83-sonli maktabda tuman hokimligi va DXX chegara qoʻshinlariga qarashli harbiy qism hamkorligida tadbirlar oʻtkazildi

Mamlakatimizda Yangi Oʻzbekiston kelajagi boʻlgan yoshlar bilan ishlash masalasi davlat siyosatining ustuvor yoʻnalishlaridan biri hisoblanadi. Ayniqsa, soʻnggi yillarda ularning ehtiyojlari va manfaatlari yoʻlida amalga oshirilayotgan ishlar koʻlami kengayib, eʼtibor yanada kuchaydi. Bu borada Prezidentimizning «Mahallalarda yoshlar bilan ishlash tizimini tubdan takomillashtirish chora-tadbirlari toʻgʻrisidagi» Qarori dolzarbligi bilan muhim ahamiyat kasb etmoqda.

Mazkur Qarorda koʻrsatilgan vazifalar ijrosini taʼminlash, taʼlim muassasalaridagi maʼnaviy-maʼrifiy va tarbiyaviy ishlar samaradorligini yanada oshirish maqsadida joylardagi kabi tumanimizda ham tegishli tashkilotlar hamkorligida turli tadbirlar oʻtkazilmoqda. Barcha hududlarda oʻtkazilayotgan bunday tadbirlar natijasida yoshlarning ijtimoiy jarayonlardagi faolligi yanada ortmoqda.

Shu yil 1-aprel kuni Amudaryo tumanidagi 83-sonli maktabda tuman hokimligi va Davlat xavfsizlik xizmati chegara qoʻshinlariga qarashli harbiy qism hamkorligida rassomchilik va diktantlar tanlovlari, sport musobaqalari tashkil etildi. Tadbirlarda Qilichboy ovuli va Ayoqchi mahallasi  hududidagi maktablar oʻquvchilari ishtirok etib, oʻzaro kuch sinashdilar.

Oʻquvchilar dastlab, “Vatan yoshlar nigohi ostida” mavzusida oʻtkazilgan rasmlar tanlovida ishtirok etib, tasavvuridagi Vatan manzaralarini qogʻozlarga koʻchirib, turli ranglarda ifoda etdilar. Oʻzbekistonning goʻzal tabiati va hayvonot olami, soʻlim goʻshalari va obod shaharlari rang-barang boʻyoqlarda aks ettirildi. Biri-biridan chiroyli boʻlgan suratlarga hakamlar tomonidan yuqori baho berildi va gʻoliblar aniqlab olindi. Rasmlar tanlovda Salomat Tursunboyeva 1-oʻrin, Ilyosbek Normatov 2-oʻrin, Maftuna Hayitboyeva 3-oʻrin gʻolibi deb topildi.

Shundan soʻng, oʻquvchilar “Yoshlar yangi Oʻzbekiston bunyodkori” mavzusidagi diktantlar tanlovida ishtirok etdilar. Yoshlarning savodxonlik darajasini aniqlash hamda ular qalbidagi yurt kelajagiga daxldorlik hissini yanada mustahkamlash maqsadida oʻtkazilgan ushbu tanlovda ham gʻolib oʻquvchilar saralab olindi. Diktantlar tanlovida 1-oʻrinni Sevinch Rustamova, 2-oʻrinni Ozoda Rajabboyeva, 3-oʻrinni Mahliyo Hasanovalar egallashdi.

Tadbirlar sport musobaqalari bilan davom ettirildi. Oʻquvchilar sportning voleybol, shaxmat-shashka, stol tennisi, qoʻl jangi turlari boʻyicha oʻzaro kuch sinashdilar va epchilliklari, chaqqonliklari, abjirliklarini koʻrsatdilar.

Voleybol boʻyicha qizgʻin oʻtgan musobaqalarda 3 ta maktabning oʻquvchilari jamoalari ishtirok etdilar. Oʻyinda mahoratini koʻrsatib, koʻp ochko olishga erishgan 15-sonli maktab oʻquvchilari jamoasi 1-oʻrinni egallashdi. Shuningdek, 69-sonli maktab oʻquvchilari jamoasi 2-oʻrin gʻolibi deb topildi. 3-oʻringa esa 83-sonli maktab oʻquvchilari jamoasi munosib koʻrildi.

Shaxmat-shashka musobaqalarida Asadbek Shomurodov 1-oʻrin, Zafarbek Shuhratov 2-oʻrin, Zuhra Oʻrinboyeva 3-oʻrin gʻolibi boʻldilar. Qoʻl jangi boʻyicha oʻtkazilgan musobaqalarda ham sportchi-yoshlar bir-biridan qolishmaslikka harakat qildilar. Musobaqa yakunida Lobar Jumaboyeva 1-oʻrin, Zulxumor Hayitboyeva 2-oʻrin, Elbek Nurillayev 3-oʻrin gʻoliblari deb eʼlon qilindi.

Tadbir davomida oʻquvchi-yoshlar harbiylarga oʻzlarini qiziqtirgan savollar bilan murojaat qilib, batafsil javoblar ham oldilar. Harbiylik kasbiga boʻlgan qiziqishlarini bayon qilib, kelgusida Vatanga munosib, jamiyatga nafi tegadigan kasb egalari boʻlib yetishish yoʻlidagi orzu-istaklari toʻgʻrisida suhbatlashdilar.

Yoshlar oʻrtasida oʻtkazilgan ushbu keng koʻlamli tadbir barchaga manzur boʻldi.

Otabek Mahmudov, tumandagi DXX chegara qoʻshinlariga qarashli harbiy qism xizmatchisi.