MAShHUR SPORTChILAR AMUDARYoDA SPORTChI-YoShLAR BILAN UChRAShIB, MAHORAT DARSLARINI OʻTKAZIShDI

21-oktyabr kuni dzyu-do boʻyicha Oʻzbekiston terma jamoasi bosh treneri, “Tokio - 2020” olimpiya oʻyinlari ishtirokchilari va boshqa nufuzli mehmonlar Amudaryo tumani Bolalar-oʻsmirlar sport maktabida sportchi yoshlar bilan uchrashib, mahorat darslarini oʻtkazdilar.

Joriy yilning 21-oktyabr sanasida uch karra jahon chempioni va sovrindori, dzyu-do boʻyicha Oʻzbekiston terma jamoasi bosh treneri, mashhur sportchi Ilyas Iladis, jahon chempionati sovrindori, “Tokio - 2020” olimpiya oʻyinlari bronza medali sohibi Davlat Babanov, Xalqaro turnirlar gʻolibi, “Tokio - 2020” olimpiya oʻyinlari ishtirokchisi Bekmurat Oltiboyev, “Rio - 2016” olimpiya oʻyinlari bronza medali sohibi Diyorbek Oʻrozboyev, Oʻzbekiston terma jamoasi bosh treneri Ulugʻbek Azizov, Oʻzbekiston terma jamoasi treneri Farhod Toʻrayev, Jahon  chempionati kumush medali sohibi Sharofiddin Lutfullayev, Xalqaro turnirlar gʻolibi Muhammadkrim Xurramov, Oʻzbekiston Dzyu-do Federatsiyasi raisi oʻrinbosari Eldor Qahhorov hamda hamyurtimiz, Xalqaro turnirlar gʻolibi, “Tokio - 2020” olimpiya oʻyinlari ishtirokchisi Sharofaddin Boltaboyevlar Amudaryo tumaniga tashrif buyurdilar.

Mashhur sportchilar guruhini tuman hokimi Sultonboy Yoʻldashev  va boshqa masʼullar samimiy kutib oldilar.

Aytish kerakki, amudaryolik dzyu-do kurashi ustasi, dzyu-do boʻyicha Oʻzbekiston terma jamoasi aʼzosi, Xalqaro turnirlar gʻolibi va “Tokio - 2020” olimpiya oʻyinlari ishtirokchisi Sharofaddin Boltaboyev jahonning turli hududlarida boʻlib oʻtgan musobaqalarda gʻalabalarga erishgan sportchilardan biri. Uning gʻalabalari sharafiga jahonning eng nufuzli shaharlarida boʻlib oʻtgan musobaqalarda Oʻzbekiston bayrogʻi koʻtarilganini nafaqat Oʻzbekiston, balki jahon dzyu-do ishqibozlari juda yaxshi bilishadi.

Sharofaddin Boltaboyev sportdagi ilk qadamini tuman Bolalar-oʻsmirlar sport maktabi toʻgaraklaridan boshlagan. Uning uchun bu maskan hamisha qadrli. Ayni paytda Oʻzbekiston terma jamoasi tarkibida faoliyat yuritayotgan Sharofaddin Boltaboyev har gal oʻzi tugʻlib oʻsgan ona shahri – Mangʻitga kelganida Bolalar-oʻsmirlar sport maktabi toʻgaraklarida shugʻullanayotgan sportchi-yoshlar bilan uchrashib, mahorat darslarini tashkil etadi. Sharofaddinning bu galgi tashrifi nafaqat uning oʻzi, balki Bolalar-oʻsmirlar sport maktabi murabbiylari va dzyu-do kurashi toʻgaragi aʼzolari uchun ham yorqin taassurotlarga boy boʻldi.

Sportchilarni kutib olish marosimida tuman Bolalar-oʻsmirlar sport maktabi direktori Chorsham Tojimurodov, tumanimizning faxriy sportchilari va yoshlar ishtirok etishdi.

Tuman hokimi Sultonboy Yoʻldashev tumanimizga tashrif buyurgan mashhur sportchilarni “Tokio - 2020” olimpiya oʻyinlaridagi gʻalabalari, muvaffaqiyatli ishtirok etganlari hamda xalqaro turnirlarda erishgan yutuqlari bilan tabrikladi.

Shundan soʻng, mehmonlar tuman Bolalar-oʻsmirlar sport maktabi sportchilari erishayotgan yutuqlar aks etgan koʻrgazma bilan yaqindan  tanishdilar va tumanimizdan yetishib chiqqan turli xalqaro turnirlar va jahon chemionatlari sovrindorlari boʻlgan faxriy sportchilar hamda  sport maktabi tarbiyalanuvchilari  bilan samimiy suhbatda boʻldilar.

Faxriy sportchilar va Bolalar-oʻsmirlar sport maktabi tarbiyalanuvchilari mehmonlarga oʻzlarini qiziqtirgan savollar bilan murojaat qildilar. Qiziqarli savol-javoblar va samimiy suhbatdan soʻng mehmon sportchilar Bolalar-oʻsmirlar sport maktabi dzyu-do sporti toʻgaraklari shugʻullanuvchilari uchun mahorat darslarini oʻtkazishdi.

Mahorat darslari jarayonida sport maktabi tarbiyalanuvchilari dzyu-do sporti sirlari bilan yanada yaqinroq tanishdilar. Shu bilan birga, jahon chempionati sovrindori, “Tokio - 2020” olimpiya oʻyinlari bronza medali sohibi Davlat Babanov, Jahon chempionati kumush medali sohibi Sharofiddin Lutfullayev, “Rio – 2016”  olimpiya oʻyinlari bronza medali sohibi Diyorbek Oʻrozboyevlarning kurash usullari haqida maʼlumotga ega boʻldilar.

Ayniqsa, uch karra jahon chempioni, olimpiya  oʻyinlari chempioni va sovrindori, Oʻzbekiston terma jamoasi bosh treneri Ilyas Iliadis, Oʻzbekiston yoshlar terma jamoasi bosh treneri Ulugʻbek Azizov, Oʻzbekiston terma jamoasi treneri Farhod Toʻrayev, Oʻzbekiston dzyu-do Federatsiyasi raisi oʻrinbosari Eldor Qahhorov, taniqli sportchilar Muhammadkarim Xurramov va Bekmurat Oltiboyev, shuningdek, hamyurtimiz Sharofaddin Boltaboyevlar bilan dildan, samimiy suhbat qurdilar.

Mahorat darslaridan soʻng mashhur sportchilarga tuman hokimining sovgʻalari topshirildi.

Boʻlib oʻtgan uchrashuv va mahorat darslari Bolalar-oʻsmirlar sport maktabining yosh sportchilarida katta taassurotlar qoldirdi.

Robiya YOʻLDOShEVA.