ИНШОЛАР ТАНЛОВИ ЯКУНЛАНДИ

Туманимизда фаолият юритаётган “Жайхун илҳомлари” нодавлат нотижорат ташкилоти томонидан “Ёшлар – янги Ўзбекистон бунёдкорлари” лойиҳаси асосида жойларда  учрашувлар ва давра суҳбатлари ўтказилиб келинмоқда. Бу тадбирларда туман маҳалла ва оилани қўллаб-қувватлаш бўлими мутахассислари, шифокорлар, ижодкорлар, маънавият тарғиботчилари, маҳалла фаоллари, имомлар, кенг жамоатчилик вакиллари иштирок этмоқдалар.

“Оилада фарзанд тарбиясининг аҳамияти, ёшларни зарарли иллатлар ва турли ахлоқсизликлардан ҳимоя қилишда ота-оналар ва маҳалланинг ўрни”, “Ёшларнинг маънавиятини юксалтириш, уларни китобхонликка жалб қилиш орқали гиёҳвандлик, ахлоқсизлик ва зарарли таъсирлардан ҳимоя қилиш”, “Ёшлар ўртасида соғлом турмуш тарзи кўникмаларини кенг тарғиб қилиш, уларни гиёҳвандлик, ичкиликбозлик, турли ахлоқсизликлардан ҳимоя қилиш” мавзуларидаги суҳбатлар аҳоли ва ёшлар орасида улкан қизиқиш уйғотмоқда.

Шунингдек, ташкилот томонидан эълон қилинган лойиҳанинг мазмун-моҳияти, аҳамияти ва лойиҳа доирасида амалга ошириладиган ишлар ҳамда улардан кутилаётган натижалар ҳам кенг тарзда тушунтириб борилмоқда.

Туманимиз ёшлари орасидан иқтидорли, ижодкор, бадиий ижодга ихлоси баланд ёшларни излаб топиш мақсадида турли мавзуларда мактаб ўқувчилари орасида иншолар танловлари ҳам ўтказилиб келинмоқда.

Шу йилнинг 17 ноябрь куни “Жайхун илҳомлари” ННТ томонидан “Ёшларнинг маънавиятини юксалтириш, шу орқали уларни гиёҳвандлик, ахлоқсизлик ва бошқа зарарли таъсирлардан ҳимоя қилиш” мақсадида мактаб ўқувчилари ўртасида “Ёшлар – юрт келадаги” мавзусида иншолар танлови эълон қилинган эди. Шу йилнинг 15 декабрь куни мазкур иншолар танловининг натижалари бадиий кенгаш аъзолари томонидан ўрганиб чиқилди.

Натижалар эса қувонарли! Мактаб ўқувчилари орасида келажагидан умид қилса бўладиган иқтидорли ёшларнинг жуда кўп эканлигига яна бир бор амин бўлдик.

Туман халқ таълими бўлимига қарашли 42-, 73-, 84-сонли  мактабларнинг ўқувчилари иншолар танловида ўз фаолиятлари ва ўткир зеҳнларини, макон ва замон ҳақидаги теран фикрларини  яна бир маротаба намойиш этдилар. Уларнинг бу интилишлари бесамар кетмади албатта.

42-сонли мактабнинг 9 “А”-синф ўқувчиси Дилдора Турсунбоева “Таъсирчан фикрлари, билими, дунёқараши, шахсий  ташаббуси учун”, шу мактабнинг 11 “Б”-синф ўқувчиси Муборак Соатбоева “Ёшлик ва Ватан ҳақидаги гўзал туйғулари теранлиги учун”, 73-сонли мактабнинг 9-синф ўқувчиси Гулмира Гулимматова, “Энг яхши таҳлилий фикрлари учун”, 11-синф ўқувчиси Кумуш Гулимматова “Энг яхши самимий фикрлари учун”, 84-сонли мактабнинг 10 “В”-синф ўқувчилари Севинчой Усмонова “Инсонни тўғри  йўлга йўналтирувчи жўшқин фикрлари учун”, Мардона Рахимбоева “Ватанпарварлик туйғуси улуғланган энг яхши таҳлили учун”, Адолат Оллаёрова “Шахсий фикрини равон баён қилгани учун” “Жайхун илҳомлари” нодавлат нотижорат ташкилотининг “Ташаккурномаси билан тақдирланди.

“Ёшлар – юрт келажаги” танловининг яна бир фаол иштирокчиси 73-сонли мактабнинг 11-синф ўқувчиси Амирхон Турсунов ўзи ёзган иншосида “Макон ва замон муҳитининг энг яхши бадиий таҳлили учун” танлов ғолиби деб топилди.

Иншолар танлови ғолибига ташкилот томонидан тайёрланган совға ва “Мақтов ёрлиғи” тантанали тарзда топширилди.

Ғолиб ва ташаккурномалар соҳиблари билим олаётган мактабларнинг устозлар жамоасига, шу мактабларда фаолият юритаётган маънавият тарғиботчиларига ташкилот томонидан самимий миннатдорчилик билдирилди.

Биз тилга олиб ўтган мактаб ўқувчиларининг келажакда комил инсонлар, гўзал маънавиятли, эл ардоғидаги фидойилар сафидан ўрин олишларига ишончимиз комил.

“Жайхун илҳомлари” нодавлат нотижорат ташкилоти қошида кутубхона мавжуд бўлиб, бу кутубхонада турли жанрлардаги қизиқарли адабиётлар сақланмоқда. Кутубхонанинг  бугунги кунда  231 китобхон аъзоси бор. Кутубхонада катта ёшдаги китобхонлар учун ҳам, мактаб ўқувчилари учун ҳам бирдек қизиқарли китоблар мавжуд.

Шунингдек, бу кутубхонанинг Қангли, Куюккўпир, Дўрман овул фуқаролар йиғинларида, Қипчоқ шаҳарча фуқаролар йиғинида  ҳамда Гулзор маҳалла фуқаролар йиғинларида филиаллари фаолият кўрсатмоқда. Мазкур қишлоқ кутубхоналаридан олис жойларда яшовчи китобхонлар ҳам катта қизиқиш билан фойдаланмоқдалар.

Туманимиз аҳолисининг китобларга бўлган қизиқишларини инобатга олган ҳолда мазкур кутубхоналарда китобхонларга ҳар томонлама  қулайликлар яратиб борилмоқда. Натижада турли ёшдаги китобхонлар сони йилдан-йилга кўпайиб бормоқда.

Ташкилот қошидаги кутубхонада турли ёшдаги китобхонларни учратиш мумкин.

Кутубхонасиздан китоб олиб ўқиётган китобхонларнинг қилиқишлари баҳоланганида катта ёшдаги китобхонлар орасида Серқуёш кўчаси 11-уйда истиқомат қилувчи фуқаро, меҳнат фахрийси Мақсуд Тожибоев, мактаб ўқувчилари орасида 40-сонли мактабнинг 10 “А”-синф ўқувчиси Шаҳло Янгибоева “Энг фаол китобхон” деб тан олинди.

Бу иккала китобхонимизга ҳам ташкилотимиз томонидан совға ва ташаккурнома топширилди.

Китобхонларимизга яхши кайфият тилаган ҳолда, китоб инсоннинг энг яхши дўсти эканлигини яна бир маротаба эслатиб ўтмоқчимиз.

Ўрозали РЕЙИМОВ, “Жайхун илҳомлари” ННТ раиси.