Imkoniyati cheklangan yoshlar oʻrtasida shaxmat-shashka sport musobaqasi oʻtkazildi

Mamlakatimizda nogironligi boʻlgan shaxslarning huquq va manfaatlarini himoya qilish eng ustuvor masalalardan biri hisoblanadi. Soʻnggi yillarda ijtimoiy himoyaga muhtoj aholini qoʻllab-quvvatlashga alohida eʼtibor qaratilib, bu masala davlat siyosati darajasiga koʻtarildi.

Aholining ushbu qatlamini manzilli ijtimoiy himoya qilish, keksalar, pentsionerlar, nogironligi boʻlgan bolalar va kattalarga tibbiy-ijtimoiy yordamning barqaror tizimini yaratish ishlari jadal davom etmoqda. Oʻzbekiston Respublikasining «Nogironligi boʻlgan shaxslarning huquqlari toʻgʻrisida»gi yangi Qonun nogironligi boʻlgan shaxslarni davlat tomonidan qoʻllab-quvvatlash tizimini tubdan takomillashtirishda muhim huquqiy asos boʻldi.

2021-yil 8-oktyabr kuni Amudaryo tumani muhandislik texnikumida Oʻzbekiston Respublikasi Nogironlar jamiyati tuman boʻlinmasi tashabbusi bilan imkoniyati cheklangan, individual taʼlim olayotgan 12-17 yosh oʻquvchilar oʻrtasida ularning sport va jismoniy tarbiyaga qiziqishlarini yanada oshirish, hayotda oʻz oʻrnini topishlariga koʻmaklashish maqsadida tadbir hamda sportning shaxmat-shashka turlari boʻyicha sport musobaqasi oʻtkazildi.

Tadbirda Oʻzbekiston Xalq demokratik partiyasi tuman kengashi raisi Maqsud Saʼdullayev, tuman hokimligining jamoat va diniy tashkilotlar bilan aloqalar boʻyicha mutaxassisi Dilmurod Rahimov, Oʻzbekiston Yoshlar ishlari agentligi tuman boʻlimi boshligʻi Jasur Davletov, tuman Xalq taʼlimi boʻlimi psixolog-metodisti Jasorat Atajonov, shaxmat-shashka sport oʻyinlarini kuzatib boruvchi sport murabbiysi Zafarbek Qurbonov, tuman Nogironlar jamiyati raisi Nilufar Xolboyevalar hamda jamiyat aʼzolari ishtirok etdilar.

Tadbirda soʻzga chiqqan tuman Nogironlar jamiyati raisi Nilufar Xolboyeva mamlakatimizda imkoniyati cheklangan yoshlarni har tomonlama qoʻllab-quvvatlashga, ularga jamiyatda oʻz oʻrinlarini topishlariga koʻmaklashishga alohida eʼtibor qaratilayotgani hamda bu borada keng imkoniyatlar va shart-sharoitlar yaratilayotgani xususida soʻz yuritdi.

Shuningdek, tadbirda soʻzga chiqqanlar sportning inson salomatligi uchun, ayniqsa, shaxmat-shashka sport turi inson aqliy faoliyatini mustahkamlashda muhim ahamiyatga ega ekanligini taʼkidlab, oʻquvchilarni sport va jismoniy tarbiya bilan muntazam shugʻullanib borishlariga daʼvat qildilar hamda oldindagi shaxmat-shashka musobaqasida oʻquvchilarga omad tiladilar.

Shaxmat-shashka sport oʻyinlari baxs-munozara boy hamda murosasiz tarzda oʻtdi. Oʻquvchilar gʻoliblikni qoʻlga kiritish uchun astoydil intildilar. Musobaqalar yakunida ishtirokchilar hamda gʻoliblar masʼullar tomonidan diplom hamda esdalik sovgʻalari bilan taqdirlandilar.

Taʼkidlash kerakki, bu kabi uchrashuvlar hamda sport oʻyinlarning tashkil etilishi, imkoniyati cheklangan yoshlarning individual qobiliyatlarini yuzaga chiqarishlariga, oʻziga boʻlgan ishonchlarini yanada mustahkamlashga xizmat qilishi, shubhasiz.

Tuman hokimligining Axborot xizmati.