Jayxun ilhomlari

Kuz xayollari

Kuzda... maʼyus hislar choʻkar dillarga,

Mungʻaygan, xazonrez bogʻlarni kezdim.

Qushlar uchib borar issiq ellarga,

Ularning kuyida gʻamginlik sezdim.

 

Bahorning elchisi – mahzun qushlarim,

Kuzda olib keting, qaygʻu-gʻamlarni.

Sizlarni sogʻinib kechgay tushlarim,

Koʻklamda keltiring shodli damlarni.

 

Kuz-qish oʻtib, bahor qaytar begumon,

Yoz ham kelar, koʻnglim, tushkunlikdan kech,

Faslning kuziga yetdik-ku, omon,

Hayotning kuziga yetmagaymiz hech.

Oʻrozali REYIMOV,

“Jayxun ilhomlari” NNT raisi.

 

Bizlarga ibrat Ustoz

(S.Xoʻjaniyozovga)

Sakson yoshni qarshilasa-da,

Hali hamon ijod qoʻynida.

Ustozga xos mehnatsevarlik,

Bizga ibrat hayotimizda.

 

Hikmatga boy fardlar bitar u,

Ijodidan oldik ibratlar.

Adabiyot – hayot, deyar u,

Aslo oʻchmas tarix, deyar u.

 

Sakson yoshga kirib ham tetik,

Doim gʻolib mushoirada.

Yoshlar kabi doim qaddi tik.

Oʻrni maʼlum har bir davrada.

 

Yaxshiliklar qilasiz Ustoz,

Katta-kichik qiladi taʼzim.

Shogirdlarga qanotsiz, parvoz,

Sizsiz oʻtmas hech sheʼriy bazm,

Zuhra Ahmedova.

 

Ustoz barhayot

(Ustozimiz E.Oʻrinboyev xotirasiga)

Bizlar uchun ulugʻ, inson edingiz,

Qaygʻurib har qachon, gʻamlar yedingiz.

Olim boʻlma, odam boʻlgin dedingiz,

Joyingiz jannatda, boʻlgay, ustozim,

Qabringiz nurlarga toʻlgay, ustozim.

 

Xotirlash savobdir, shogirdlar ishi,

Otadek azizdir, ustoz har kishi.

Qalblarda yashaydi, bahor, yoz, qishi,

Joyingiz jannatda boʻlgay, ustozim,

Qabringiz nurlarga toʻlgay, ustozim.

 

Qadri baland boʻlgan ustoz oʻzingiz,

Noyob-durdonalar edi soʻzingiz.

Endi topilmaydi bosgan, izingiz,

Joyingiz jannatda boʻlgay, ustozim,

Qabringiz nurlarga toʻlgay, ustozim.

 

Davrada yurdingiz, doim nur sochib,

Pand-u nasihatdan gap-soʻzlar ochib.

Boʻlmas ekan – taqdir, ajaldan qochib,

Joyingiz jannatda boʻlgay, ustozim,

Qabringiz nurlarga toʻlgay, ustozim.

 

Shogirdingiz Nurbek, doim qilar yod,

Ruhingiz shod boʻlsin, qabringiz obod.

Qalbimda ustozim, borsiz, barhayot,

Joyingiz jannatda boʻlgay, ustozim,

Qabringiz nurlarga toʻlgay, ustozim.

Shomurod XOʻJANOV,

Doʻrman ovuli. 

 

Vatan haqida soʻz

Yuragimga tutashgan mehring,

Ona Vatan, sirlisan menga.

Tortaverar issiq quchogʻing,

Jonim tutash jonday yeringga.

 

Chilpiq, Amu, Orol dengizi,

Eng qadrli boyligim oʻzing.

Sen jirovning jirlagan sozi,

Jonim fido, aylayin oʻzim.

 

Ota-bobom ot surgan yerda,

Urugʻ-aymoq oʻtgan mard, suluv.

Biz kim? Soʻrasalar agarda,

Ildizimiz jonajon Amu!

Navbahor Sarsenboyeva,

3-sonli maktab oʻquvchisi.

 

Ustozimga

Bagʻringizga olib, mehrga toʻlib,

Shogirdlar boshini suyib, silaysiz.

Sinovlarga toʻla hayot yoʻlida,

Ota-onamizday baxtni tilaysiz.

Oltinoy Yoʻldosheva,

6-sonli maktab oʻquvchisi.

 

VATAN OLDIDAGI BURCh

Muqaddas bu zaminda,

Toʻplaymiz katta kuch,

Xalq ishonchini oqlash,

Vatan oldidagi burch.

 

Oʻqiymiz, oʻrganamiz,

Toʻqiymiz, yaratamiz.

Mehrimiz qaratamiz,

Oʻzbekiston uchun biz.

 

Bizga bergani uchun,

Musaffo tinch osmonni.

Himoya qilishdek kuch,

Vatan  oldidagi burch.

 

Katta boʻlib ulgʻaysak,

Boʻlaylik yurt posboni.

Himoyasiz qolmagay,

Oʻzbekiston qoʻrgʻoni.

Jumagul Adamboyeva,

75-sonli maktab oʻquvchisi.

 

Sinfdoshlarim

Mening sinfdoshlarim,

Oʻn toʻqqiz oʻgʻil-qizlar.

Bari fikrdoshlarim,

Sinf toʻla yulduzdir.

 

Barcha fandan bilagʻon,

Asaloy, Shabnam, Asror.

Dilshodbek, Dilraboxon,

Yana qancha doʻstlar bor.

 

Fizika-matematika,

Jon-u dili ularning

Botir-u Sanʼatbekka,

Havasi bor barchaning.

 

Oʻqib, bilim olamiz,

Faqat olgʻa yuramiz.

Yangi Oʻzbekistonni,

Ilm bilan quramiz.

Dilnura Sobirboyeva,

24-sonli maktabning

7-sinf oʻquvchisi.

 

Chin doʻst mehr beradi

Doʻstim koʻp, deb kerilma,

Sodiqlari kam boʻlar.

Bugun doʻstingman, deya,

Ertaga xanjar urar.

 

Toʻgʻri, bugun doʻstingdir,

Ertaga boʻlar tanish.

Baʼzan boʻlib qoladi,

Indiniga notanish.

 

Doʻsting boʻlib yuradi,

Biror maqsad yoʻlida.

Chin doʻst mehr beradi,

Yaxshilikdir dilida,

Shahinoy Shomurodova,

40-sonli maktab oʻquvchisi.

 

Mehribonim ustozim

Fan bogʻining bogʻboni,

Mehribonim ustozim,

Yoʻllarim charogʻboni,

Xush zabonim ustozim.

 

Soʻzingiz hikmatga boy,

Qoʻllagansiz parvozim.

Bir umr qarzdorman,

Jonajonim, ustozim.

Aziza JUMABOYeVA,

6-sonli maktab oʻquvchisi.

 

Ustozimiz

Farida muallimga

Bizga ochib koʻnglingiz,

Bolangizday koʻrasiz.

Yoʻlga solib barchamiz,

Yashaysiz doim Ustoz!

 

Minnatdormiz biz Sizdan,

Ezgulik kuting bizdan.

Yuramiz izingizdan,

Aziz Farida Ustoz!

 

Har soʻzingiz zoʻr ilm,

Olamiz har kun taʼlim.

Bilimning oʻrni maʼlum,

Faridaxon muallim!

Muhabbat Oʻrinbosarova,

3-sonli maktab oʻquvchisi.