Daryoboʻyi mahallasida “Hokim va yoshlar uchrashuvi” boʻlib oʻtdi

26-mart kuni Amudaryo tumani Daryoboʻyi mahallasi hududidagi 21-sonli Bolalar musiqa va sanʼat maktabining majlislar zalida “Hokim va yoshlar uchrashuvi” boʻlib oʻtdi.

Uchrashuvda tuman hokimi Sultonboy Yoʻldashev, hokim oʻrinbosari Mahmud Shermetov, Oʻzbekiston Respublikasi Prezidentining Amudaryo tumanidagi Xalq qabulxonasi mudiri Erkin Rajabov, hududda yashovchi 28 nafar faol yoshlar hamda tumanimizda faoliyat yuritayotgan mutasaddi tashkilot vakillari ishtirok etishdi.

Uchrashuv davomida tuman hokimi Sultonboy Yoʻldashev tarixan qisqa davrda Oʻzbekiston yoshlari erishgan muvaffaqiyat va yutuqlar zamirida davlatimiz tomonidan koʻrsatilayotgan katta gʻamxoʻrlik va yuksak eʼtibor mujassam ekanligini taʼkidladi.

Qayd etilganidek, bugun mamlakatimizda yoshlarni har jihatdan barkamol qilib tarbiyalash, ularning salomatligini mustahkamlash, qobiliyatlarini roʻyobga chiqarish va bandligini taʼminlashga koʻmaklashish, boʻsh vaqtini mazmunli oʻtkazish, barcha sohalarda olib borilayotgan islohotlar jarayonidagi ishtirokini kengaytirish masalasiga davlat siyosati darajasida eʼtibor qaratilmoqda.

Ayniqsa, yuksak maʼnaviyatli, mustaqil fikrlovchi, qatʼiy pozitsiyasi, keng dunyoqarash va chuqur bilimlarga ega boʻlgan vatanparvar yoshlarni tarbiyalash, ularda turli mafkuraviy tahdidlarga qarshi immunitetni shakllantirish, sportga jalb qilish orqali ular orasida sogʻlom turmush tarzini targʻib qilish borasida hayotga tatbiq etilayotgan islohotlar oʻz samarasini bermoqda.

 Uchrashuvda tuman Xalq qabulxonasi mudiri Erkin Rajabov tomonidan Aholi muammolari bilan ishlash jarayonida yoshlar murojaatlariga alohida eʼtibor qaratilayotganligi taʼkidlab oʻtildi.

 Shuningdek, murojaatlar tahliliga koʻra, yoshlarni asosan bandlik, oʻqishga kirish, oʻqishni koʻchirish, qayta tiklash, yer maydoni ajratish, kredit olish kabi masalalar oʻylantirayotganligi aytib oʻtildi.

Shundan soʻng, yoshlar tuman hokimiga taklif va muammolari bilan murojaat qilishdi.

Yoshlardan, Oybek Qurbonboyev oʻz tadbirkorlik faoliyatini yoʻlga qoʻyishda elektr payvandlash uskunasini, Malika Raximova esa tikuv mashinasini subsidiya asosida olish niyatlari borligini bildirib, amaliy yordam soʻrab murojaat qilishdi.

Murojaatlar shu yerning oʻzida tegishli tashkilot masʼullariga topshiriq sifatida berilib, ijrosi nazoratga olinishi belgilab qoʻyildi.

Ochiq va samimiy ruhda oʻtgan uchrashuvda yoshlarga taalluqli barcha dolzarb masalalar muhokama qilindi. Shu bilan birga yoshlar oʻzlarini qiziqtirgan masalalar, gʻoya va tashabbuslarini tuman hokimiga tugʻridan-toʻgʻri murojaat qilib yetkazishdi.

Uchrashuv Daryo boʻyi mahallasi yoshlari dilida oʻzgacha taassurot qoldirdi.

Tuman hokimligining Axborot xizmati