BOLANGIZNI DOʻSTIM, DEB BILING
Bolalik, begʻubor bolalik, kim qayoqqa yetaklasa ketaveradigan, har qanday narsaga ishonadigan, shirin soʻzning, maqtovlarning egasi. Koʻngli chinnidek toza, harirdek yumshoq, paxta kabi oq. U hali yozilmagan daftar singari toza.
Bolalik – juda qiziquvchan davr. Bola tegma, degan narsaga tegib koʻradi, taʼ-qiqlangan narsaga qiziqishi baland boʻladi. Mana shu davrda ayrim ota-onalar bolaga qattiq gapirib ularni qoʻrqitib qoʻyadi. Bu harakatimiz bilan bolani qoʻrqitamiz, xolos, nimaga tegmaslik kerak, oqibati nima boʻladi, buni toʻliq tushuntirib bermaymiz. Yoki boʻlmasa, ishdan charchab kelganimizda, oilamizda janjal chiqsa, boladan olamiz achchigʻimizni. Bu esa bolaga jiddiy taʼsir koʻrsatibgina qolmasdan, unda turli nuqsonlarni keltirib chiqaradi. Natijada bola biroz tortinchoq, koʻpchilikning oldida oʻzini noqulay sezadigan, kamsitilgandek his qiladigan boʻlib qoladi. Shu bois, bolalar bilan doimo kattalardek munosabatda boʻling. Siz unga hurmat maʼnosida qarasangiz, ular yonidagi insonlarga shunday munosabatda boʻlishadi.
Qush uyasida koʻrganini qiladi, deb bejiz aytishmagan. Oilada hamisha sogʻlom muhit yaratib qoʻysangiz, bolaning ruhiyatiga taʼsir koʻrsatadi. U oʻzicha yangi gʻoyalarni oʻylab topishni boshlaydi. Siz yaratib qoʻygan oʻsha sogʻlom muhitda sogʻlom fikr yuritadigan, dono, aqlli farzandlar kamol topadi.
Psixologlarning taʼkidlashicha, bolalarning miyasi faqat maqtov eshitishga moslashgan. Ularga salbiy munosabatda boʻlish, bolaning ongini zaharlarkan, xolos va bora-bora bolada duduqlanish, stressga tushish, qoʻrqoqlik holatlari namoyon boʻlar ekan. Inson bolaligida qanday tarbiya olsa, hayotga ham shunday kirib boradi. Shuning uchun qadrli ota-onalar farzandingiz hayotda nimaiki yutuqqa erishsa, bu sizning bolalikdagi bergan toʻgʻri tarbiyangiz mahsuli hisoblanadi
Darhaqiqat, bugungi davrda bola tarbiyasi har narsadan ustun. Davlatimiz yosh avlodni barkamol inson qilib tarbiyalashda zarur barcha sharoitlarni yaratib bermoqda. Edukids oʻquv markazlari, Prezident maktablari buning yorqin misolidir.
Keling, mana shu imkoniyatdan samarali foydalanaylik, farzandlarimiz uchun vaqt ajratib, har bir holat haqida toʻliq tushuncha beraylik. Bolaning ongiga maʼlumotni siz qanday singdirsangiz, u shunday qabul qiladi. Zero, farzandingiz – kelajagingiz poydevori!
M.Oʻrinboyeva, 70-sonli maktab psixologi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
