KASB ShARAFI

Bir donishmanddan:

– Inson qadr-qimmati nimada? – deb soʻrashganida u:

– Izlagan narsasida, – deb javob bergan ekan.

Bundan xulosa shuki, kimki umrini yaxshilik yoʻlida mehnat qilib, odamlarga manfaat yetkazishga sarflasa, eldan unga olqish qaytadi.

Bunday odamlar turli kasb egalari orasida bisyor. Tuman Tibbiyot birlashmasiga qarashli koʻp tarmoqli markaziy poliklinikada patronaj hamshirasi boʻlib ishlayotgan Dilafroʻz Tojimurodova ham kasbiga fidoyiligi, oʻz hududidagi  aholi sogʻlom yashashi yoʻlida qilayotgan halol mehnatlari tufayli obroʻ-eʼtibor qozongan.

U Mangʻit shahridagi 31-sonli maktabda, keyinchalik Nukus shahridagi 1-sonli Tibbiyot kollejida oʻqidi. 2004-yildan beri  tumanimizning Amir Temur nomli ovulidagi “Toza chorvoq” aholi punktida patronaj hamshirasi boʻlib ishlab kelayapti. Hudud aholisining sogʻligini nazorat qilib borish, zarur hollarda shifokor tavsiyasiga koʻra, davo muolajalarini qilish, sogʻlom turmush tarzi afzalliklarini targʻib etish, keksa yoshdagi nuroniylar holidan xabar olib turish, bolalarni kasalliklarga qarshi emlashga jalb etish kabi biri-biridan masʼuliyatli ishlarni u vaqt bilan hisoblashmay, ogʻrinmay ado etadi. Har gal kirib borgan xonadonida uni xuddi oʻzlarining yaqin odamidek quvonib, ochiq chehra bilan kutib olishadi.

Ayni kunlarda Dilafroʻzning xizmat masʼuliyati yana ham ortgan. Mavsumiy kasallik – gripp tarqalishining oldini olish, kasallikka chalinganda qanday yoʻl tutishi lozimligi xususida uyma-uy yurib tushuntirish ishlarini olib borayapti. Shuningdek, keksa yoshdagi otaxon-onaxonlarga davlat tomonidan profilaktika maqsadida beriladigan dori vositalarini ham oʻz vaqtida tarqatishning uddasidan chiqayapti.

Mangʻitda tugʻilib-oʻsgan qiz Amir Temur nomli ovulning 950 nafar aholisiga namunali tibbiy xizmat koʻrsatayotgani uchun ham ularning mehrini qozondi.

D.Tojimurodovaning faoliyatiga nazar solgan odam elga manfaat yetkazish uchun mansab, lavozim shart emasligini, oddiy kasb ham kifoya qilishi mumkinligini anglaydi.

D.Tojimurodova ana shunday masʼuliyatli, mashaqqatli kasbda ishlash bilan birga turmush oʻrtogʻi Alisher Sobirov bilan uch nafar farzandni voyaga yetkazishayapti. Kattasi oliygoh talabasi, qolganlari hali maktab oʻquvchilari.

Namunali patronaj hamshirasi D.Tojimurodovani Tibbiyot xodimlari kuni bilan tabriklab, kasbingizdan kamol topavergaysiz, deymiz.

Oygul RAJABOVA.