Jayxun ilhomlari

Virusni yengamiz

Butun jahon ahli, yana hayratda,

Dunyoda nimalar, nelar boʻlmoqda?

Quloq eshitmagan, koʻzlar koʻrmagan,

Bizga yana qanday sinov kelmoqda?

 

Oʻz kuchin koʻrsatib “koronavirus“,

Uchinchi yildirki, yer yuzin oldi.

Niqoblarni endi tashladik desak,

“Omikron” degan balo chang soldi.

 

Kimlar amal qilmay qoidalarga,

Koʻplar har xil joyda bemalol yurdi,

Yaratganning qahri keldimikan yo,

Bizga bu kunlarni nega koʻp koʻrdi?

 

Oʻttiz kishilik toʻy uch yuzta boʻldi,

Bayram, bazm, toʻylar oʻsha-oʻsha hol.

Bozorda, koʻchada, gavjum joylarda,

Parvo qilmay yurdi barcha bemalol.

 

Maktablar ochildi, bogʻcha ochildi,

U kun unutildi, hamma koʻngli toʻq.

“Kovid” yonimizda kezib yuribdi,

Birorta insonda lekin niqob yoʻq.

 

Kimlar chetga ketib, kimlardir keldi,

Tirikchilik gʻami, hammada axir.

Xom sut emgan banda, bilmaydi buni,

“Virus” kimga, qachon qiladi qahr.

 

Mehr-oqibat yoʻq joylarga asli,

Alloh yuborarkan kulfat-balosin.

Insofli, iymonli bandasi qator,

Doim saqlar emish yaxshi – aʼlosin.

 

Odamlar, uygʻoning! Gʻaflatda qolmang,

Kimning avlodimiz, barin bilamiz.

Barchamiz bir boʻlib, kurashsak albat,

Gʻalaba qilamiz, gʻolib boʻlamiz.

Shomurod Xoʻjanov, Doʻrman ovuli.

 

YIGITLARGA TABRIK

Haqiqiy er yigit boʻlmoqlik uchun,

Kamdir oʻgʻil bola boʻlib tugʻilmoq.

Kerak sinovlarga dosh berib avval,

Soʻng Vatan xizmatin burchim deb bilmoq.

 

Bugun yurtimiz tinch, koʻngil xotirjam,

Dilda shukrimizning yoʻq nihoyasi.

Bularning bariga garovdir shaksiz,

Sarhadlarda mard oʻgʻlonlar himoyasi.

 

Yigit bor joylarda bogʻlar gullaydi,

Yigit bor uylarda yangraydi kulgu.

Shu sabab keksalar koʻnglida muqim,

Yigitlar sogʻ boʻlsin degan bir tuygʻu.

 

Qut va barakaning sababi ular,

Mehnati tufayli dasturxon toʻkin.

Kamolin tilagan ota-onaga,

Ularning mardligi beradi taskin.

 

Bayramingiz qutlugʻ boʻlsin, yigitlar,

Eng ezgu tilaklar armugʻon sizga.

Elning baxti uchun qoʻshilsin doim,

Bilimga bilim-u, kuch kuchingizga!

Ahmad Nafasov.

 

Ota-onam

Otam bor, deb quvonaman,

Otam bilan dunyo goʻzal.

Onam bor deb dilim yayrar,

Onam bilan qalbim goʻzal.

 

Gʻam chekmayman, oʻkinmayman,

Suyanchigʻim – otam bor.

Mehr izlab, yoʻl yurmayman,

Mehri daryo onam bor.

 

Gar yiqilsam, qoyaday,

Otam meni suyaydi,

Goho koʻnglim singanda,

Onajonim siylaydi.

 

Shu tabarruk dunyoda,

Ota-onam sogʻ boʻlsin.

Umrin qilgin ziyoda,

Allohim, Hoji boʻlsin!

Elyorbek Erkinov,

57-maktab oʻquvchisi.

 

ShAMOL

Shamolning dardi yoʻq, dardi yoʻq,

Odammas u, hech kimni sogʻinmaydi.

Shamolning gʻami yoʻq, zavqi koʻp,

U hissiz, baxtli va mangu yashaydi!

 

“Shamol, kel, meni ham olib ket,

Men ham sendek boʻlgim keladi”.

Shunday desam, unga yuzlanib,

Tushunganday yuzim siladi.

 

Shamol boʻlmoq baxt va zavqli,

Yer-u osmon va olam kezasan!

Na chegara bor, na bir toʻsiq bor.

Ey shamol, istagim qachon sezasan?!

 

Men sevaman seni, sevaman behad,

Men bilan qolsang gar, keladi ilhom.

Oʻshal dam boʻlgancha oʻzimcha xursand,

Oppoq qogʻoz uzra ashʼor boʻlar jam.

Raʼno ISMOILOVA.

 

Birinchi qor

Osmondan tushar ukpar,

Kumushrang kapalak qor.

Hamma yoq oppoq rangda,

Bogʻ-rogʻlarga qarang-a!

 

Hamma xursand, hamma shod,

Bolalar qor bilan band.

Ularni koʻrgan hamma,

Koʻngli toshar shu damda.

 

Qor zavqi boshqachadir,

Oʻynab-oʻynab toʻymaysan.

Qish yasar kumushrang taxt,

Har dilga yor quvonch, baxt.

Yorqinoy KENJABOYeVA, 11-maktab oʻquvchisi.

 

Qish

Sovuq ayoz boʻlmoqda,

Qor ham yogʻar erkalab.

Ariqlar ham muzlagan,

Ayt, bu nimadan darak?

 

Boʻlsa-da sovuq havo,

Bolajonlar koʻchada.

Kimdir uchar chanada,

Kimdir yasar Qorbobo.

 

Ayozli kunlar keldi,

Derazaga gul chizdi.

Dalalar oppoq tusda,

Oʻynaymiz, mazza qishda.

Ruhshona Saidmambetova, 61-sonli maktab oʻquvchisi.