Deputatlar faoliyatida “Dolzarb 10 kunlik” ni namunali oʻtkazish boʻyicha yigʻilish boʻlib oʻtdi

10-mart kuni tuman hokimligining majlislar zalida deputatlar faoliyatida “Dolzarb 10 kunlik”ni namunali tarzda oʻtkazishga bagʻishlangan yigʻilish boʻlib oʻtdi.

Yigʻilishda Qoraqalpogʻiston Respublikasi Joʻqorgʻi Kengesining Agrar, suv xoʻjaligi va tabiatni muhofaza qilish masalalari qoʻmitasi raisi Duysenbay Utambetov, Oʻzbekiston Liberal Demokratik partiyasi Qoraqalpogʻiston Respublikasi Kengashi raisining birinchi oʻrinbosari, apparat rahbari Sharap Utemisov, tumanimizdan saylangan Joʻqorgʻi Kenges deputatlari, tuman Kengashi deputatlari, partiyalarning tuman Kengashi rahbarlari va ommaviy axborot vositalari vakillari ishtirok etishdi.

Yigʻilishda Qoraqalpogʻiston Respublikasidagi barcha darajadagi deputatlarning faolligini yanada oshirish boʻyicha 9-martdan 19-martgacha “Dolzarb 10 kunlik” eʼlon qilingani aytib oʻtildi.

Yigʻilishda Qoraqalpogʻiston Respublikasi Joʻqorgʻi Kengesining Agrar, suv xoʻjaligi va tabiatni muhofaza qilish masalalari qoʻmitasi raisi Duysenbay Utambetovning “Dolzarb 10 kunlik” loyihasinining ishlab chiqilish sabablari hamda ushbu tadbirni namunali tashkil etish boʻyicha tavsiyalari tinglandi.

“Dolzarb 10 kunlik”ni oʻtkazish boʻyicha tasdiqlangan rejaga asosan har bir deputat oʻz saylov okrugida saylovchilar bilan uchrashuvlar oʻtkazib, «2022-2026-yillarda Yangi Oʻzbekistonni ivojlantirish Strategiyasi”ning mazmun-mohiyati va ahamiyati haqida hamda davlatimiz rahbarining shu yil 23-24-fevral kunlari Qoraqalpogʻistonga qilgan xizmat safari davomida berilgan topshiriqlar ijrosini taʼminlash boʻyicha qilinayotgan ishlar haqida tushuntirish-targʻibot ishlarini olib boradilar.

Qolaversa, Navroʻz umumxalq bayrami oldidan deputatlar oʻz saylov okrugidagi kam taʼminlangan va yordamga muhtoj aholi bilan muloqotda boʻlib, ularning holidan xabar olishi va yordamga muhtoj fuqarolarga ijtimoiy koʻmak koʻrsatishi belgilangan. Deputatlar oʻz saylov okrugida sayyor qabullar, uchrashuvlar va turli koʻngilochar tadbirlar tashkil qilib, aholiga yaxshi kayfiyat ulashish borasida ham faollik koʻrsatishi zarur.

Shu oʻrinda aytish kerakki, pandemiya davrida karantin cheklovlari tufayli deputatlarning xalq bilan yuzma-yuz muloqot jarayonlari biroz susaydi. Galdagi vazifa esa aholi bilan yaqindan muloqotda boʻlib, muammolarini tizimli va samarali tarzda hal qilishdan iboratdir.

Maʼlumot uchun, Amudaryo tumanidan Qoraqalpogʻiston Respublikasi Joʻqorgʻi Kengesiga 6 nafar deputat saylangan boʻlsa, tuman Kengashida 30 nafar deputat faoliyat olib boradi.

Yigʻilish davomida Qoraqalpogʻiston Respublikasi Kengashi raisining birinchi oʻrinbosari, apparat rahbari Sharap Utemisov aholining tomorqadan foydalanish samaradorligini oshirish, yerdan unumli foydalanish, “Yashil yillik” aktsiyasi doirasida daraxt koʻchatlarini ekish borasida ham deputatlar boshqalarga oʻrnak hamda namuna boʻlishi lozimligini taʼkidladi.

Ushbu tadbirlar xalq vakili sifatida faoliyat olib borayotgan deputatlarning oʻz saylovchilari bilan yanada yaqin muloqotda boʻlib, joylardagi muammolarni hal qilishda muhim ahamiyat kasb etishi shubhasiz.

Tuman hokimligining Axborot xizmati