Жайхун илҳомлари

Куз хаёллари

Кузда... маъюс ҳислар чўкар дилларга,

Мунғайган, хазонрез боғларни кездим.

Қушлар учиб борар иссиқ элларга,

Уларнинг куйида ғамгинлик сездим.

 

Баҳорнинг элчиси – маҳзун қушларим,

Кузда олиб кетинг, қайғу-ғамларни.

Сизларни соғиниб кечгай тушларим,

Кўкламда келтиринг шодли дамларни.

 

Куз-қиш ўтиб, баҳор қайтар бегумон,

Ёз ҳам келар, кўнглим, тушкунликдан кеч,

Фаслнинг кузига етдик-ку, омон,

Ҳаётнинг кузига етмагаймиз ҳеч.

Ўрозали РЕЙИМОВ,

“Жайхун илҳомлари” ННТ раиси.

 

Бизларга ибрат Устоз

(С.Хўжаниёзовга)

Саксон ёшни қаршиласа-да,

Ҳали ҳамон ижод қўйнида.

Устозга хос меҳнатсеварлик,

Бизга ибрат ҳаётимизда.

 

Ҳикматга бой фардлар битар у,

Ижодидан олдик ибратлар.

Адабиёт – ҳаёт, деяр у,

Асло ўчмас тарих, деяр у.

 

Саксон ёшга кириб ҳам тетик,

Доим ғолиб мушоирада.

Ёшлар каби доим қадди тик.

Ўрни маълум ҳар бир даврада.

 

Яхшиликлар қиласиз Устоз,

Катта-кичик қилади таъзим.

Шогирдларга қанотсиз, парвоз,

Сизсиз ўтмас ҳеч шеърий базм,

Зуҳра Аҳмедова.

 

Устоз барҳаёт

(Устозимиз Э.Ўринбоев хотирасига)

Бизлар учун улуғ, инсон эдингиз,

Қайғуриб ҳар қачон, ғамлар едингиз.

Олим бўлма, одам бўлгин дедингиз,

Жойингиз жаннатда, бўлгай, устозим,

Қабрингиз нурларга тўлгай, устозим.

 

Хотирлаш савобдир, шогирдлар иши,

Отадек азиздир, устоз ҳар киши.

Қалбларда яшайди, баҳор, ёз, қиши,

Жойингиз жаннатда бўлгай, устозим,

Қабрингиз нурларга тўлгай, устозим.

 

Қадри баланд бўлган устоз ўзингиз,

Ноёб-дурдоналар эди сўзингиз.

Энди топилмайди босган, изингиз,

Жойингиз жаннатда бўлгай, устозим,

Қабрингиз нурларга тўлгай, устозим.

 

Даврада юрдингиз, доим нур сочиб,

Панд-у насиҳатдан гап-сўзлар очиб.

Бўлмас экан – тақдир, ажалдан қочиб,

Жойингиз жаннатда бўлгай, устозим,

Қабрингиз нурларга тўлгай, устозим.

 

Шогирдингиз Нурбек, доим қилар ёд,

Руҳингиз шод бўлсин, қабрингиз обод.

Қалбимда устозим, борсиз, барҳаёт,

Жойингиз жаннатда бўлгай, устозим,

Қабрингиз нурларга тўлгай, устозим.

Шомурод ХЎЖАНОВ,

Дўрман овули. 

 

Ватан ҳақида сўз

Юрагимга туташган меҳринг,

Она Ватан, сирлисан менга.

Тортаверар иссиқ қучоғинг,

Жоним туташ жондай ерингга.

 

Чилпиқ, Аму, Орол денгизи,

Энг қадрли бойлигим ўзинг.

Сен жировнинг жирлаган сози,

Жоним фидо, айлайин ўзим.

 

Ота-бобом от сурган ерда,

Уруғ-аймоқ ўтган мард, сулув.

Биз ким? Сўрасалар агарда,

Илдизимиз жонажон Аму!

Навбаҳор Сарсенбоева,

3-сонли мактаб ўқувчиси.

 

Устозимга

Бағрингизга олиб, меҳрга тўлиб,

Шогирдлар бошини суйиб, силайсиз.

Синовларга тўла ҳаёт йўлида,

Ота-онамиздай бахтни тилайсиз.

Олтиной Йўлдошева,

6-сонли мактаб ўқувчиси.

 

ВАТАН ОЛДИДАГИ БУРЧ

Муқаддас бу заминда,

Тўплаймиз катта куч,

Халқ ишончини оқлаш,

Ватан олдидаги бурч.

 

Ўқиймиз, ўрганамиз,

Тўқиймиз, яратамиз.

Меҳримиз қаратамиз,

Ўзбекистон учун биз.

 

Бизга бергани учун,

Мусаффо тинч осмонни.

Ҳимоя қилишдек куч,

Ватан  олдидаги бурч.

 

Катта бўлиб улғайсак,

Бўлайлик юрт посбони.

Ҳимоясиз қолмагай,

Ўзбекистон қўрғони.

Жумагул Адамбоева,

75-сонли мактаб ўқувчиси.

 

Синфдошларим

Менинг синфдошларим,

Ўн тўққиз ўғил-қизлар.

Бари фикрдошларим,

Синф тўла юлдуздир.

 

Барча фандан билағон,

Асалой, Шабнам, Асрор.

Дилшодбек, Дилрабохон,

Яна қанча дўстлар бор.

 

Физика-математика,

Жон-у дили уларнинг

Ботир-у Санъатбекка,

Ҳаваси бор барчанинг.

 

Ўқиб, билим оламиз,

Фақат олға юрамиз.

Янги Ўзбекистонни,

Илм билан қурамиз.

Дилнура Собирбоева,

24-сонли мактабнинг

7-синф ўқувчиси.

 

Чин дўст меҳр беради

Дўстим кўп, деб керилма,

Содиқлари кам бўлар.

Бугун дўстингман, дея,

Эртага ханжар урар.

 

Тўғри, бугун дўстингдир,

Эртага бўлар таниш.

Баъзан бўлиб қолади,

Индинига нотаниш.

 

Дўстинг бўлиб юради,

Бирор мақсад йўлида.

Чин дўст меҳр беради,

Яхшиликдир дилида,

Шаҳиной Шомуродова,

40-сонли мактаб ўқувчиси.

 

Меҳрибоним устозим

Фан боғининг боғбони,

Меҳрибоним устозим,

Йўлларим чароғбони,

Хуш забоним устозим.

 

Сўзингиз ҳикматга бой,

Қўллагансиз парвозим.

Бир умр қарздорман,

Жонажоним, устозим.

Азиза ЖУМАБОЕВА,

6-сонли мактаб ўқувчиси.

 

Устозимиз

Фарида муаллимга

Бизга очиб кўнглингиз,

Болангиздай кўрасиз.

Йўлга солиб барчамиз,

Яшайсиз доим Устоз!

 

Миннатдормиз биз Сиздан,

Эзгулик кутинг биздан.

Юрамиз изингиздан,

Азиз Фарида Устоз!

 

Ҳар сўзингиз зўр илм,

Оламиз ҳар кун таълим.

Билимнинг ўрни маълум,

Фаридахон муаллим!

Муҳаббат Ўринбосарова,

3-сонли мактаб ўқувчиси.