligi tomonidan bugungi kunga qadar 3 mingdan ortiq mevali daraxt koʻchatlari olib kelindi. Bundan tashqari, intensiv sabzavotchilikni rivojlantirish maqsadida 50 ming donadan ortiq sabzavot va poliz koʻchatlarini olib kelish  rejalashtirilgan.

Shuningdek, Amudaryo tumani boʻyicha 915 gektar ochiq maydonlarga har xil turdagi sabzavot ekinlari ekish rejalashtirilgan boʻlib, bugungi kunda mazkur maydonlarda sabzavot urugʻlarini ekish ishlari qizgʻin olib borilmoqda.

Sifatli kartoshka yetishtirish va ichki bozorni mahalliy kartoshka mahsulotlari bilan toʻldirish maqsadida tumandagi “Amudaryotex” xorijiy korxonasi klasteri tomonidan 310 gektar maydonga serhosil navli kartoshka urugʻlarini joylashtirish uchun urugʻni oʻz vaqtida yetkazib berish taʼminlandi.

Joriy dehqonchilik yilida 130 gektar maydonda soya oʻsimligini yetishtirish koʻzda tutilgan. Shu maqsadda tumandagi qishloq xoʻjalik korxonalari tomonidan soya ekiladigan yer maydonlarida barcha agrotexnik tadbirlar muvaffaqiyatli amalga oshirilib, ayni kunlarda ekish jarayoni yakuniga yetkazilmoqda.

Tumanimizdagi bogʻdorchilik tarmogʻiga ega qishloq xoʻjalik korxonalari tomonidan intensiv bogʻlar barpo etishga ham alohida eʼtibor qaratilmoqda. Yangidan intensiv bogʻlar bunyod etish ishlari tuman hokimi Sultonboy Yoʻldashevning shaxsiy ishtiroki va tashabbusi bilan amalga oshirilayotgani tufayli erta bahordanoq 200 gektar maydonlarga turli mevali daraxt koʻchatlari, 30 gektar maydonga uzum toklari sifatli qilib ekildi.

Ayni kunlarda tumanimiz qishloq xoʻjaligi korxonalari tomonidan ertagi sabzavot ekinlarini ekish ishlari ham sifatli yakuniga yetkazilmoqda. Xususan, Amudaryo tumani hokimi Sultonboy Yoʻldashev rahbarligidagi 1-sektor hududidagi Choykoʻl, Toʻlqin, Qipchoq, Nazarxon ovullari hamda Bekboy Toʻqay xoʻjaliklari hududidagi fermer xoʻjaliklari tasarrufidagi 56 gektar maydonga kartoshka, 80 gektar yerga sabzi, 35 gektar piyoz, 38 gektar maydonga soya oʻsimligi ekish rejalashtirilgan boʻlib, mazkur ekinlarni ekish ishlari sifatli yakunlandi. Ayni paytda sektor hududidagi sabzavot ekilgan maydonlarda bir tekis unib chiqqan nihollarni dastlabki parvarishlash, agrotexnik tadbirlarni amalga oshirish ishlari boshlab yuborildi.

Amudaryo tuman prokurori rahbarligidagi 2-sektor hududiga qarashli Mangʻit, Amir Temur nomli, Yoʻldosh Oʻrozboyev nomli, Qilichboy, Turkmaniston muqobil mashina-traktor parklari xizmat koʻrsatuvchi qishloq xoʻjalik korxonalari tomonidan ham ertagi sabzavot ekish rejasi 100 foiz bajarildi. Mazkur hududlardagi 88 ta fermer xoʻjaliklarida belgilangan rejaga koʻra, 101 gektar yerga kartoshka, 68 gektar sabzi, 46 gektar maydonga piyoz va 29 gektar yerga soya ekilib, bu boradagi reja ortigʻi bilan ado etildi.

3-sektor hududidagi Boʻz yop, Xitoy, Bobur nomli va Oq oltin ovullari hamda Oʻzbekiston mahallasida jami 119 gektar kartoshka, 109 gektar sabzi, 30 gektar piyoz va 46 gektar yerga soya ekinlari sifatli qilib ekildi.

4-sektor hududidagi Qangli va Toshyop ovullari hamda Namuna mahallasi hududlarida ham joriy yilda roʻy berayotgan suv tanqisligiga qaramasdan 16-aprel holatiga 33,5 gektar yerga kartoshka ekilib, bu boradagi reja 98,5 foiz, 21,5 gektar yerga sabzi urugʻi ekilib, reja 89,6 foizni tashkil etmoqda va mazkur ekinlarni ekish ishlari jadal surʼatlarda olib borilmoqda.

Shuningdek, sektor hududidagi fermer xoʻjaliklarida 27 gektar yerga piyoz, 17 gektar yerga soya oʻsimligi ekilib, bu boradagi reja 100 foizga ado etildi.

Joriy yilning 16-aprel holatiga Amudaryo tumani boʻyicha jami 308 gektar yerga kartoshka, 279 gektar sabzi, 138 gektar piyoz va 130 gektar soya oʻsimligi ekilib, gektarlarda bir tekis unib chiqayotgan sabzavot nihollariga dastlabki agrotexnik ishlov berish ishlari boshlab yuborildi.

Robiya YOʻLDOShEVA.