INShOLAR TANLOVI YaKUNLANDI

Tumanimizda faoliyat yuritayotgan “Jayxun ilhomlari” nodavlat notijorat tashkiloti tomonidan “Yoshlar – yangi Oʻzbekiston bunyodkorlari” loyihasi asosida joylarda  uchrashuvlar va davra suhbatlari oʻtkazilib kelinmoqda. Bu tadbirlarda tuman mahalla va oilani qoʻllab-quvvatlash boʻlimi mutaxassislari, shifokorlar, ijodkorlar, maʼnaviyat targʻibotchilari, mahalla faollari, imomlar, keng jamoatchilik vakillari ishtirok etmoqdalar.

“Oilada farzand tarbiyasining ahamiyati, yoshlarni zararli illatlar va turli axloqsizliklardan himoya qilishda ota-onalar va mahallaning oʻrni”, “Yoshlarning maʼnaviyatini yuksaltirish, ularni kitobxonlikka jalb qilish orqali giyohvandlik, axloqsizlik va zararli taʼsirlardan himoya qilish”, “Yoshlar oʻrtasida sogʻlom turmush tarzi koʻnikmalarini keng targʻib qilish, ularni giyohvandlik, ichkilikbozlik, turli axloqsizliklardan himoya qilish” mavzularidagi suhbatlar aholi va yoshlar orasida ulkan qiziqish uygʻotmoqda.

Shuningdek, tashkilot tomonidan eʼlon qilingan loyihaning mazmun-mohiyati, ahamiyati va loyiha doirasida amalga oshiriladigan ishlar hamda ulardan kutilayotgan natijalar ham keng tarzda tushuntirib borilmoqda.

Tumanimiz yoshlari orasidan iqtidorli, ijodkor, badiiy ijodga ixlosi baland yoshlarni izlab topish maqsadida turli mavzularda maktab oʻquvchilari orasida insholar tanlovlari ham oʻtkazilib kelinmoqda.

Shu yilning 17-noyabr kuni “Jayxun ilhomlari” NNT tomonidan “Yoshlarning maʼnaviyatini yuksaltirish, shu orqali ularni giyohvandlik, axloqsizlik va boshqa zararli taʼsirlardan himoya qilish” maqsadida maktab oʻquvchilari oʻrtasida “Yoshlar – yurt keladagi” mavzusida insholar tanlovi eʼlon qilingan edi. Shu yilning 15-dekabr kuni mazkur insholar tanlovining natijalari badiiy kengash aʼzolari tomonidan oʻrganib chiqildi.

Natijalar esa quvonarli! Maktab oʻquvchilari orasida kelajagidan umid qilsa boʻladigan iqtidorli yoshlarning juda koʻp ekanligiga yana bir bor amin boʻldik.

Tuman xalq taʼlimi boʻlimiga qarashli 42-, 73-, 84-sonli  maktablarning oʻquvchilari insholar tanlovida oʻz faoliyatlari va oʻtkir zehnlarini, makon va zamon haqidagi teran fikrlarini  yana bir marotaba namoyish etdilar. Ularning bu intilishlari besamar ketmadi albatta.

42-sonli maktabning 9 “A”-sinf oʻquvchisi Dildora Tursunboyeva “Taʼsirchan fikrlari, bilimi, dunyoqarashi, shaxsiy  tashabbusi uchun”, shu maktabning 11 “B”-sinf oʻquvchisi Muborak Soatboyeva “Yoshlik va Vatan haqidagi goʻzal tuygʻulari teranligi uchun”, 73-sonli maktabning 9-sinf oʻquvchisi Gulmira Gulimmatova, “Eng yaxshi tahliliy fikrlari uchun”, 11-sinf oʻquvchisi Kumush Gulimmatova “Eng yaxshi samimiy fikrlari uchun”, 84-sonli maktabning 10 “V”-sinf oʻquvchilari Sevinchoy Usmonova “Insonni toʻgʻri  yoʻlga yoʻnaltiruvchi joʻshqin fikrlari uchun”, Mardona Raximboyeva “Vatanparvarlik tuygʻusi ulugʻlangan eng yaxshi tahlili uchun”, Adolat Ollayorova “Shaxsiy fikrini ravon bayon qilgani uchun” “Jayxun ilhomlari” nodavlat notijorat tashkilotining “Tashakkurnomasi bilan taqdirlandi.

“Yoshlar – yurt kelajagi” tanlovining yana bir faol ishtirokchisi 73-sonli maktabning 11-sinf oʻquvchisi Amirxon Tursunov oʻzi yozgan inshosida “Makon va zamon muhitining eng yaxshi badiiy tahlili uchun” tanlov gʻolibi deb topildi.

Insholar tanlovi gʻolibiga tashkilot tomonidan tayyorlangan sovgʻa va “Maqtov yorligʻi” tantanali tarzda topshirildi.

Gʻolib va tashakkurnomalar sohiblari bilim olayotgan maktablarning ustozlar jamoasiga, shu maktablarda faoliyat yuritayotgan maʼnaviyat targʻibotchilariga tashkilot tomonidan samimiy minnatdorchilik bildirildi.

Biz tilga olib oʻtgan maktab oʻquvchilarining kelajakda komil insonlar, goʻzal maʼnaviyatli, el ardogʻidagi fidoyilar safidan oʻrin olishlariga ishonchimiz komil.

“Jayxun ilhomlari” nodavlat notijorat tashkiloti qoshida kutubxona mavjud boʻlib, bu kutubxonada turli janrlardagi qiziqarli adabiyotlar saqlanmoqda. Kutubxonaning  bugungi kunda  231 kitobxon aʼzosi bor. Kutubxonada katta yoshdagi kitobxonlar uchun ham, maktab oʻquvchilari uchun ham birdek qiziqarli kitoblar mavjud.

Shuningdek, bu kutubxonaning Qangli, Kuyukkoʻpir, Doʻrman ovul fuqarolar yigʻinlarida, Qipchoq shaharcha fuqarolar yigʻinida  hamda Gulzor mahalla fuqarolar yigʻinlarida filiallari faoliyat koʻrsatmoqda. Mazkur qishloq kutubxonalaridan olis joylarda yashovchi kitobxonlar ham katta qiziqish bilan foydalanmoqdalar.

Tumanimiz aholisining kitoblarga boʻlgan qiziqishlarini inobatga olgan holda mazkur kutubxonalarda kitobxonlarga har tomonlama  qulayliklar yaratib borilmoqda. Natijada turli yoshdagi kitobxonlar soni yildan-yilga koʻpayib bormoqda.

Tashkilot qoshidagi kutubxonada turli yoshdagi kitobxonlarni uchratish mumkin.

Kutubxonasizdan kitob olib oʻqiyotgan kitobxonlarning qiliqishlari baholanganida katta yoshdagi kitobxonlar orasida Serquyosh koʻchasi 11-uyda istiqomat qiluvchi fuqaro, mehnat faxriysi Maqsud Tojiboyev, maktab oʻquvchilari orasida 40-sonli maktabning 10 “A”-sinf oʻquvchisi Shahlo Yangiboyeva “Eng faol kitobxon” deb tan olindi.

Bu ikkala kitobxonimizga ham tashkilotimiz tomonidan sovgʻa va tashakkurnoma topshirildi.

Kitobxonlarimizga yaxshi kayfiyat tilagan holda, kitob insonning eng yaxshi doʻsti ekanligini yana bir marotaba eslatib oʻtmoqchimiz.

Oʻrozali REYIMOV, “Jayxun ilhomlari” NNT raisi.