11-SONLI MAKTABDA “FARZANDIMGA KITOB SOVGʻA QILAMAN” AKTsIYaSI OʻTKAZILDI

Inson hayotda doimo maʼnaviy ozuqa olishga ehtiyoj sezib yashaydi, kitoblarga intilishi, umrining qanchadan qancha aziz lahzalarini mutolaaga bagʻishlashi ham bejiz emas.

Jamiyat hayotining ajralmas qismi boʻlgan kutubxonalar esa azal-azaldan maʼnaviyat va maʼrifat oʻchogʻi boʻlib kelgan, kitoblardan ommaviy foydalanishni taʼminlovchi madaniy muassasa hisoblanadi. Kitobxonlarga xizmat koʻrsatish – kutubxonalarning asosiy faoliyatining mezonidir.

Keyingi yillarda mamlakatimizda kitob oʻqish keng targʻib etilmoqda. Muhtaram Prezidentimizning yoshlar maʼnaviyatini yuksaltirish borasida belgilab bergan besh tashabbusining biri ham ular orasida kitobxonlikni keng targʻib etishdir. Boisi barcha bilimlar kitoblarda mujassam. Kutubxonaga shuning uchun ham nurxona, deb taʼrif beriladi.

Yaqinda Amudaryo tumani Qipchoq shaharchasi hududida joylashgan 11-sonli maktabda maktab direktorining maʼnaviy-maʼrifiy ishlar boʻyicha oʻrinbosari Qunduzoy Xolmurodova, psixolog Dilnoza Shomurodova va kutubxonachi Mehribon Yoʻldosheva, Raʼno Yeshmurodovalar hamkorligida “Farzandlarimiz kelajagiga befarq boʻlmaylik” shiori ostida bir qancha maʼnaviy-maʼrifiy tadbirlar oʻtkazildi. Xususan, oʻquvchilar bilan turli mavzularda suhbatlar, ota-onalar yigʻilishlari oʻsib kelayotgan yosh avlodni barkamol insonlar qilib voyaga yetkazishdek ulkan maqsadga qaratildi.

Aktsiyasi haqiqiy maʼnoda bayram tusini oldi.Tadbirda maktabning barcha oʻqituvchilari, oʻquvchilari, ota-onalar ishtirok etdilar.

Tadbirda maktab kutubxonasida mavjud adabiyotlar namoyish etilib, ota-onalarga farzandlari bilan birga bu kitoblarni oʻqish, oʻqigan asarlari yuzasidan suhbatlashish, orqali bolalarning kitoblardan olgan taassurotlarini kengaytirish tavsiya qilindi.

Shuningdek, koʻchma kitob doʻkoni savdosi yoʻlga qoʻyilib, 500 turdan ziyod bolalar adabiyoti namunalari koʻrgazmaga qoʻyildi.

Tadbirda maktab direktorining maʼnaviy-maʼrifiy ishlar boʻyicha oʻrinbosari Qunduzoy Xolmurodova ota-onalarga farzand tarbiyasida kitob mutolaasining ahamiyati haqida gapirib, ularni farzandlariga kitob sovgʻa qilishga daʼvat etdi. Ota-onalar farzandlari bilan birga badiiy kitoblar tanlab, xarid qildilar, oʻquv qurollari, darsdan tashqari oʻqish uchun tavsiya qilingan, oʻquv fanlarini chuqur oʻrganishga doir adabiyotlarni oldilar.

“Farzandimga kitob sovgʻa qilaman” aktsiyasiga tashrif buyurgan ota-onalar farzandlarining taqdiriga befarq emasligini, aynan shunday tadbirlar bolalarni kitob oʻqishga ragʻbatlantirishini taʼkidladilar.

Shuni ham aytish oʻrinliki, mazkur maktab kutubxonasi barcha oʻquvchilarni darsliklar bilan toʻla taʼminlagan. Darsliklardan tashqari 3113 ta badiiy, 2096 ta bolalar uchun moʻljallangan kitoblar mavjud, davriy nashrlar taxlamlari ham bor.

Maktabning jami oʻquvchilaridan 838 nafari kutubxonaga aʼzo va muntazam kitob mutolaasi bilan shugʻullanishadi. Kutubxona oʻquv zalida faol kitobxonlar ishtirokida badiiy adabiyotlar haqida suhbatlar, oʻzbek adabiyotining taniqli namoyandalari hayoti va ijodiga bagʻishlangan adabiy kechalar oʻtkazib kelinadi. Buningdek chora-tadbirlarning barchasi oʻquvchilar orasida kitobxonlikni targʻib etgani bilan ahamiyatlidir. Chunki kitob insonning dunyoqarashini kengaytiradi, aqlan boyitadi.

“Farzandingiz taqdiriga befarq boʻlmang!” shiori ostida oʻtkazilgan haftalikning bir tadbiri – “Farzandimga kitob sovgʻa qilaman” aktsiyasi ham shu maqsadga xizmat qilishi soʻzsiz.

O.RAJABOVA.