“Obod qishloq” dasturiga kiritilgan Ayoqchi mahallasida keng koʻlamli qurilish va obodonlashtirish ishlari boshlandi

Soʻngi yillarda yurtimiz boʻylab “Obod qishloq” va “Obod mahalla” dasturiga kiritilgan hududlarda yoʻl-transport infratuzilmasini yaxshilash, ijtimoiy soha obektlarini qurish, obodonlashtirish va koʻkalamzorlashtirish, umuman, aholining yashash sharoitini yaxshilashga qaratilgan keng koʻlamli chora-tadbirlar amalga oshirilmoqda.

Oʻzbekiston Respublikasi Prezidentining 2022-2026-yillarda “Obod qishloq” va “Obod mahalla” dasturlarini amalga oshirish chora-tadbirlari toʻgʻrisida”gi qaroriga asosan, Amudaryo tumanining Toʻlqin ovuli va Ayoqchi mahallasi ham “Obod qishloq” dasturiga kiritildi.

6-aprel kuni Ayoqchi mahallasi hududida dastur doirasida keng koʻlamli qurilish va obodonlashtirish ishlarining boshlanishi munosabati bilan tabdir boʻlib oʻtdi. Unda tuman hokimi Sultonboy Yoʻldashev, sektorlar rahbarlari, hokim oʻrinbosarlari, tegishli muassasa, korxona va tashkilotlar rahbarlari, fuqarolar yigʻini masʼullari hamda mahalla faollari ishtirok etdi.

Dastlab, tuman hokimi Soʻltonboy Yoʻldashev yigʻilganlarga “Obod qishloq” dasturini tez muddatlarda va sifatli tarzda amalga oshirish borasida tavsiyalarini berdi. Shuningdek, dastur doirasida Ayoqchi mahallasi hududi uchun ajratilgan 10,4 mlrd. soʻm mablagʻning manzilli va maqsadli ishlatilishi boʻyicha mutasaddilarga topshiriqlar berdi.

Shundan soʻng tuman hokimi oʻrinbosari Nodirbek Komolov yigʻilganlarga Ayoqchi mahallasida dastur doirasida amalga oshiriladigan ishlar yuzasidan keng turda maʼlumotlar berdi. Taqdimotda keltirilishicha, Ayoqchi mahallasi hududidagi 69-sonli umumtaʼlim maktab binosi mukammal rekonstuktsiya qilinib, taʼmirlash ishlariga 2 mlrd 300 mln. soʻm miqdorda mablagʻ sarflanadi.

Shuningdek, Ayoqchi mahalla fuqarolar yigʻini binosini taʼmirlash ishlariga 360 mln. soʻm miqdorida pul mablagʻlari ajratilib, mukammal taʼmirlash ishlari olib boriladi.

Qolaversa, mahalla hududida piyodalar yoʻlakchasini qurish, yangi turdagi chiqindi konteynerini, tungi yoritgich chiroqlarini oʻrnatish hamda yakka tartibdagi uy-joylarini taʼmirlash, aloqa liniyalarini tortish ishlari ham amalga oshirilib, joriy ishlarga 616 mln. soʻm miqdorda mablagʻlar sarflanadi.

Dastur doirasida aholini toza ichimlik suvi bilan taʼminlash maqsadida 2 mlrd. soʻm mablagʻ evaziga 4 ta suv inshooti barpo etish hamda 1 mlrd 550 mln. soʻm evaziga bozor infratuzilmalarini bunyod qilish koʻzda tutilgan.

Taqdimot nihosiga yetgach tuman hokimi Sultonboy Yoʻldashev har bir yoʻnalish boʻyicha amalga oshiriladigan ishlar yuzasidan soha masʼullarining fikrlarini tingladi hamda dastur ijrosini oʻz vaqtida va sifatli taʼminlash boʻyicha topshiriqlar berdi.

Shundan soʻng tadbir qatnashchilari “Yashil makon” aktsiyasi doirasida Ayoqchi mahalla fuqarolar yigʻini binosi oldida barpo etilayotgan yashil maydonga mevali va manzarali daraxt koʻchatlarini ekishdi.

Ekilgan har bir nihol vaqti kelib ulkan daraxt boʻladi va obod qishloqqa aylanayotgan Ayoqchi mahallasi koʻrkiga koʻrk va chiroy bagʻishlaydi.

Tuman hokimligining Axborot xizmati