Amudaryo tumani Ichki ishlar boʻlimi tashabbusi bilan "Sogʻlom va barkamol oila" shiori ostida oilaviy tanlovlar oʻtkazildi

Respublikamizda Ichki ishlar vaziri sovrini uchun "Sogʻlom va barkamol oila" shiori ostida 3-sektor hududidagi oilalar oʻrtasida sport musobaqalari va kitobxonlik bellashuvlari oʻtkazib kelinmoqda. Aholi oʻrtasida sogʻlom turmush tarzini, kitobxonlikni targʻib etish maqsadida oʻtkazilayotgan tanlovlarda sektor hududidagi oilalar ishtirok etib, oʻz mahoratlarini sinovdan oʻtkazishmoqda.

Amudaryo tumanida ham Ichki ishlar boʻlimi tashabbusi bilan xuddi shunday tanlovlar va sport musobaqalari oʻtkazildi. «Yosh kitobxon oila» va «Yosh sportchi oila» nomi bilan oʻtkazilgan mazkur tanlovlarda sektor hududidagi mahallalarda yashovchi oilalar qatnashdi.

14-dekabr kuni 82-sonli maktabda shu munosabat bilan tashkil etilgan tadbirni tuman Ichki ishlar boʻlimi boshligʻining oʻrinbosari Baxtiyor Urazov hamda tuman hokimi oʻrinbosari, Mahalla va oilani qoʻllab-quvvatlash boʻlimi boshligʻi Alisher Yoʻldoshevlar ochib berishdi. 

Tadbirda soʻzga chiqqanlar mazkur tanlovlar Prezidentimizning “Oʻzbekiston Respublikasida jismoniy tarbiya va sportni yanada takomillashtirish va ommalashtirish chora-tadbirlari toʻgʻrisida”gi, “Sogʻlom turmush tarzini keng tatbiq etish va ommaviy sportni yanada rivojlantirish chora-tadbirlari toʻgʻrisida”gi Farmonlarida koʻrsatilgan vazifalarni amalga oshirish maqsadida oʻtkazilayotganini maʼlum qilishdi. Shuningdek, Vazirlar Mahkamasining “2020-2025-yillarda kitobxonlik madaniyatini rivojlantirish va qoʻllab-quvvatlash milliy dasturini tasdiqlash toʻgʻrisida”gi Qarori ijrosini taʼminlash ham koʻzda tutilganini alohida taʼkidlab oʻtishdi.

Shundan soʻng, tadbirlarga start berilib, maktabning sport zalida sport musobaqalari bellashuvlari, faollar zalida kitobxon oilalar oʻz mahoratlarini sinovdan oʻtkazdilar. Musobaqa va bellashuvlarda sektor hududidan 6 ta oila ishtirok etdi.

Mazkur musobaqa va bellashuvlar ikki yoʻnalish boʻyicha oʻtkazilib, sektor hududidagi oilalar bellashuvida har bir yoʻnalish boʻyicha gʻoliblar saralab olindi.

Sportning "Quvnoq startlar", "Stol tennisi", "Shaxmat", "Shashka" hamda "Badminton" turlari boʻyicha musobaqalarda ishtirok etgan oilalar birgalikda oʻz chaqqonliklarini, abjir va ziyrakliklarini namoyish etib, gʻoliblik uchun kurashdilar. Shuningdek, kitobxonlik hamda maʼnaviyatni targʻib etuvchi "Eng yaxshi maʼnaviy yetuk oila" shiori ostida oʻtgan tanlovda oilalarning bilimdonligi, qanchalik darajada kitoblarga oshnoligi sinovdan oʻtkazildi. Ishtirokchilar bahru-bayt aytishuvlarda zukkoliklarini koʻrsatib, oʻqigan kitoblari, sevgan asarlaridagi qahramonlar haqida maʼlumotlar berishdi. Savol-javoblar viktorinasida ham bir-biridan qolishmaslikka harakat qilishdi.

Sport musobaqalarida faxrli 1-oʻrinni Bobur nomli ovulda yashovchi Guchbayevlar oilasi, 2-oʻrinni Oq oltin ovulida yashovchi Yoʻldoshevlar oilasi, 3-oʻrinni Durunki mahallasida yashovchi Bobojonovlar oilasi egalladi. Kitobxonlik yoʻnalishida esa Oq oltin ovulida yashovchi Yoʻldoshevlar oilasi 1-oʻrin, Bobur nomli ovulda yashovchi Guchbayevlar oilasi 2-oʻrin, Xitoy ovulida yashovchi Xudoyberganovlar oilasi 3-oʻrin gʻolibligini qoʻlga kiritdilar.

Murosasiz va keskin bahslarga boy tarzda kechgan tanlovlar gʻoliblari tuman Ichki ishlar boʻlimi boshligʻining diplomi hamda qimmatbaho sovgʻalari bilan taqdirlandilar. Sektor hududida birinchi oʻrinni egallagan oilalar vakillari musobaqalarning Qoraqalpogʻiston bosqichida ishtirok etadigan boʻlishdi.

Tadbirdan soʻng namoyish etilgan kontsert dasturi barchaga xushkayfiyat baxsh etdi.

O.Xudoyberganova.