Tuman hokimi – 1-sektor rahbari Sultonboy Yoʻldashev tomonidan sayyor qabul oʻtkazildi

Tuman hokimi – 1-sektor rahbari Sultonboy Yoʻldashev aholi bilan yaqindan muloqotda boʻlish, mavjud muammolarni oʻrganish va ularning hal etilishiga koʻmaklashish maqsadida 18-fevral kuni Choykoʻl ovul fuqarolar yigʻini binosida sayyor qabul oʻtkazdi.

Sayyor qabulda 1-sektor hududiga biriktirilgan ishchi guruhi aʼzolari, tuman Xalq qabulxonasi vakillari, mutasaddi tashkilotlar rahbarlari hamda hududda istiqomat qiluvchi 20 nafardan ortiq fuqarolar ishtirok etdi.

 Yigʻilishni tuman Xalq qabulxonasi mudiri Erkin Rajapov ochib berdi hamda joriy yil boshidan tuman Xalq qabulxonasiga 1-sektor hududida yashovchi fuqarolardan kelib tushgan murojaatlar va ularning ijrosi haqida soʻz yuritdi.

Shundan soʻng, sektor rahbari aholining yashash sharoitini yaxshilash, bandligini taʼminlashga qaratilgan chora-tadbirlar va 2022-yilda amalga oshirilishi rejalashtirilgan ishlar haqida maʼlumotlar berdi. Bundan tashqari, mahalladagi hokim yordamchilari va yoshlar yetakchilariga yuklatilgan vazifalar haqida soʻz yuritib, bundan buyogʻiga mahallalarda ishlash tizimi butunlay boshqacha boʻlishini, ushbu ikki lavozim egasi oʻzlari biriktirilgan mahalladagi aholining yashash sharoitini yaxshilashga, tadbirkorlik va ishbilarmonlik qobiliyatlarini qoʻllab-quvvatlashga birdek masʼul ekanligini taʼkidladi.

Darhaqiqat, barcha sohalarda amalga oshirilayotgan islohot va yangilanishlar avvalo aholi manfaatlarini taʼminlashga qaratilgan.

Sayyor qabulda Davlat kadastrlar palatasi Amudaryo tumani filiali boshligʻi Shokirjon Davlatov tomonidan ye-auksion elektron savdo platformasi orqali dehqon xoʻjaligi, uy-joy hamda tadbirkorlik yerlarini sotib olish tartibi haqida tushunchalar berildi.

Maʼlumotlarda keltirilishicha, onlayn auktsionda ishtirok etish istagida boʻlgan shaxs yuridik yoki jismoniy shaxs sifatida savdo maydonchasi orqali roʻyxatdan oʻtishi talab etiladi. Roʻyxatdan oʻtgandan soʻng, ushbu fuqaroga savdo kabineti yaratiladi. Auktsionga qoʻyilgan har bir koʻchmas mulk haqida 30 kun oldin habar beriladi.

Fuqarolarga imtiyozli kredit olish tartibi haqida Mikrokreditbank tuman boʻlimi masʼullari tomonidan keng tarzda maʼlumot berildi.

Vazirlar Mahkamasining 2021-yil 21-dekabrdagi qaroriga asosan 2022−2024-yillarda maxsus oʻquv kurslarini tamomlagan va sertifikatni qoʻlga kiritgan yoshlarga 540 mln soʻmgacha kredit beriladi. Kredit foiz stavkasi Markaziy bankning qayta moliyalash stavkasida, 3-yil imtiyozli davr bilan 7-yil muddatga ajratiladi.

Yoshlar keltirilgan maʼlumotlar asosida imtiyozli kredit olish shartlari bilan yaqindan tanishdilar.

Shundan soʻng sektor rahbariga fuqarolardan bir qancha murojaatlar kelib tushdi. Murojaatlar mazmuni ovul hududidagi baʼzi koʻchalarga tosh yotqizish, elektr kuchlanishi past boʻlganligi uchun yangi transformator va beton simyogʻochlar oʻrnatish, kantrakt toʻlovining bir qismini toʻlab berilishida amaliy yordam hamda Choykoʻl ovuli hududidan yangi yoʻl chiqarish kabi masalalarda boʻldi.

Sektor rahbari barcha masalalarni birma bir oʻrgandi. Yangi yoʻl chiqarish masalasi boʻyicha masʼul tashkilot vakillariga topshiriqlar berildi.

Muddat talab etiladigan masalalar yuzasidan esa tegishli soha mutasaddilariga koʻrsatmalar berilib, tez kunda hal etilishiga kelishib olindi.

Tumanimiz boʻylab oʻtkazilayotgan sayyor qabullar davlat organlari va fuqarolar oʻrtasida mustahkam koʻprik boʻlibgina qolmasdan, aholining hukumat rahbarlariga va davlat idoralariga boʻlgan ishochining yanada mustahkamlanishiga sabab boʻlmoqda.

Tuman hokimligining axborot xizmati