Дарёбўйи маҳалласида “Ҳоким ва ёшлар учрашуви” бўлиб ўтди

26 март куни Амударё тумани Дарёбўйи маҳалласи ҳудудидаги 21-сонли Болалар мусиқа ва санъат мактабининг мажлислар залида “Ҳоким ва ёшлар учрашуви” бўлиб ўтди.

Учрашувда туман ҳокими Султонбой Йўлдашев, ҳоким ўринбосари Маҳмуд Шерметов, Ўзбекистон Республикаси Президентининг Амударё туманидаги Халқ қабулхонаси мудири Эркин Ражабов, ҳудудда яшовчи 28 нафар фаол ёшлар ҳамда туманимизда фаолият юритаётган мутасадди ташкилот вакиллари иштирок этишди.

Учрашув давомида туман ҳокими Султонбой Йўлдашев тарихан қисқа даврда Ўзбекистон ёшлари эришган муваффақият ва ютуқлар замирида давлатимиз томонидан кўрсатилаётган катта ғамхўрлик ва юксак эътибор мужассам эканлигини таъкидлади.

Қайд этилганидек, бугун мамлакатимизда ёшларни ҳар жиҳатдан баркамол қилиб тарбиялаш, уларнинг саломатлигини мустаҳкамлаш, қобилиятларини рўёбга чиқариш ва бандлигини таъминлашга кўмаклашиш, бўш вақтини мазмунли ўтказиш, барча соҳаларда олиб борилаётган ислоҳотлар жараёнидаги иштирокини кенгайтириш масаласига давлат сиёсати даражасида эътибор қаратилмоқда.

Айниқса, юксак маънавиятли, мустақил фикрловчи, қатъий позицияси, кенг дунёқараш ва чуқур билимларга эга бўлган ватанпарвар ёшларни тарбиялаш, уларда турли мафкуравий таҳдидларга қарши иммунитетни шакллантириш, спортга жалб қилиш орқали улар орасида соғлом турмуш тарзини тарғиб қилиш борасида ҳаётга татбиқ этилаётган ислоҳотлар ўз самарасини бермоқда.

 Учрашувда туман Халқ қабулхонаси мудири Эркин Ражабов томонидан Аҳоли муаммолари билан ишлаш жараёнида ёшлар мурожаатларига алоҳида эътибор қаратилаётганлиги таъкидлаб ўтилди.

 Шунингдек, мурожаатлар таҳлилига кўра, ёшларни асосан бандлик, ўқишга кириш, ўқишни кўчириш, қайта тиклаш, ер майдони ажратиш, кредит олиш каби масалалар ўйлантираётганлиги айтиб ўтилди.

Шундан сўнг, ёшлар туман ҳокимига таклиф ва муаммолари билан мурожаат қилишди.

Ёшлардан, Ойбек Қурбонбоев ўз тадбиркорлик фаолиятини йўлга қўйишда электр пайвандлаш ускунасини, Малика Рахимова эса тикув машинасини субсидия асосида олиш ниятлари борлигини билдириб, амалий ёрдам сўраб мурожаат қилишди.

Мурожаатлар шу ернинг ўзида тегишли ташкилот масъулларига топшириқ сифатида берилиб, ижроси назоратга олиниши белгилаб қўйилди.

Очиқ ва самимий руҳда ўтган учрашувда ёшларга тааллуқли барча долзарб масалалар муҳокама қилинди. Шу билан бирга ёшлар ўзларини қизиқтирган масалалар, ғоя ва ташаббусларини туман ҳокимига туғридан-тўғри мурожаат қилиб етказишди.

Учрашув Дарё бўйи маҳалласи ёшлари дилида ўзгача таассурот қолдирди.

Туман ҳокимлигининг Ахборот хизмати