Туман ҳокими – 1-сектор раҳбари Султонбой Йўлдашев томонидан сайёр қабул ўтказилди

Туман ҳокими – 1-сектор раҳбари Султонбой Йўлдашев аҳоли билан яқиндан мулоқотда бўлиш, мавжуд муаммоларни ўрганиш ва уларнинг ҳал этилишига кўмаклашиш мақсадида 18 февраль куни Чойкўл овул фуқаролар йиғини биносида сайёр қабул ўтказди.

Сайёр қабулда 1-сектор ҳудудига бириктирилган ишчи гуруҳи аъзолари, туман Халқ қабулхонаси вакиллари, мутасадди ташкилотлар раҳбарлари ҳамда ҳудудда истиқомат қилувчи 20 нафардан ортиқ фуқаролар иштирок этди.

 Йиғилишни туман Халқ қабулхонаси мудири Эркин Ражапов очиб берди ҳамда жорий йил бошидан туман Халқ қабулхонасига 1-сектор ҳудудида яшовчи фуқаролардан келиб тушган мурожаатлар ва уларнинг ижроси ҳақида сўз юритди.

Шундан сўнг, сектор раҳбари аҳолининг яшаш шароитини яхшилаш, бандлигини таъминлашга қаратилган чора-тадбирлар ва 2022 йилда амалга оширилиши режалаштирилган ишлар ҳақида маълумотлар берди. Бундан ташқари, маҳалладаги ҳоким ёрдамчилари ва ёшлар етакчиларига юклатилган вазифалар ҳақида сўз юритиб, бундан буёғига маҳаллаларда ишлаш тизими бутунлай бошқача бўлишини, ушбу икки лавозим эгаси ўзлари бириктирилган маҳалладаги аҳолининг яшаш шароитини яхшилашга, тадбиркорлик ва ишбилармонлик қобилиятларини қўллаб-қувватлашга бирдек масъул эканлигини таъкидлади.

Дарҳақиқат, барча соҳаларда амалга оширилаётган ислоҳот ва янгиланишлар аввало аҳоли манфаатларини таъминлашга қаратилган.

Сайёр қабулда Давлат кадастрлар палатаси Амударё тумани филиали бошлиғи Шокиржон Давлатов томонидан е-auksion электрон савдо платформаси орқали деҳқон хўжалиги, уй-жой ҳамда тадбиркорлик ерларини сотиб олиш тартиби ҳақида тушунчалар берилди.

Маълумотларда келтирилишича, онлайн аукционда иштирок этиш истагида бўлган шахс юридик ёки жисмоний шахс сифатида савдо майдончаси орқали рўйхатдан ўтиши талаб этилади. Рўйхатдан ўтгандан сўнг, ушбу фуқарога савдо кабинети яратилади. Аукционга қўйилган ҳар бир кўчмас мулк ҳақида 30 кун олдин ҳабар берилади.

Фуқароларга имтиёзли кредит олиш тартиби ҳақида Микрокредитбанк туман бўлими масъуллари томонидан кенг тарзда маълумот берилди.

Вазирлар Маҳкамасининг 2021 йил 21 декабрдаги қарорига асосан 2022−2024 йилларда махсус ўқув курсларини тамомлаган ва сертификатни қўлга киритган ёшларга 540 млн сўмгача кредит берилади. Кредит фоиз ставкаси Марказий банкнинг қайта молиялаш ставкасида, 3 йил имтиёзли давр билан 7 йил муддатга ажратилади.

Ёшлар келтирилган маълумотлар асосида имтиёзли кредит олиш шартлари билан яқиндан танишдилар.

Шундан сўнг сектор раҳбарига фуқаролардан бир қанча мурожаатлар келиб тушди. Мурожаатлар мазмуни овул ҳудудидаги баъзи кўчаларга тош ётқизиш, электр кучланиши паст бўлганлиги учун янги трансформатор ва бетон симёғочлар ўрнатиш, кантракт тўловининг бир қисмини тўлаб берилишида амалий ёрдам ҳамда Чойкўл овули ҳудудидан янги йўл чиқариш каби масалаларда бўлди.

Сектор раҳбари барча масалаларни бирма бир ўрганди. Янги йўл чиқариш масаласи бўйича масъул ташкилот вакилларига топшириқлар берилди.

Муддат талаб этиладиган масалалар юзасидан эса тегишли соҳа мутасаддиларига кўрсатмалар берилиб, тез кунда ҳал этилишига келишиб олинди.

Туманимиз бўйлаб ўтказилаётган сайёр қабуллар давлат органлари ва фуқаролар ўртасида мустаҳкам кўприк бўлибгина қолмасдан, аҳолининг ҳукумат раҳбарларига ва давлат идораларига бўлган ишочининг янада мустаҳкамланишига сабаб бўлмоқда.

Туман ҳокимлигининг ахборот хизмати