КАСБ ШАРАФИ

Бир донишманддан:

– Инсон қадр-қиммати нимада? – деб сўрашганида у:

– Излаган нарсасида, – деб жавоб берган экан.

Бундан хулоса шуки, кимки умрини яхшилик йўлида меҳнат қилиб, одамларга манфаат етказишга сарфласа, элдан унга олқиш қайтади.

Бундай одамлар турли касб эгалари орасида бисёр. Туман Тиббиёт бирлашмасига қарашли кўп тармоқли марказий поликлиникада патронаж ҳамшираси бўлиб ишлаётган Дилафрўз Тожимуродова ҳам касбига фидойилиги, ўз ҳудудидаги  аҳоли соғлом яшаши йўлида қилаётган ҳалол меҳнатлари туфайли обрў-эътибор қозонган.

У Манғит шаҳридаги 31-сонли мактабда, кейинчалик Нукус шаҳридаги 1-сонли Тиббиёт коллежида ўқиди. 2004 йилдан бери  туманимизнинг Амир Темур номли овулидаги “Тоза чорвоқ” аҳоли пунктида патронаж ҳамшираси бўлиб ишлаб келаяпти. Ҳудуд аҳолисининг соғлигини назорат қилиб бориш, зарур ҳолларда шифокор тавсиясига кўра, даво муолажаларини қилиш, соғлом турмуш тарзи афзалликларини тарғиб этиш, кекса ёшдаги нуронийлар ҳолидан хабар олиб туриш, болаларни касалликларга қарши эмлашга жалб этиш каби бири-биридан масъулиятли ишларни у вақт билан ҳисоблашмай, оғринмай адо этади. Ҳар гал кириб борган хонадонида уни худди ўзларининг яқин одамидек қувониб, очиқ чеҳра билан кутиб олишади.

Айни кунларда Дилафрўзнинг хизмат масъулияти яна ҳам ортган. Мавсумий касаллик – грипп тарқалишининг олдини олиш, касалликка чалинганда қандай йўл тутиши лозимлиги хусусида уйма-уй юриб тушунтириш ишларини олиб бораяпти. Шунингдек, кекса ёшдаги отахон-онахонларга давлат томонидан профилактика мақсадида бериладиган дори воситаларини ҳам ўз вақтида тарқатишнинг уддасидан чиқаяпти.

Манғитда туғилиб-ўсган қиз Амир Темур номли овулнинг 950 нафар аҳолисига намунали тиббий хизмат кўрсатаётгани учун ҳам уларнинг меҳрини қозонди.

Д.Тожимуродованинг фаолиятига назар солган одам элга манфаат етказиш учун мансаб, лавозим шарт эмаслигини, оддий касб ҳам кифоя қилиши мумкинлигини англайди.

Д.Тожимуродова ана шундай масъулиятли, машаққатли касбда ишлаш билан бирга турмуш ўртоғи Алишер Собиров билан уч нафар фарзандни вояга етказишаяпти. Каттаси олийгоҳ талабаси, қолганлари ҳали мактаб ўқувчилари.

Намунали патронаж ҳамшираси Д.Тожимуродовани Тиббиёт ходимлари куни билан табриклаб, касбингиздан камол топавергайсиз, деймиз.

Ойгул РАЖАБОВА.