11-СОНЛИ МАКТАБДА “ФАРЗАНДИМГА КИТОБ СОВҒА ҚИЛАМАН” АКЦИЯСИ ЎТКАЗИЛДИ
Инсон ҳаётда доимо маънавий озуқа олишга эҳтиёж сезиб яшайди, китобларга интилиши, умрининг қанчадан қанча азиз лаҳзаларини мутолаага бағишлаши ҳам бежиз эмас.
Жамият ҳаётининг ажралмас қисми бўлган кутубхоналар эса азал-азалдан маънавият ва маърифат ўчоғи бўлиб келган, китоблардан оммавий фойдаланишни таъминловчи маданий муассаса ҳисобланади. Китобхонларга хизмат кўрсатиш – кутубхоналарнинг асосий фаолиятининг мезонидир.
Кейинги йилларда мамлакатимизда китоб ўқиш кенг тарғиб этилмоқда. Муҳтарам Президентимизнинг ёшлар маънавиятини юксалтириш борасида белгилаб берган беш ташаббусининг бири ҳам улар орасида китобхонликни кенг тарғиб этишдир. Боиси барча билимлар китобларда мужассам. Кутубхонага шунинг учун ҳам нурхона, деб таъриф берилади.
Яқинда Амударё тумани Қипчоқ шаҳарчаси ҳудудида жойлашган 11-сонли мактабда мактаб директорининг маънавий-маърифий ишлар бўйича ўринбосари Қундузой Холмуродова, психолог Дилноза Шомуродова ва кутубхоначи Меҳрибон Йўлдошева, Раъно Ешмуродовалар ҳамкорлигида “Фарзандларимиз келажагига бефарқ бўлмайлик” шиори остида бир қанча маънавий-маърифий тадбирлар ўтказилди. Хусусан, ўқувчилар билан турли мавзуларда суҳбатлар, ота-оналар йиғилишлари ўсиб келаётган ёш авлодни баркамол инсонлар қилиб вояга етказишдек улкан мақсадга қаратилди.
Акцияси ҳақиқий маънода байрам тусини олди.Тадбирда мактабнинг барча ўқитувчилари, ўқувчилари, ота-оналар иштирок этдилар.
Тадбирда мактаб кутубхонасида мавжуд адабиётлар намойиш этилиб, ота-оналарга фарзандлари билан бирга бу китобларни ўқиш, ўқиган асарлари юзасидан суҳбатлашиш, орқали болаларнинг китоблардан олган таассуротларини кенгайтириш тавсия қилинди.
Шунингдек, кўчма китоб дўкони савдоси йўлга қўйилиб, 500 турдан зиёд болалар адабиёти намуналари кўргазмага қўйилди.
Тадбирда мактаб директорининг маънавий-маърифий ишлар бўйича ўринбосари Қундузой Холмуродова ота-оналарга фарзанд тарбиясида китоб мутолаасининг аҳамияти ҳақида гапириб, уларни фарзандларига китоб совға қилишга даъват этди. Ота-оналар фарзандлари билан бирга бадиий китоблар танлаб, харид қилдилар, ўқув қуроллари, дарсдан ташқари ўқиш учун тавсия қилинган, ўқув фанларини чуқур ўрганишга доир адабиётларни олдилар.
“Фарзандимга китоб совға қиламан” акциясига ташриф буюрган ота-оналар фарзандларининг тақдирига бефарқ эмаслигини, айнан шундай тадбирлар болаларни китоб ўқишга рағбатлантиришини таъкидладилар.
Шуни ҳам айтиш ўринлики, мазкур мактаб кутубхонаси барча ўқувчиларни дарсликлар билан тўла таъминлаган. Дарсликлардан ташқари 3113 та бадиий, 2096 та болалар учун мўлжалланган китоблар мавжуд, даврий нашрлар тахламлари ҳам бор.
Мактабнинг жами ўқувчиларидан 838 нафари кутубхонага аъзо ва мунтазам китоб мутолааси билан шуғулланишади. Кутубхона ўқув залида фаол китобхонлар иштирокида бадиий адабиётлар ҳақида суҳбатлар, ўзбек адабиётининг таниқли намояндалари ҳаёти ва ижодига бағишланган адабий кечалар ўтказиб келинади. Бунингдек чора-тадбирларнинг барчаси ўқувчилар орасида китобхонликни тарғиб этгани билан аҳамиятлидир. Чунки китоб инсоннинг дунёқарашини кенгайтиради, ақлан бойитади.
“Фарзандингиз тақдирига бефарқ бўлманг!” шиори остида ўтказилган ҳафталикнинг бир тадбири – “Фарзандимга китоб совға қиламан” акцияси ҳам шу мақсадга хизмат қилиши сўзсиз.
О.РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
