EKINLARNI BIOLOGIK HIMOYa QILISh SIFATINI YaXShILASh MAVZUSIDA SEMINAR OʻTKAZILDI

Mamlakatimiz aholisining koʻpchilik qismi qishloq joylarda istiqomat qilganligi bois ularning turmush farovonligi qishloq xoʻjaligi tarmogʻi bilan chambarchas bogʻliq. Shuning uchun ham keyingi yillarda agrar sohaga eʼtibor tobora kuchaymoqda, natijada qishloq xoʻjaligi mahsulotlari yetishtirish hajmi ortib bormoqda. Bu mamlakatimiz aholisi ehtiyojini oʻzimizda yetishtirilgan mahsulotlar bilan taʼminlanishining yaxshilashini va eksport hajmining oshishida yaqqol namoyon boʻlayotir. Endilikda mahsulot sifati va raqobatbardoshligini yaxshilash, ekologik toza mahsulot yetishtirishni oshirish, agrar sektorda esport hajmini yana ham koʻpaytirish dolzarb vazifa boʻlib qolmoqda.

Global iqlim oʻzgarishi oqibatida ekinlar zararkunandalarining koʻpayishiga qulay shart-sharoitlar yaratilib, yangi turdagi kasalliklar paydo boʻlishiga olib kelmoqda. Bu oʻz navbatida ularga qarshi kurashning biologik usullarini yanada takomillashtirishni taqozo etmoqda.

16-aprel kuni Qoraqalpogʻiston Respublikasi oʻsimliklar karantini va himoyasi agentligi Amudaryo tuman boʻlimida oʻtkazilgan seminar ham shu maqsadga qaratildi.

Tadbirda Oʻzbekiston Respublikasi Biosifat markazi direktori Muxtor Hibbatov, Oʻsimliklar karantini va himoyasi ilmiy tadqiqot instituti ilmiy laboratoriyasi mudiri Asan Mambatnazarov, ushbu laboratoriya ilmiy xodimi Abdulaziz Yoʻldoshev, Qoraqalpogʻiston Respublikasi Oʻsimliklar karantini va himoyasi agentligi ichki karantin boʻlimi boshligʻi Radmir Seytmusayevlar, shuningdek, agentlik tuman boʻlimi xodimlari, tumanimizdagi mavjud 16 ta biolaboratoriyalar xodimlari ishtirok etdilar.

Seminarda tumanimizda yetishtirilayotgan qishloq xoʻjalik ekinlarini kasallik va zararkunandalardan asrash va ularga qarshi kurashishni samarali tashkil etish xususida, oʻsimliklarni, ekinlarni biomahsulotlar bilan zararkunandalar va kasalliklardan himoya qilishning afzalligi xususida maʼruzalar qilindi. Har bir gektar ekin maydoniga biolaboratoriyalarda tayyorlangan 1000 donadan uch marotaba 3000 dona oltinkoʻz bilan ishlov berish, har 2 gektar yerga bir feramon tutkichlarni tayinlashni tashkillashtirish, bu tadbir hosildorlik salmogʻi oshishiga ulkan taʼsir oʻtkazishi keng tushuntirildi.

Joriy yilda tumanimizda 2022-yil hosili uchun ekilgan 6000 gektar gʻalla maydonlarini, shuningdek, 13900 gektar paxta maydonlarini va boshqada qishloq xoʻjalik ekinlarini zarakunanda hashoratlar va turli kasalliklardan biologik himoya qilish yuzasidan chora-tadbirlar ishlab chiqilib, amalga oshirilmoqda.

Seminarda taʼkidlanganidek, mamlakatimiz Prezidentining shu yil fevralda qabul qilgan “Respublikada oʻsimliklar karantini va himoyasini tizimini tubdan takomillashtirish chora-tadbirlari toʻgʻrisida”gi Farmoni qishloq xoʻjaligi mahsulotlari yetishtirishning muhim asoslaridan biri – oʻsimliklarni biologik himoya qilish sifatini yana ham oshirishga xizmat qiladi.

Farmonga muvofiq biolaboratoriyalarda ishchi-xodimlar soni oshirildi va xonadonbay ishlash tizimi ham yoʻlga qoʻyildi. Endilikda dehqon xoʻjaliklari va tomorqa yerlarga ham biologik ishlov beriladi va aholi ekologik toza mahsulotlar yetishtirishi mumkin boʻladi. Shuningdek, aholiga biomahsulotlar tayyorlash oʻrgatilib, ishsiz aholi foydali mehnat bilan shugʻullanib, daromad topishiga erishilayapti.

Seminarda ishtirokchilarni qiziqtirgan savollarga batafsil javoblar berildi.

O.RAJABOVA.