Имконияти чекланган ёшлар ўртасида шахмат-шашка спорт мусобақаси ўтказилди

Мамлакатимизда ногиронлиги бўлган шахсларнинг ҳуқуқ ва манфаатларини ҳимоя қилиш энг устувор масалалардан бири ҳисобланади. Сўнгги йилларда ижтимоий ҳимояга муҳтож аҳолини қўллаб-қувватлашга алоҳида эътибор қаратилиб, бу масала давлат сиёсати даражасига кўтарилди.

Аҳолининг ушбу қатламини манзилли ижтимоий ҳимоя қилиш, кексалар, пенционерлар, ногиронлиги бўлган болалар ва катталарга тиббий-ижтимоий ёрдамнинг барқарор тизимини яратиш ишлари жадал давом этмоқда. Ўзбекистон Республикасининг «Ногиронлиги бўлган шахсларнинг ҳуқуқлари тўғрисида»ги янги Қонун ногиронлиги бўлган шахсларни давлат томонидан қўллаб-қувватлаш тизимини тубдан такомиллаштиришда муҳим ҳуқуқий асос бўлди.

2021 йил 8 октябрь куни Амударё тумани муҳандислик техникумида Ўзбекистон Республикаси Ногиронлар жамияти туман бўлинмаси ташаббуси билан имконияти чекланган, индивидуал таълим олаётган 12-17 ёш ўқувчилар ўртасида уларнинг спорт ва жисмоний тарбияга қизиқишларини янада ошириш, ҳаётда ўз ўрнини топишларига кўмаклашиш мақсадида тадбир ҳамда спортнинг шахмат-шашка турлари бўйича спорт мусобақаси ўтказилди.

Тадбирда Ўзбекистон Халқ демократик партияси туман кенгаши раиси Мақсуд Саъдуллаев, туман ҳокимлигининг жамоат ва диний ташкилотлар билан алоқалар бўйича мутахассиси Дилмурод Раҳимов, Ўзбекистон Ёшлар ишлари агентлиги туман бўлими бошлиғи Жасур Давлетов, туман Халқ таълими бўлими психолог-методисти Жасорат Атажонов, шахмат-шашка спорт ўйинларини кузатиб борувчи спорт мураббийси Зафарбек Қурбонов, туман Ногиронлар жамияти раиси Нилуфар Холбоевалар ҳамда жамият аъзолари иштирок этдилар.

Тадбирда сўзга чиққан туман Ногиронлар жамияти раиси Нилуфар Холбоева мамлакатимизда имконияти чекланган ёшларни ҳар томонлама қўллаб-қувватлашга, уларга жамиятда ўз ўринларини топишларига кўмаклашишга алоҳида эътибор қаратилаётгани ҳамда бу борада кенг имкониятлар ва шарт-шароитлар яратилаётгани хусусида сўз юритди.

Шунингдек, тадбирда сўзга чиққанлар спортнинг инсон саломатлиги учун, айниқса, шахмат-шашка спорт тури инсон ақлий фаолиятини мустаҳкамлашда муҳим аҳамиятга эга эканлигини таъкидлаб, ўқувчиларни спорт ва жисмоний тарбия билан мунтазам шуғулланиб боришларига даъват қилдилар ҳамда олдиндаги шахмат-шашка мусобақасида ўқувчиларга омад тиладилар.

Шахмат-шашка спорт ўйинлари бахс-мунозара бой ҳамда муросасиз тарзда ўтди. Ўқувчилар ғолибликни қўлга киритиш учун астойдил интилдилар. Мусобақалар якунида иштирокчилар ҳамда ғолиблар масъуллар томонидан диплом ҳамда эсдалик совғалари билан тақдирландилар.

Таъкидлаш керакки, бу каби учрашувлар ҳамда спорт ўйинларнинг ташкил этилиши, имконияти чекланган ёшларнинг индивидуал қобилиятларини юзага чиқаришларига, ўзига бўлган ишончларини янада мустаҳкамлашга хизмат қилиши, шубҳасиз.

Туман ҳокимлигининг Ахборот хизмати.