Xalq deputatlari Amudaryo tuman Kengashining 48-sessiyasi toʻgʻrisida axborot
2022-yil 13-aprel kuni Xalq deputatlari Amudaryo tuman Kengashining 48-sessiyasi boʻlib oʻtdi.
Sessiya ishida tuman Kengashi deputatlari, sektorlar rahbarlari, hokim oʻrinbosarlari, hokimlik masʼul xodimlari, huquq-tartibot organlari, boʻlimlar, jamoat tashkilotlari rahbarlari hamda ommaviy axborot vositalari vakillari ishtirok etdi.
Sessiya ishini tuman hokimi, Xalq deputatlari tuman Kengashi raisi Sultonboy Yoʻldashev ochdi va olib bordi.
Sessiya kotibligiga 30-“Nazarxan” saylov okrugidan deputat Guljahon Ibragimova saylandi.
Sessiyada dastlab Amudaryo tumanini kompleks ijtimoiy-iqtisodiy rivojlantirish boʻyicha sektorlar hududlarida 2022-yilda amalga oshiriladigan ishlar boʻyicha “Yoʻl xaritalari”ning 1-chorakdagi ijrosi toʻgʻrisida sektorlar rahbarlarining hisobotlari tinglandi.
Tuman hokimi, 1-sektor rahbari Sultonboy Yoʻldashev kun tartibidagi masala yuzasidan axborot berib, 49 ming 907 fuqaro istiqomat qiluvchi 1-sektor hududida joriy yilda 270,5 mlrd. soʻmlik 25 ta investitsiya loyihalar amalga oshirilishi va 2 160 ta yangi ish oʻrinlari yaratilishi rejalashtirilganini taʼkidladi. Bugungi kun holatiga 2,6 mlrd. soʻmlik 3 ta investitsiya loyihalar amalga oshirildi. Buning natijasida 25 ta yangi ish oʻrinlari yaratildi. Bu boradagi ishlar izchillik bilan davom ettirilmoqda.
Tuman prokurori, 2-sektor rahbari Aziz Roʻzmetovning hisobotida keltirilishicha, joriy yilning birinchi choragida sektor hududidagi aholi turmush darajasini yanada yaxshilash boʻyicha qator ishlar amalga oshirilgan. Jumladan, sektor hududida vaqtincha ishsiz boʻlgan ayollar va yoshlarning 134 nafari doimiy ishga joylashtirilgan. Tadbirkorlik faoliyatini boshlash istagida boʻlgan 7 nafar ishsiz fuqaroga davlat roʻyxatidan oʻtish uchun subsidiyalar ajratilib, ishlash istagini bildirgan vaqtincha ishsiz 59 nafar fuqarolar jamoat ishlariga jalb qilingan. 13 nafar ishsiz fuqarolar esa mehnat bozorida talab yuqori boʻlgan kasbga oʻqitish, xorijdan qaytgan 92 nafar mehnat migrantlarining bandiligi taʼminlash choralari koʻrilgan.
Ushbu masala yuzasidan 3-sektor rahbari, tuman Ichki ishlar boʻlimi boshligʻi Ulugʻbek Xudoyberganovning xisobotida taʼkidlanganidek, sektor hududida hokim yordamchilari va yoshlar yetakchilari bilan hamkorlikda ish olib borilib, “Temir daftar”, “Yoshlar daftari” va “Ayollar daftari”ga kiritilgan fuqarolarga har tamonlama yordamlar koʻrsatilgan. Shuningdek, ijtimoiy himoyaga muhtoj 30 nafar fuqaro reablitatsiya texnik vositalari va nogironlik aravachalari bilan taʼminlangan.
4-sektor rahbari, tuman Davlat soliq inspektsiyasi boshligʻi Aydos Seyitovning kun tartibidagi masala bzasidan hisobotida joriy yilning dastlabki uch oyi davomida sektor hududidagi Namuna va Chordara mahallalariga yangi transformatorlar oʻrnatilgani, Beruniy va Boʻston mahallalari hududlarida yangi maktabgacha taʼlim tashkilotlari barpo etilgani va aholi uchun boshqa koʻplab qulayliklar yaratilgani qayd etildi.
Sessiya ishida sektorlar va hududdagi tashkilotlar rahbarlarining aholi murojaatlari va muammolari bilan ishlash holati yuzasidan tuman Xalq qabulxonasi boʻlimi mudiri Erkin Rajapovning axboroti tinglandi.
Axborotda mahallalardagi hokim yordamchilari faoliyati hamda “Obod qishloq” va “Obod mahalla” dasturlari doirasida amalga oshirilayotgan ishlar, shuningdek, aholining hal qilingan va eʼtibordan chetda qoldirilgan murojaatlari haqida batafsil maʼlumotlar berildi.
Shundan soʻng, tuman Adliya boʻlimining 2022-yil 1-choragi yakuni boʻyicha ish faoliyati yuzasidan boʻlim boshligʻi Moʻʼminjon Matyusupovning axboroti tinglandi. Qayd etilganidek boʻlimga 2022-yilning 1-choragi davomida jami 62 ta ariza va shikoyat kelib tushgan boʻlib, ushbu murojaatlarning 21 tasi ariza, 41 tasi shikoyat shaklida boʻlgan. Qonunbuzilish holatlarini oʻrganish natijasida idora va tashkilotlarga jami 20 ta taqdimnomalar kiritilib, 10 nafar shaxs intizomiy javobgarlikka tortilgan.
Sessiyada 2022-yilning dastlabki uch oyi davomida tumanda sodir etilgan jinoyatchilik va huquqbuzarliklarning oldini olish boʻyicha amalga oshirilgan ishlar yuzasidan tuman Ichki ishlar boʻlimi boshligʻi oʻrinbosari – jamoat xavfsizligi xizmati boshligʻi Muxtor Raxmatullayevning hisoboti tinglandi.
Unga koʻra, kriminogen vaziyat boʻyicha “Qizil”, “Sariq” va “Yashil” toifadagi mahallalarda profilaktik ishlar amalga oshirilib, huquqbuzarlik holatlari oʻtgan yilgiga qaraganda sezilarli darajada kamayishiga erishilgan. Hisobotda bu borada kelgusida amalga oshiriladigan ishlar xususida ham batafsil maʼlumotlar berildi.
Sessiya kun tartibida ayol-qizlarnig ishbilarmonlik va tadbirkorlik faoliyatini qoʻllab-quvvatlash, “Ayollar daftari”, “Yoshlar daftari” va “Temir daftar”ga kiritilgan fuqarolarni qoʻllab-quvvatlash boʻyicha amalga oshirilgan ishlar boʻyicha tuman hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari Rashid Salayevning hisoboti tinglandi.
Kun tartibidagi navbatdagi masala yuzasidan Amudaryo tumani Xalq taʼlimi boʻlimi mudiri Akmal Ismailovning hisoboti tinglandi. Axborotda Oʻzbekiston Respublikasi Prezidentining 2022-yil 5-apreldagi “Xalq taʼlimi sohasida amalga oshirilayotgan islohotlar natijadorligi hamda “Milliy dastur” loyihasi taqdimotiga bagʻishlangan videoselektor yigʻilishida beglilab berilgan vazifa va topshiriqlar ijrosini taʼminlash boʻyicha kelgusida amalga oshiriladigan ishlar haqida batafsil maʼlumotlar berildi. Tumandagi barcha maktablar hamda Xalq taʼlimi boʻlimining bu boradagi rejalarini oʻz ichiga olgan “Yoʻl xaritasi” deputatlar tomonidan tasdiqlandi.
Sessiya kun tartibidagi Amudaryo tumani Xalq taʼlimi boʻlimiga qarashli maktablarda boʻshab qolgan direktorlik lavozimlariga oʻtkazilgan tanlov yakunlari boʻyicha nomzodlarga kelishim toʻgʻrisidagi masala ham koʻrib chiqildi.
4-sonli umumiy oʻrta taʼlim maktabi direktori lavozimiga
Sherzod Bobojonov, 15-sonli maktab direktori lavozimiga Jasorat Artiqov, 61-sonli maktab direktori lavozimiga Hakimjan Davletyarov, 77-sonli maktab direktorii lavozimiga Shavkat Toʻrayevlar nomzod sifatida koʻrsatilgan.
Nomzodlarning kelgusi 3-yilga moʻljallangan dasturlari tinglanib, ochiq ovoz berish jarayoni orqali Xalq deputatlari Amudaryo tuman Kengashining nomzodlarga kelishim berish toʻgʻrisidagi qarori qabul qilindi.
Shuningdek, sessiya ishida Kengash vakolatiga kiruvchi boshqa masalalar ham muhoka qilinib, ular yuzasidan ham tegishli qarorlar qabul qilindi. Shuning bilan sessiya oʻz ishini yakunladi.
Tuman hokimligining Axborot xizmati
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
