Xalq deputatlari Amudaryo tuman Kengashining 44-sessiyasi toʻgʻrisida axborot

2021-yil 30-dekabr kuni Xalq deputatlari Amudaryo tuman Kengashining navbatdagi 44-sessiyasi boʻlib oʻtdi. Sessiya majlisida tuman hokimi Sultonboy Yoʻldashev, tuman Kengashi deputatlari, sektor rahbarlari, tuman hokimi oʻrinbosarlari, hokimlik masʼul xodimlari, huquq-tartibot organlari masʼullari, boʻlimlar, tijorat banklari rahbarlari, fuqarolarning oʻzini oʻzi boshqarish organlari raislari hamda ommaviy axborot vositalari vakillari ishtirok etdilar.

Sessiya ishida dastlab Amudaryo tumanida jismoniy va yuridik shaxslarning qishloq xoʻjaligiga moʻljallanmagan yerlariga 2022-yil uchun yer soligʻi stavkalarini belgilash toʻgʻrisidagi masala koʻrib chiqildi hamda ushbu masala yuzasidan tuman davlat soliq inspektsiyasi boshligʻi Aydos Seitovning hisoboti tinglandi.

Hisobotda keltirilishicha, qishloq xoʻjaligiga moʻljallanmagan yerlar uchun Mangʻit shahri markazida joylashgan 12 ta mahalla fuqarolar yigʻinlarida yer soligʻi stavkalari jismoniy shaxslarga 1 kv metr uchun 286 soʻm, yuridik shaxslarga 1 ga uchun 30 mln 800 ming soʻm miqdorida qilib belgilangan. Qolgan boshqa hududlarda esa jismoniy shaxslarga 1 kv metr uchun 200,2 soʻm, yuridik shaxslarga esa 1 ga uchun 21 mln 560 ming soʻm qilib belgilangan.

 Shundan soʻng, Amudaryo tumani Mahalla va oilani qoʻllab-quvvatlash boʻlimi tomonidan 2021-yilda amalga oshirilgan ishlar, fuqarolarning oʻzini oʻzi boshqarish organlari faoliyatida uchrayotgan dolzarb muammo va kamchiliklar hamda ularning yechimi toʻgʻrisida Mahalla va oilani qoʻllab-quvvatlash boʻlimi boshligʻi Alisher Yuldashevning hisoboti tinglandi.

Hisobotda “Obod va xavfsiz mahalla” tamoyiliga asoslangan tizimni samarali joriy etish boʻyicha amalga oshirilgan ishlar, xususan, yangidan qurib foydalanishga topshirilgan hamda qayta taʼmirlangan mahalla fuqarolar yigʻini binolari haqida batafsil maʼlumot berildi. Bundan tashqari, 2021-yil davomida “Ayollar daftari” ga kiritilgan ayol-qizlarning hayotda oʻz oʻrnini topishlari uchun koʻrsatilgan moddiy, psixologik, ijtimoiy yordamlar haqida toʻxtalib oʻtildi. Shuningdek xisobotda, keksalarni ijtimoiy himoya qilishga qaratilgan ishlarning yil yakuni boʻyicha xulosasi bayon etildi.

Sessiya ishida Majburiy ijro byurosining tuman boʻlimi tomonidan yil yakuniga qadar amalga oshirilgan ishlar toʻgʻrisida Majburiy ijro byurosi Amudaryo tuman boʻlimi boshligʻining bildirishnomasi tinglandi. Byuro tomonidan joriy yilda aliment, soliq, va jarimalarni undirish boʻyicha samarali faoliyat olib borilgan. Bildirishnomada qayd etilishicha, jinoyat natijasida davlatga yetkazilgan zarar, davlat boji, jinoiy va maʼmuriy jarimalar, davlat foydasiga oʻtkazilgan mol-mulklarni sotish evaziga tushgan mablagʻlarning 50 foizini “Temir daftar”, “Ayollar daftari” va “Yoshlar daftari”ga kiritilgan fuqarolarni qoʻllab-qoʻvvatlash maqsadida byuro tomonidan oʻtkazib berilishi belgilangan.

Sessiyada Amudaryo tumani xalq taʼlimi boʻlimiga qarashli 47-sonli maktabda boʻshab qolgan direktorlik lavozimiga oʻtkazilgan tanlov yakunlari boʻyicha nomzodga kelishim berish masalasi ham koʻrib chiqildi. Sessiya davomida direktorlikka nomzod Oʻktam Bekbergenovning maktabda taʼlim sifati va samaradorligini oshirish boʻyicha kelgusi 3-yilda amalga oshiradigan maqsad va vazifalari aks etgan dasturi tinglandi.

Nomzodning dasturi oʻqib eshittirilganidan soʻng nomzodga kelishim berish masalasi boʻyicha ochiq ovoz berish jarayoni tashkil etildi. Deputatlar orasidan sanoq komissiyasi tuzildi. Ovoz berish yakunlariga koʻra, Oʻktam Bekberganov 47-sonli umumiy oʻrta taʼlim maktabi direktori lavozimiga munosib deb topildi va tuman Kengashi tomonidan tegishli qaror qabul qilindi.

Sessiyada shuningdek xalq deputatlari tuman Kengashi vakolatiga kiruvchi boshqa masalalar ham muhokama qilindi.

Kun tartibiga kiritilgan barcha masalalar atroflicha koʻrib chiqilib, ular yuzasidan deputatlar va sessiya ishtirokchilarining fikr-mulohazalari tinglandi hamda hisobotlar va axborotlar yuzasidan berilgan savollarga tegishlicha javoblar qaytarildi. Kun tartibidagi barcha masalalar boʻyicha Kengashning tegishli qarorlari qabul qilindi va shuning bilan sessiya oʻz ishini yakunladi.

Amudaryo tumani hokimligining axborot xizmati