AMUDARYoDA YoGʻ-MOY IShLAB ChIQARISh YOʻLGA QOʻYILADI
Amudaryo tumanida masʼuliyati cheklangan jamiyat shaklidagi “Amudaryotex” xorijiy korxonasida paxtachilik-toʻqimachilik klasteri tashkil etilganligi sohada muhim yuksalishlarga asos boʻlmoqda. Klaster tizimi paxtani ekishdan to hosilidan tayyor mahsulot ishlab chiqarishgacha boʻlgan jarayonlarni yagona texnologik zanjirga birlashtiradi. Bunda ilm-fan, hamda ishlab chiqarish integratsiyasi chuqurlashadi, yangi innovatsion texnoloniyalarni amaliyotga joriy etishga qulay sharoit yaratiladi.
Paxtachilik-toʻqimachilik klasteri yer maydonlarida intensiv texnologiyalarni ishlab chiqarishga keng joriy etish orqali paxtachilikdan yuqori hosil olinib, fermer xoʻjaliklari iqtisodiyoti barqarorlashdi. Texnik taʼminoti yaxshilanib, qishloq xoʻjaligi mehnatkashlari moddiy manfaatdorligi oshishiga asos boʻlmoqda.
Ushbu paxtachilik-toʻqimachilik klasteri tumanimiz fermer xoʻjaliklarida yetishtirilgan paxtani qayta ishlash uchun sobiq “Amudaryo paxta tozalash zavodi”ning bino va inshootlarini besh yil muddatda toʻlash sharti bilan sotib olib, oʻz tarkibiga qoʻshdi. Hozirgi kungacha mazkur zavodda tozalanib, chigitidan ajratilib, tola holiga keltirilgan paxtadan “Amudaryotex” xorijiy korxonasida kalava ip tayyorlanib, chigiti chetga sotilayotgan edi.
Ayni kunlarda klaster korxonada ushbu chigitlardan yogʻ-moy ishlab chiqarish maqsadida 4 million 300 ming dollarlik loyihani ishga tushirish uchun saʼy-harakatlar olib borilmoqda.
Loyihaga muvofiq zarur uskunalar, texnologiyalarni olib kelib oʻrnatish ishlari qizgʻin davom etmoqda. Texnologiyalarni oʻrnatish ishlariga malakali mutaxassislar jalb etilgan boʻlib, ularning unumli ishlashlariga zarur sharoitlar yaratilgan. Loyiha qurilishi tugallansa, paxtachilik-toʻqimachilik klasterida paxtadan mahsulot ishlab chiqarish turlari yana bittaga koʻpayadi. Yiliga 10 ming tonna oʻsimlik moyi ishlab chiqarish quvvatiga ega loyiha qurilishi tugallansa, bu yerda yana 100 ta yangi ish oʻrni yaratiladi.
Masʼuliyati cheklangan jamiyat shaklidagi “Amudaryotex” xorijiy korxona paxta-toʻqimachilik klasterida kelgusida amalga oshirilishi moʻljallanayotgan rejalar talaygina. Xususan, 2024-2025-yillarda 5 million pogonometr kalava ip ishlab chiqarish, 2025-2026-yillarda ishlab chiqarilgan kalava iplarni toʻqimachilik mahsulotlariga aylantirish kabi loyihalar ham koʻzda tutilgan. Yaʼni dehqonlarimiz yetishtirgan paxta hosili shu yerning oʻzida tozalanadi, tola ishlab chiqarilib, tola kalava ipga aylantirilib, toʻqimachilik mahsuloti, yaʼni gazlama ishlab chiqariladi. Natijada yana qoʻshimcha 2 ming ishchi oʻrin yaratiladi, mahsulot eksporti koʻlami ham ortadi. Bu oʻz-oʻzidan ayonki, ushbu jarayonlarda ishtirok etadigan dehqonlar-u ishchilarning manfaatdorligi ortadi, turmushi yana ham farovon boʻladi.
Klaster korxonasining moddiy qoʻllab-quvvatlashi natijasida joriy yilda ham paxtadan moʻl hosil yetishtirish uchun puxta zamin yaratildi, yerlar lazer uskunasi yordamida tekislanib, sugʻorilmoqda, ekish mavsumiga texnikalar taʼmirlanib tayyorlandi, paxtani zararli hasharotlardan, kasalliklardan va yovvoyi oʻtlardan biologik himoya qilish chora-tadbirlari olib borilmoqda.
Bu oʻz navbatida tumanimiz iqtisodiyoti yuksalishiga, xalqimiz turmushi sifati yaxshilanishiga muhim hissa boʻlib qoʻshiladi.
Oygul RAJABOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
