Jayxun ilhomlari

VATAN BAYROGʻI

Qizilqumdan esgan garmsel shamol,

Kuydirib tursa-da yuz-u koʻzimni.

Vatan kengliklarin kezaman xushhol,

Biyday dalalarga bosib yuzimni.

Dedilar: “Sahro-ku sen tugʻilgan Yurt,

Shoʻrhok dalalarda giyohlar nimjon.

Tuzlar boʻhronida chayqalar Ustyurt,

Qaydan koʻzlaringda mehr, hayajon?”.

Dedim: “Yuragimda yashaydi Vatan,

Bayrogʻi hilpirab jahon ichinda.

Dasht-u sahrolari, bogʻ-rogʻi bilan,

Umrim lahzalarin tongi, kechinda”.

Toʻrt tomon osuda, hilpirar Bayroq,

Yorugʻ niyatlarning saltanatida.

Balki yoʻq dunyoda mendan baxtliroq,

Yashayman Istiqlol mamlakatida.

Hilpirab turibdi Vatan Bayrogʻi,

Totuvlik irsiyat xalqimga azal.

Mehrdan rang olgan yaqin-yirogʻi,

Tillardan tushmaydi kuy, qoʻshiq, gʻazal.

Or-nomusim mening, obroʻyim mening,

Dunyoga yoʻl ochgan HURlik mayogʻi.

Mardona qadamim, mohroʻyim mening,

O Vatan Bayrogʻi, Vatan Bayrogʻi!

Garmsel shamol ham, tuzli boʻhron ham,

Pisandmas, hilpirab turganda Bayroq.

Mehr-u oqibatni oʻzda etib jam,

Hayotga boqaman yanada quvnoq.

Yarmi sahro yurtda unib-oʻsdim men,

Har bitta giyohin jonimga ekdim.

Shunchaki sevmadim. Yoniq dil bilan

Vatan Bayrogʻini yurakka tikdim!

Asr muammosin yelkalagan xalq –

Sahroyi oʻzimman, menman Qizilqum!

Daryosin yoʻqotgan qirgʻoqlarda talx

Suvlar karvoniga tashna Orolqum!

Mingta Amriqoga alishmayman. Yoʻq!

Kindik qonim tomgan sahro giyohin.

Bayrogʻim hilpirar, mangu koʻngil toʻq.

Simirib yashayman MEHR ziyosin!

Robiya YOʻLDOShEVA.

Shifokor doʻstimga

Bemorning koʻziga bir nazar tashlab,

Shu zahot sezasiz neki dardi bor.

Tomirini ushlab, asta soʻz boshlab,

Shifo berasiz boʻlib najotkor.

Malhamga teng turgay har bir soʻzingiz,

Diqqat-eʼtibordan qalblar charogʻon.

Tabassum-la balqib turgan yuzingiz,

Xastani yetaklar hayotga tomon.

Shifokor boʻlmoqlik mushkuldir gʻoyat,

Burchin bajarmaslik bundan ham ogʻir.

Beparvo, loqaydlik doim Sizga yot,

Shuhrat quchmoqdasiz oqibat-oxir.

Kimdir tutab yashar. Siz esa yonib,

Yashamoq choʻgʻidan qalbga solasiz.

Shifokorlik kasbi gashtiga qonib,

Ishlaysiz, hamisha olqish olasiz.

Nomingiz ulugʻlar qanchalab odam.

Dardi yengillashib, gʻayrati toshar.

Xastalik dardini koʻrgansiz baham,

Shu bois hurmati tobora oshar.

Sizga cheksiz olqish, shon-sharaf boʻlsin.

Begʻubor qalbingiz shodlikka toʻlsin!

Saʼdulla Xoʻjaniyozov.

“Keksalarni eʼzozlash oyligi” munosabati bilan

Otalari urushga ketgan

Onalari yumushga ketgan,

Sut oʻrniga koʻz yoshin yutgan

Goʻdakligi kulgusiz oʻtgan –

Toʻqson, yuzga kirgan otalar,

Ne kunlarni koʻrgan onalar.

Zarba olib koʻp yomonlardan,

Mashriq, magʻrib – har tomonlardan,

Don ajratib choʻp, somonlardan,

Butun chiqqan tegirmonlardan,

Ming bir joni toshdan onalar,

Toʻqson, yuzdan oshgan otalar.

Oftob kuygan palla – mahallar,

Sovuq qotgan chilla mahallar,

Qayda uyqu, allamahallar,

Bunga shohid dala, paykallar,

(Qoʻysak arzir oltin haykallar)

Toʻqson, yuzga kirgan otalar,

Ne kunlarni koʻrgan onalar.

Tilda duo, qalbi imonda,

Ardoqlandi baxtli zamonda,

Yashagaylar yuz yil omonda,

Bugun, YaNGI Oʻzbekistonda,

Elin baxtli koʻrgan onalar,

Yoshday tetik turgan otalar.

Tursunboy ABDULLAYeV.