Tinch va osoyishta yurtda istiqlol tantanasi

Bugun jannatmakon yurtimizning har bir goʻshasi bayram ogʻushida. Xalqimiz mamlakatimiz mustaqilligining 23 yilligini katta shodiyona bilan, koʻtarinki kayfiyatda qarshi olmoqda.

Shunday faraxbaxsh kunlarda bizga istiqloldek ulugʻ neʼmatni ato etgani, xalqimizni turli balo-qazolardan omon saqlab, yorugʻ kunlarga yetkazgani uchun har birimiz Yaratganga shukronalar aytamiz.

Shu oʻrinda, istiqlolning oʻz-oʻzidan kelmagani, Vatan ozodligi asrlar davomida ota-bobolarimiz uchun eng ulugʻ orzu boʻlib, bu yoʻlda yurtning minglab fidoyi oʻgʻlonlarining qoni toʻkilganini eslamaslik mumkin emas. Shuning uchun ham, Oʻzbekiston Respublikasi davlat mustaqilligini qoʻlga kiritgan buyuk tarixiy sana – 1-sentyabr xalqimizning ijtimoiy-siyosiy, maʼnaviy hayotida beqiyos oʻrin tutadigan qutlugʻ kundir.

Mustabid tuzum barham topganidan keyin mamlakatimizda yuzaga kelgan juda qaltis iqtisodiy, ijtimoiy-siyosiy, axloqiy-maʼnaviy vaziyatni bartaraf etish yoʻlida muhtaram Yurtboshimiz tomonidan uzoqni koʻzlab barcha sohalarda amalga oshirilgan keng koʻlamli islohotlar, boshiga tushgan murakkab sinov va qiyinchiliklarni mardonavor yengib oʻtgan xalqimizning mustahkam irodasi, gʻayrat va shijoati tufayli mamlakatimiz mustaqilligi mustahkamlandi.

Bugungidek sururli damlarda oʻz-oʻzimizga "Biz kecha kim edigu bugun kim boʻldik?” degan haqli savolni berib, bundan 23-yil oldingi va bugungi kunimizni solishtirar ekanmiz, toʻgʻri belgilab olgan oʻzimizga xos rivojlanish yoʻlimiz, xalqimizning istiqlol gʻoyalariga sadoqati, halol va fidokorona mehnati natijasida mustaqillik yillarida ulkan yutuqlar qoʻlga kiritilayotganining guvohi boʻlamiz. Bugun dunyoda oʻzbek degan millat, Oʻzbekiston degan davlat borligini, uning qisqa davrda ulkan rivojlanish yoʻlini bosib oʻtganini, yurtimizning kuch-qudrati, salohiyatini butun dunyo tan oldi.

Istiqlol yillaridagi oʻzgarishlarning eng kattasi odamlarimiz ongida, dunyoqarashida roʻy berdi. Bugungi oʻzbekistonliklar oʻtgan asrning 90-yillaridagi boqimandalik kayfiyatidagi odamlar emas. Ular erkin va obod yurtda tinch va osoyishta kunlarning qadriga yetib, mustaqillikni mustahkamlash, obodlik va bunyodkorlik ishlariga hissa qoʻshishdek ulugʻvor maqsadlar bilan yashamoqdalar, mehnat qilmoqdalar. Ularda oʻz yurtining kelajagiga, oʻzining ertangi kuniga ishonch, Vatan taqdiriga daxldorlik tuygʻusi mujassam. Ana shunday fidoyi el mehnatidan Vatan ravnaq topmoqda, yuksalmoqda.

Yurtimizning moʻʼjaz goʻshasi boʻlmish Amudaryo tumanida ham bunday oʻzgarishlar, yangilanish va yuksalishlar kun sayin boʻy koʻrsatmoqda. Shahar-u qishloqlarimiz, mahalla-yu koʻchalarimiz, hovli va xonadonlarimiz obodlik sari yuz tutib, fayzli maskanlarga aylanmoqda.

Amudaryoliklar joriy "Sogʻlom bola yili”da ham eng ulugʻ va eng aziz bayramni katta mehnat zafarlari bilan qarshi olmoqda. Istiqlol bayrami arafasida yirik sanoat loyihasi - "Amudaryotex” xorijiy korxonasi ilk mahsulotini bera boshlagan boʻlsa, qishloq xoʻjaligi sohasi ilgʻorlari pilla va gʻalla yetishtirish boʻyicha kontraktatsiya shartnomalarini Respublikamizda birinchi boʻlib bajarishdi va eng masʼuliyatli palla – paxta yigʻim-terimi arafasida turibdi. Ishonamizki, paxtakorlarimizning va butun xalqimizning hamjihatlikdagi mehnati samarasi sifatida yaqin kunlar ichida 40 ming tonnadan ortiq yuksak xirmon bunyod etiladi va bu ham istiqlolimizning 23 yilligiga katta tuhfamiz boʻladi.

Quruvchilarimizning fidoyi mehnatlari tufayli bayram arafasida 70 ta namunaviy loyihalar asosidagi uy-joylar, qator taʼlim maskanlari yangidan qurilib, foydalanishga topshirilmoqda. Shuningdek, tadbirkorlarimizning oʻz mablagʻlari hisobidan ovul va mahalalarimizda ijtimoiy-madaniy va tadbirkorlik obʼektlari qurib bitkazilmoqda.

Taʼlim, sogʻlikni saqlash va ijtimoiy-iqtisodiy yoʻnalishdagi boshqa sohalarda ham istiqlol bayramiga tuhfa etgulik yutuqlarimiz bisyor.

Ushbu sururli damlarda "Yagonasan, muqaddas Vatanim, sevgi va sadoqatim senga baxshida, goʻzal Oʻzbekistonim!” degan shiorni dillariga jo qilib, istiqlolimizning 23 yillik bayramini koʻtarinki ruhda nishonlayotgan amudaryoliklarni yana bir marta eng ulugʻ va eng aziz bayramimiz bilan chin qalbimdan tabriklayman! Yurtimiz tinch, osmonimiz musaffo, xalqimiz omon, mustaqilligimiz abadiy boʻlsin!

Rajabboy YOʻLDOShEV,

tuman hokimi.