ТУМАН СТАТИСТИКА БЎЛИМИДА 2023 ЙИЛДА АҲОЛИНИ РЎЙХАТГА ОЛИШ ТАДБИРИГА ТАЙЁРГАРЛИК КЎРИЛМОҚДА

Амударё тумани статистика бўлими Ўзбекистон Республикаси Давлат статистика қўмитасининг ягона тизимига кирувчи орган бўлиб, маҳаллий давлат ва хўжалик бошқаруви органлари, юридик шахслар ва фуқароларнинг статистик маълумотлардан фойдаланувчиларини расмий статистика ахборотига бўлган эҳтиёжини қондиради, илғор статистика ахбороти тизимининг фаолият кўрсатишига йўналтирилган давлат статистика соҳасидаги ягона сиёсатни амалга оширишда иштирок этади.

Расмий статистика соҳасида ягона сиёсатни амалга ошириш ва статистикани ташкил этишнинг самарали тизимини таъминлаш, халқаро стандартларга мувофиқ бўлган ягона статистика методологиясини ҳамда давлат статистика кузатувлари шаклларини жорий этиш, ижтимоий иқтисодий ва демографик ҳодисалар, жараёнлар ва уларнинг натижалари тўғрисидаги статистика ахборотларини йиғиш, қайта ишлаш, тўплаш, сақлаш, умумлаштириш, таҳлил қилиш ва эълон қилиш, давлат органларини, юридик шахсларни ва статистик маълумотлардан фойдаланувчи аҳолини туман бўйича статистика ахборотлари билан белгиланган тартибда таъминлаш каби вазифаларни адо этаётган туман статистика бўлими фаолиятини кузатган киши ходимларнинг қизғин меҳнат жараёнига гувоҳ бўлади. Бўлимнинг уч нафар ходими ташкилотнинг таҳлилий салоҳиятини мустаҳкамлашга ҳам эътибор қаратишмоқда.

Бўлимда шунингдек, туманда давлат статистика кузатувлари шаклларининг жорий этилишини ташкил этиш, ҳисобот тақдим этувчи субъектларни тасдиқланган давлат статистика ҳисоботи шакллари тўғрисида хабардор қилиш, уларни электрон шаклда тўлдириш ва тақдим этиш бўйича тушунтиришлар олиб бориш билан бир қаторда, 2023 йилда мамлакатимизда илк бор ўтказилиши кўзда тутилаётган аҳолини рўйхатга олиш тадбирига ҳам қизғин тайёргарлик кўришмоқда.

Бўлим ходимлари бу борада ҳар куни ўзаро маслаҳатлашиб, кенгашиб, кун давомида қилиниши лозим бўлган ишларни белгилаб оладилар ва ижросига киришадилар.

Маълумки, аҳолини рўйхатга олиш натижаларидан ҳудудларни ижтимоий-иқтисодий ривожлантириш, аҳоли бандлиги, таълим, соғлиқни сақлаш, аёллар ва болалар саломатлигини яхшилаш, оилаларга моддий ёрдам кўрсатиш, уй-жой билан таъминлаш бўйича дастурларни манзилли ишлаб чиқишда ахборот манбаи сифатида фойдаланилади.

Шу боисдан ҳам ушбу муҳим тадбирга тайёргарлик кўришда туман статистика бўлими ходимлари туманимиздаги мавжуд овул, маҳалла, шаҳарча фуқаролар йиғинлари масъуллари билан мустаҳкам ҳамкорликни йўлга қўйишган.

Шу мақсадда бўлим бош мутахассиси Ҳакимжон Эгамберганов шу йил 27 январь куни Манғит шаҳрининг Дурунки маҳалла фуқаролар йиғинида бўлиб, аҳолини рўйхатга олиш жараёнига дахлдор белгиланган чора-тадбирлар ижроси билан танишди. Туман ҳокимининг маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича ёрдамчиси Сарвар Комилжонов билан келгусидаги режалар ҳақида маслаҳатлашди.

Бўлимда амалга оширилаётган ишлар туманимизда барча соҳалардаги аҳволни баҳолашга ва келажак режаларини белгилашга хизмат қилиши билан аҳамиятлидир.

Ойгул РАЖАБОВА.