Xalq deputatlari Amudaryo tuman kengashining 40-sessiyasi toʻgʻrisida axborot

10-noyabr kuni Xalq deputatlari Amudaryo tuman kengashining navbatdagi 40-sessiyasi boʻlib oʻtdi. Sessiya majlisida tuman hokimi Sultonboy Yoʻldashev, Xalq deputatlari tuman kengashi deputatlari, sektor rahbarlari, tuman hokimi oʻrinbosarlari, hokimlik masʼul xodimlari, huquq-tartibot organlari masʼullari, boʻlimlar, tijorat banklari rahbarlari, fuqarolarning oʻzini oʻzi boshqarish organlari raislari hamda ommaviy axborot vositalari vakillari ishtirok etdilar.

Sessiya kun tartibidagi dastlabki masala – Amudaryo tumanini 2021-yil oktyabr oyida ijtimoiy-iqtisodiy rivojlantirishni reyting baholash koʻrsatkichlari natijalari hamda hudud darajasida hal etiladigan muammolarni bartaraf etish choralari yuzasidan tuman hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari Maʼmurjon Temirboyevning hisoboti tinglandi.

Hisobotda tumanda sanoat ishlab chiqaruvchi korxonalarni tashkil qilish va mavjudlarini kengaytirish, zamonaviy savdo komplekslari va xizmat koʻrsatish sifatini oshirish, mehnat bozorining samaradorligi, iqtisodiyotning raqobatbardoshligi va diversifikatsiyasi koʻrsatkichlari, ishbilarmonlik muhiti va tadbirkorlikni rivojlantirish, mahalliy soliqlarning yigʻuvchanlik koʻrsatkichlari, mahalliy davlat hokimiyati organlarining fuqarolar murojaatlari bilan ishlash samaradorligi va
maʼlumotlarning ochiqligi koʻrsatkichlari boʻyicha 2021-yil yakuniga qadar amalga oshirilish rejalashtirilayotgan chora-tadbirlar hususida keng turda maʼlumot berdi.

Sessiyada Oʻzbekiston Yoshlar ishlari agentligi Amudaryo tumani boʻlimi boshligʻi Jasurbek Davletovning yoshlar faoliyati bilan bogʻliq sohalarda uchrayotgan dolzarb muammo va kamchiliklar hamda ularning yechimi toʻgʻrisidagi masala yuzasidan axboroti tinglandi.

Axborotda tumanda har tomonlama koʻmakka muhtoj 6753 nafar yoshlar “Yoshlar daftari”ga kiritilib, ularni qoʻllab-quvvatlash, bandligini taʼminlash, moddiy, maʼnaviy, ijtimoiy yordam berish borasida amalga oshirilgan keng qamrovli chora-tadbirlar natijasida 6599 nafar yoshlar “Yoshlar daftari”da chiqarilganligi, ayni paytda ular hayotda oʻz oʻrnini topishlari uchun harakat qilayotgani hamda oilasiga daromad olib kelayotgani xususida maʼlumotlar keltirildi.

Shundan soʻng sessiya ishida tuman Ichki ishlar boʻlimi boshligʻining oʻrinbosari Baxtiyar Urazovning tumanda 2021-yil 10 oyi davomida jinoyatchilik va huquqbuzarliklarning oldini olish boʻyicha amalga oshirilayotgan ishlar, shuningdek, sodir etilgan ogʻir va oʻta ogʻir turdagi jinoiy holatlar yuzasidan hisoboti tinglandi.

Hisobotda keltirilishicha, tuman IIB xodimlari tomonidan jamoatchilik vakillari va boshqa masʼul tashkilotlar bilan hamkorlikda muntazam ravishda qator tezkor-profilaktik tadbirlar amalga oshirilayotgan boʻlib, jinoyat va huquqbuzarliklarning oldini olish borasidagi olib borilgan profilaktik tadbirlarga qaramasdan tumanda umumiy jinoyatchilik oʻtgan yilga nisbatan oshgan. Oʻtgan 10 oy davomida oldi olinishi mumkin boʻlgan, mahallalar hududida sodir etilgan jinoyatlar taxlilida 18 ta mahallalar “qizil” toifadagi, 11 ta mahallalar “sariq” toifadagi mahallalarga ajratilib, ularda profilaktik tadbirlar yanada kuchaytirilayotgani, 20 ta mahallalarda oldi olinishi mumkin boʻlgan jinoyatlar sodir etilmagani qayd etildi.

Sessiya kun tartibidagi boʻshagan oʻringa Xalq deputatlari Amudaryo tuman Kengashi deputati saylovini oʻtkazuvchi uchastka saylov komissiyalari aʼzoligiga nomzodlarni tavsiya etish toʻgʻrisidagi masala yuzasidan Xalq deputatlari tuman Kengashining Qonuniylikni taʼminlash va korruptsiyaga qarshi kurashish boʻyicha doimiy komissiyasi raisi Muzaffar Yeshchanov axborot berdi.

Axborotda xalq deputatlari Amudaryo tuman Kengashining boʻshab qolgan 23-Bobur saylov okrugida deputat saylovini oʻtkazish uchun okrug hududida 129-, 130-, 131-, 132-uchastka saylov komissiyalari tuzilishini hisobga olib Z.M.Bobur ovuli va Jumurovul mahalla fuqarolar yigʻinlari kengashining majlislari hamda okrug hududlarida joylashgan umumtaʼlim maktablari jamoalarining yigʻilishlarida uchastka saylov komissiyalari tarkibiga tavsiya qilingan nomzodlar roʻyxati bilan tanishtirildi hamda uchastka saylov komissiyasi aʼzoligiga nomzodlar deputatlar tomonidan maʼqullandi.

Sessiya ishida kun tartibidagi Amudaryo tumani xalq taʼlimi boʻlimiga qarashli 76-sonli hamda 87-sonli maktablarda boʻsh (vakant) direktor lavozimiga oʻtkazilgan tanlov yakunlari boʻyicha nomzodlarga kelishim berish masalasi ham koʻrib chiqildi. Deputatlar 76-sonli umumiy oʻrta taʼlim maktabi direktori lavozimiga nomzod Davronbek Ruzmetov va 87-sonli umumiy oʻrta taʼlim maktabi direktori lavozimiga nomzod Samad Djallayevlarning kelgusi 3-yilda amalga oshiradigan ishlari boʻyicha dasturlarini tingladilar.

Nomzodlarning dasturlari oʻqib eshittirilganidan soʻng Qoraqalpogʻiston Respublikasi Xalq taʼlimi vazirligi tomonidan tavsiya qilingan nomzodlarga kelishim berish boʻyicha yashirin ovoz berish jarayoni tashkil etildi. Dastlab deputatlar orasidan sanoq komissiyasi tuzildi va yashirin ovoz berish byulletenlari tarqatildi. Ovoz berish yakunlariga koʻra Qoraqalpogʻiston Respublikasi Xalq taʼlimi vazirligining Amudaryo tumani xalq taʼlimi boʻlimiga qarashli 76-sonli umumiy oʻrta taʼlim maktabi direktori lavozimiga Davronbek Roʻzmetovni hamda 87-sonli umumiy oʻrta taʼlim maktabi direktori lavozimiga Samad Djallayevni tayinlash toʻgʻrisidagi tavsiyasiga kelishim berish yuzasidan tegishli qaror qabul qilindi.

Sessiya kun tartibiga kiritilgan barcha masalalar atroflicha koʻrib chiqilib, ular yuzasidan deputatlar va sessiya ishtirokchilarining fikr-mulohazalari tinglandi hamda hisobotlar va axborotlar yuzasidan berilgan savollarga tegishlicha javoblar qaytarildi. Shuning bilan sessiya oʻz ishini yakunladi.

Tuman hokimligining Axborot xizmati.