83-сонли мактабда туман ҳокимлиги ва ДХХ чегара қўшинларига қарашли ҳарбий қисм ҳамкорлигида тадбирлар ўтказилди

Мамлакатимизда Янги Ўзбекистон келажаги бўлган ёшлар билан ишлаш масаласи давлат сиёсатининг устувор йўналишларидан бири ҳисобланади. Айниқса, сўнгги йилларда уларнинг эҳтиёжлари ва манфаатлари йўлида амалга оширилаётган ишлар кўлами кенгайиб, эътибор янада кучайди. Бу борада Президентимизнинг «Маҳаллаларда ёшлар билан ишлаш тизимини тубдан такомиллаштириш чора-тадбирлари тўғрисидаги» Қарори долзарблиги билан муҳим аҳамият касб этмоқда.

Мазкур Қарорда кўрсатилган вазифалар ижросини таъминлаш, таълим муассасаларидаги маънавий-маърифий ва тарбиявий ишлар самарадорлигини янада ошириш мақсадида жойлардаги каби туманимизда ҳам тегишли ташкилотлар ҳамкорлигида турли тадбирлар ўтказилмоқда. Барча ҳудудларда ўтказилаётган бундай тадбирлар натижасида ёшларнинг ижтимоий жараёнлардаги фаоллиги янада ортмоқда.

Шу йил 1 апрель куни Амударё туманидаги 83-сонли мактабда туман ҳокимлиги ва Давлат хавфсизлик хизмати чегара қўшинларига қарашли ҳарбий қисм ҳамкорлигида рассомчилик ва диктантлар танловлари, спорт мусобақалари ташкил этилди. Тадбирларда Қиличбой овули ва Аёқчи маҳалласи  ҳудудидаги мактаблар ўқувчилари иштирок этиб, ўзаро куч синашдилар.

Ўқувчилар дастлаб, “Ватан ёшлар нигоҳи остида” мавзусида ўтказилган расмлар танловида иштирок этиб, тасаввуридаги Ватан манзараларини қоғозларга кўчириб, турли рангларда ифода этдилар. Ўзбекистоннинг гўзал табиати ва ҳайвонот олами, сўлим гўшалари ва обод шаҳарлари ранг-баранг бўёқларда акс эттирилди. Бири-биридан чиройли бўлган суратларга ҳакамлар томонидан юқори баҳо берилди ва ғолиблар аниқлаб олинди. Расмлар танловда Саломат Турсунбоева 1-ўрин, Илёсбек Норматов 2-ўрин, Мафтуна Ҳайитбоева 3-ўрин ғолиби деб топилди.

Шундан сўнг, ўқувчилар “Ёшлар янги Ўзбекистон бунёдкори” мавзусидаги диктантлар танловида иштирок этдилар. Ёшларнинг саводхонлик даражасини аниқлаш ҳамда улар қалбидаги юрт келажагига дахлдорлик ҳиссини янада мустаҳкамлаш мақсадида ўтказилган ушбу танловда ҳам ғолиб ўқувчилар саралаб олинди. Диктантлар танловида 1-ўринни Севинч Рустамова, 2-ўринни Озода Ражаббоева, 3-ўринни Маҳлиё Ҳасановалар эгаллашди.

Тадбирлар спорт мусобақалари билан давом эттирилди. Ўқувчилар спортнинг волейбол, шахмат-шашка, стол тенниси, қўл жанги турлари бўйича ўзаро куч синашдилар ва эпчилликлари, чаққонликлари, абжирликларини кўрсатдилар.

Волейбол бўйича қизғин ўтган мусобақаларда 3 та мактабнинг ўқувчилари жамоалари иштирок этдилар. Ўйинда маҳоратини кўрсатиб, кўп очко олишга эришган 15-сонли мактаб ўқувчилари жамоаси 1-ўринни эгаллашди. Шунингдек, 69-сонли мактаб ўқувчилари жамоаси 2-ўрин ғолиби деб топилди. 3-ўринга эса 83-сонли мактаб ўқувчилари жамоаси муносиб кўрилди.

Шахмат-шашка мусобақаларида Асадбек Шомуродов 1-ўрин, Зафарбек Шуҳратов 2-ўрин, Зуҳра Ўринбоева 3-ўрин ғолиби бўлдилар. Қўл жанги бўйича ўтказилган мусобақаларда ҳам спортчи-ёшлар бир-биридан қолишмасликка ҳаракат қилдилар. Мусобақа якунида Лобар Жумабоева 1-ўрин, Зулхумор Ҳайитбоева 2-ўрин, Элбек Нуриллаев 3-ўрин ғолиблари деб эълон қилинди.

Тадбир давомида ўқувчи-ёшлар ҳарбийларга ўзларини қизиқтирган саволлар билан мурожаат қилиб, батафсил жавоблар ҳам олдилар. Ҳарбийлик касбига бўлган қизиқишларини баён қилиб, келгусида Ватанга муносиб, жамиятга нафи тегадиган касб эгалари бўлиб етишиш йўлидаги орзу-истаклари тўғрисида суҳбатлашдилар.

Ёшлар ўртасида ўтказилган ушбу кенг кўламли тадбир барчага манзур бўлди.

Отабек Маҳмудов, тумандаги ДХХ чегара қўшинларига қарашли ҳарбий қисм хизматчиси.