Amudaryo tumani DSI “Soliqchi – tadbirkorga koʻmakchi” tamoyili asosida ish olib bormoqda

Iqtisodiyotning rivojlanishi, maʼmuriyatchilik va soliq qonunchiligiga rioya etilishining yaxshilanishi soliq tushumlarining oʻsishini taʼminlaydi.

Amudaryo tumani boʻyicha oʻtgan 2021-yil  uchun byudjet prognozining bajarilishini taʼminlash maqsadida amalga oshirilgan chora-tadbirlar natijasida bu borada belgilangan prognoz koʻrsatkichi ortigʻi bilan bajarildi. Yaʼni, 2021-yil uchun belgilangan 59,9 mlrd. soʻm oʻrniga 70,4 mlrd. soʻm mublagʻ undirilib, reja 117,6 foizga bajarildi. Natijada byudjetga 10,5 mlrd. soʻm qoʻshimcha mablagʻ undirildi.

Amudaryo tuman Davlat Soliq inspektsiyasi  tomonidan “Soliqchi – tadbirkorga koʻmakchi” tamoyili doirasida tadbirkorlik subʼektlariga koʻmak berib kelinayotgani tufayli ana shunday yuqori koʻrsatkichga erishildi. Xususan, Davlat Soliq inspektsiyasi xodimlari tadbirkorlarga kredit ajratish, dastlabki hisob-kitoblarini yuritish, soliq imtiyozlarini qoʻllash tartiblarini tushuntirishda doimiy maslahatchi sifatida faoliyat yuritayotganlari muhim ahamiyat kasb etmoqda.

Bu borada “Soliqchi – tadbirkorga koʻmakchi” tamoyili doirasida tumanda faoliyat yuritib kelayotgan tadbirkorlik subʼektlarini yashil, sariq, qizil toifalarga ajratish orqali ularga koʻmaklashish, zarur holatlarda yangidan ochilgan xoʻjalik yurituvchi korxonalar roʻyxati tuzilib,  soliq organi xodimlari tomonidan joyiga chiqqan holda tadbirkorlarni qiynab kelayotgan muammolarni oʻrganishga asosiy eʼtibor qaratilmoqda.

Bunday uchrashuvlarda soliq qarzi toʻgʻrisida maʼlumot berish, soliq imtiyozlari va ularni qoʻllash tartibi, boshqa soliq turlaridan ortiqcha toʻlov summasini qaytarish, kredit olishga, yer ajratilishiga koʻmaklashish va soliq organiga aloqador bir qancha muammolar yuzasidan tizimli yordam va tushuntirishlar berilmoqda.

Xususan, Navoiy mahallasida ishlab chiqarish faoliyati bilan shugʻullanayotgan "Jumamurod Usta" oilaviy korxonasigi oʻz ish faoliyatini kengaytirish uchun bank tomonidan 100 mln. soʻm kredit ajratilishida amaliy yordam koʻrsatildi va hozirgi kunda korxonada 5 ta ish oʻrni yaratilgan va qoʻshimcha ish oʻrinlarini koʻpaytirish rejalashtirilgan.

Navoiy mahalla fuqarolar yigʻinida faoliyat koʻrsatayotgan “Tamara textil” masʼuliyati cheklangan jamiyati tomonidan 10 ta ish oʻrni yaratilgan boʻlib, aholiga sifatli va arzon turdagi kiyim-kechak mahsulotlari yetkazib berilmoqda. Bu borada soliq sohasidagi oʻzgarishlar, hozirgi kunda davlat tomonidan berilayotgan soliq imtiyozlari hamda ulardan foydalanish tartiblari toʻgʻrisida tushunchalar berilib, korxonaga amaliy yordamlar koʻrsatilib kelinmoqda.

Shuningdek, Yangiobod mahallasida faoliyat yuritayotgan "Xon Saroy Mehmonxonasi" masʼuliyati cheklangan jamiyati tomonidan restoran va mexmonxona xizmati yoʻlga qoʻyilib, aholiga sifatli xizmatlar koʻrsatib kelinmoqda. Soliq organlari xodimlari tadbirkor bilan uchrashgan holda “Soliqchi – tadbirkorga koʻmakchi” tamoyili doirasida tadbirkorning faoliyatida mavjud boʻlgan imtiyozlar, xususan, Prezidentning tegishli Qarori bilan umumiy ovqatlanish korxonalariga aylanmadan olinadigan soliq, foyda soligʻi, suv resurslaridan foydalanganlik uchun soliq, yuridik shaxslardan olinadigan yer va mol-mulk soliqlarini 2022-yil 1-yanvardan 1-iyulga qadar foizlarni undirmasdan, teng miqdorlarda boʻlib-boʻlib toʻlash huquqi mavjudligi toʻgʻrisida tushunchalar berildi.

Koʻrilayotgan barcha chora-tadbirlar tufayli tadbirkorlik subʼektlarining yanada barqaror faoliyat yuritishlariga zamin yaratilib, davlatimiz tomonidan berilayotgan imtiyozlardan unumli foydalanish imkonini yaratilmoqda.

Behzod YOʻLDOShEV,  Amudaryo tumani Davlat soliq bosh inspektori.