TUMAN STATISTIKA BOʻLIMIDA 2023-YILDA AHOLINI ROʻYXATGA OLISh TADBIRIGA TAYYoRGARLIK KOʻRILMOQDA

Amudaryo tumani statistika boʻlimi Oʻzbekiston Respublikasi Davlat statistika qoʻmitasining yagona tizimiga kiruvchi organ boʻlib, mahalliy davlat va xoʻjalik boshqaruvi organlari, yuridik shaxslar va fuqarolarning statistik maʼlumotlardan foydalanuvchilarini rasmiy statistika axborotiga boʻlgan ehtiyojini qondiradi, ilgʻor statistika axboroti tizimining faoliyat koʻrsatishiga yoʻnaltirilgan davlat statistika sohasidagi yagona siyosatni amalga oshirishda ishtirok etadi.

Rasmiy statistika sohasida yagona siyosatni amalga oshirish va statistikani tashkil etishning samarali tizimini taʼminlash, xalqaro standartlarga muvofiq boʻlgan yagona statistika metodologiyasini hamda davlat statistika kuzatuvlari shakllarini joriy etish, ijtimoiy iqtisodiy va demografik hodisalar, jarayonlar va ularning natijalari toʻgʻrisidagi statistika axborotlarini yigʻish, qayta ishlash, toʻplash, saqlash, umumlashtirish, tahlil qilish va eʼlon qilish, davlat organlarini, yuridik shaxslarni va statistik maʼlumotlardan foydalanuvchi aholini tuman boʻyicha statistika axborotlari bilan belgilangan tartibda taʼminlash kabi vazifalarni ado etayotgan tuman statistika boʻlimi faoliyatini kuzatgan kishi xodimlarning qizgʻin mehnat jarayoniga guvoh boʻladi. Boʻlimning uch nafar xodimi tashkilotning tahliliy salohiyatini mustahkamlashga ham eʼtibor qaratishmoqda.

Boʻlimda shuningdek, tumanda davlat statistika kuzatuvlari shakllarining joriy etilishini tashkil etish, hisobot taqdim etuvchi subʼektlarni tasdiqlangan davlat statistika hisoboti shakllari toʻgʻrisida xabardor qilish, ularni elektron shaklda toʻldirish va taqdim etish boʻyicha tushuntirishlar olib borish bilan bir qatorda, 2023-yilda mamlakatimizda ilk bor oʻtkazilishi koʻzda tutilayotgan aholini roʻyxatga olish tadbiriga ham qizgʻin tayyorgarlik koʻrishmoqda.

Boʻlim xodimlari bu borada har kuni oʻzaro maslahatlashib, kengashib, kun davomida qilinishi lozim boʻlgan ishlarni belgilab oladilar va ijrosiga kirishadilar.

Maʼlumki, aholini roʻyxatga olish natijalaridan hududlarni ijtimoiy-iqtisodiy rivojlantirish, aholi bandligi, taʼlim, sogʻliqni saqlash, ayollar va bolalar salomatligini yaxshilash, oilalarga moddiy yordam koʻrsatish, uy-joy bilan taʼminlash boʻyicha dasturlarni manzilli ishlab chiqishda axborot manbai sifatida foydalaniladi.

Shu boisdan ham ushbu muhim tadbirga tayyorgarlik koʻrishda tuman statistika boʻlimi xodimlari tumanimizdagi mavjud ovul, mahalla, shaharcha fuqarolar yigʻinlari masʼullari bilan mustahkam hamkorlikni yoʻlga qoʻyishgan.

Shu maqsadda boʻlim bosh mutaxassisi Hakimjon Egamberganov shu yil 27-yanvar kuni Mangʻit shahrining Durunki mahalla fuqarolar yigʻinida boʻlib, aholini roʻyxatga olish jarayoniga daxldor belgilangan chora-tadbirlar ijrosi bilan tanishdi. Tuman hokimining mahallada tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha yordamchisi Sarvar Komiljonov bilan kelgusidagi rejalar haqida maslahatlashdi.

Boʻlimda amalga oshirilayotgan ishlar tumanimizda barcha sohalardagi ahvolni baholashga va kelajak rejalarini belgilashga xizmat qilishi bilan ahamiyatlidir.

Oygul RAJABOVA.