Amudaryo tumanida “Vatanparvar” tashkiloti tashkil qilinganining 30 yilligi munosabati bilan musobaqa oʻtkazildi

Oʻzbekiston Respublikasi mudofaasiga koʻmaklashuvchi “Vatanparvar” tashkiloti mamlakat aholisi, ayniqsa, yoshlarni harbiy-vatanparvarlik, Vatanga sadoqat ruhida tarbiyalash, ularning boʻsh vaqtlarini mazmunli oʻtkazishini taʼminlash, sportning texnik va amaliy turlariga jalb qilish orqali ular oʻrtasida sogʻlom turmush tarzini targʻib qilish hamda ommaviy texnik kasblarga tayyorlash boʻyicha muhim vazifalarni ado etish bilan bir qatorda ehtiyojmand oilalar farzandlarining boʻsh vaqtini mazmunli oʻtishini taʼminlab kelmoqda.

Yaqinda “Vatanparvar” tashkiloti Qoraqalpogʻiston Respublikasi Kengashi tomonidan “Yoshlar daftari” va “Temir daftar”lar roʻyxatiga kiritilgan Beruniy, Toʻrtkoʻl va Ellikqalʼa yoshlari oʻrtasida pnevmatik miltiqdan oʻq otish, biatlon va duatlon sport turlari Qoraqalpogʻiston birinchiligi bahslari oʻtkazildi.

Amudaryo tumanidagi oʻquv-sport texnika klubida “Vatanparvar” tashkiloti tashkil topganining 30 yilligi bayrami munosabati bilan oʻtkazilgan mazkur musobaqa yoshlar oʻrtasida sportning texnik va amaliy turlarini targʻib etish, ularni sogʻlom turmush tarziga oʻrgatish hamda yetakchilik qobiliyatini shakllantirish maqsadida tashkil etildi.

Taʼkidlash joizki, tashkilot tomonidan bugungi kunda Yoshlar ishlari agentligi hamda Bandlik va mehnat munosabatlari vazirligi bilan hamkorlikda mamlakatimizda “Yoshlar daftari” va “Temir daftar”ga kiritilgan yoshlar va ehtiyojmand oilalar farzandlarini ommaviy texnik kasblarga imtiyoz asosida oʻqitilishi yoʻlga qoʻyildi.

Prezidentimizning 2021-yil 20-apreldagi Farmoniga muvofiq, “Vatanparvar” tashkilotining “Avtomototransport haydovchilarini tayyorlash kurslari”da endilikda Mehribonlik uylari tarbiyalanuvchilari ham imtiyoz asosida tahsil olishi mumkin boʻldi. Ana shunday imtiyozlardan foydalangan Xoʻjayli tumanidagi 1-sonli Mehribonlik uyi tarbiyalanuvchilarning 25 nafar joriy yilda Nukus shahridagi oʻquv-sport texnika klubida birinchilar qatorida tahsil olish baxtiga muyassar boʻldi.

Musobaqada faol ishtirok etgan yoshlar oʻrta masofaga yugurish, velosiped haydash hamda pnevmatik miltiqdan oʻq otish shartlarini bajarishdi. Ishtirokchilardagi shijoat, gʻalabaga boʻlgan kuchli ishtiyoq bellashuvlarning soʻnggi soniyalarigacha sezilib turdi.

Musobaqada Oʻzbekiston Respublikasi mudofaasiga koʻmaklashuvchi “Vatanparvar” tashkiloti markaziy Kengashi raisi oʻrinbosari Hasanboy Mahmudov hamda tashkilotning Qoraqalpogʻiston Respublikasi Kengashi raisi Quvvatboy Razbekov ishtirok etdi.

Yakuniy natijalarga koʻra umumjamoa hisobida Qoraqalpogʻiston Respublikasi birinchiligi bahslarida Beruniy tumani yoshlari shohsupaning yuqori pogʻonasidan joy oldi. Ellikqalʼa tumani sharafini himoya qilgan yoshlar musobaqada ikkinchi oʻrinni qoʻlga kiritdi. Uchinchi oʻringa toʻrtkoʻllik yoshlar jamoasi loyiq deb topildi.

Gʻolib va sovrindor yoshlarga hamda jamoalarga diplom, esdalik sovgʻalari topshirildi. Bellashuvlarda birinchi oʻrinlarni qayd etgan yoshlar endilikda musobaqalarning navbatdagi bosqichlariga yoʻllanmani qoʻlga kiritishdi. 

Shimoli-gʻarbiy harbiy okrug matbuot xizmati