QRIM-KONGO GEMORRAGIK ISITMA KASALLIGINING OLDINI OLIShGA BAGʻIShLANGAN TADBIR BOʻLDI

Maʼlumki, kunlar isishi bilan boshqa hasharotlar kabi kanalarning ham uygʻonishi va faollashishi boshlanadi. Shu sababli Qrim-Kongo gemorragik isitma kasalligining oldini olishga eʼtibor qaratilmoqda.

Kanalar ichida inson hayoti uchun oʻta xavfli boʻlgan, Qrim-Kongo gemorragik isitma kasalligi qoʻzgʻatuvchilarining tashuvchisi boʻlgan iksod kanalari ham mavjud. Ushbu holat fuqarolarimiz salomatligi muhofazasi yoʻnalishida taʼsirchan tadbirlarni amalga oshirishni taqozo etadi.

Qrim-Kongo gemorragik isitma kasalligi oʻtkir yuqumli kasallik boʻlib, odamlarga kasallik qoʻzgʻatuvchisi bilan zararlangan kanalar chaqishi orqali yuqadi. Demak, kasallikning asosiy manbai kasallangan odamlar, kasallangan kanalar va kasallik qoʻzgʻatuvchisi bilan zararlangan hayvonlar hisoblanadi.

Xoʻsh, kasallikdan qanday himoyalanish mumkin? Umuman, buning iloji bormi? Ha, albatta.

3-mart kuni “Aholi oʻrtasida Qrim-Kongo gemorragik isitma kasalligi tarqalishining oldini olishda favqulodda vaziyatlar davlat qutqaruv tizimining hamkorlikdagi harakatlari” mavzusidagi koʻrgazmali maxsus-taktik oʻquv-mashqida aynan ushbu kasallikdan himoyalanish boʻyicha tushunchalar berildi va maxsus amaliy-taktik mashgʻulotlar namoyish qilindi.

Tadbirda tuman Tibbiyot birlashmasi maʼsul shifokorlari, idora, korxona, tashkilotlar vakillari, Favqulodda vaziyatlar boʻlimi xodimlari ishtirok etdilar. Mashgʻulotlar avvalida tuman Mahalla va oilani qoʻllab-quvvatlash boʻlimi boshligʻi Gʻulomjon Duysenboyev ushbu tadbirning aholi uchun ahamiyati haqidagi toʻxtalib oʻtdi. Tuman sanitariya-epidemiologik osoyishtalik va jamoat salomatligi boʻlimining epidemiologiya va immunoprofilaktika boʻlimi mudirasi Gulshod Tojiboyeva esa Krim-Kongo gemorragik isitma kasalligihaqida batafsil maʼlumotlar berdi. Tuman Tibbiyot birlashmasining bosh infektsionist shifokori Ozod Qurbonboyev mazkur kasallikning klinikasi, diagnostikasi va uni davolash usullari xususida gapirdi.

Tadbirning amaliy qismi tuman Tibbiyot birlashmasining koʻptarmoqli markaziy poliklinikasida oʻtkazildi. Bu yerda teri va tanosil kasalliklari xonasi shifokori va hamshirasi Qrim-Kongo gemorragik isitma kasalligiga chalinganlikda gumon qilingan bemorni tekshirish, tashhis qoʻyish va yuqumli kasalliklar boʻlimining izolyator xonasiga yotqizish, bu haqda belgilangan tashkilotlarga xabarnoma berish tartibini amalda koʻrsatib berdilar.

Tadbir davomida tuman Veterinariya boʻlimi xodimlari, Sanitariya-epidemiologik osoyishtalik va jamoat salomatligi boʻlimi hamda koʻp tarmoqli markaziy poliklinika shifokorlari va hamshiralari ushbu kasallikdan saqlanish yuzasidan hamkorlikda targʻibot-tashviqot ishlarini yanada kuchaytirishi lozimligi taʼkidlandi.

Tuman hokimligi tashabbusi bilan hamkor tashkilotlar bilan birgalikda oʻtkazilgan koʻrgazmali maxsus taktik-oʻquv mashqi Qrim-Kongo gemorragik isitma kasalligi bilan bogʻliq noxush holatlar sodirrrr boʻlishining oldini  olishda muhim vosita boʻldi.

Oygul RAJABOVA.