NAMUNALIKLAR SARBALAND “OQ OLTIN” XIRMONI KOʻTARILIShIGA HISSA QOʻShIShMOQDA

Ayni kunlarda yurtimizning barcha hududlarida paxta yigʻim-terimi qizgʻin tusda davom etmoqda. Dalalarda yetishtirilgan moʻl hosil fermer xoʻjaliklar ishchilari va hasharchilar yordamida yigʻib-terib olinmoqda.

Amudaryolik dehqonlar ham erta bahordan yerga urugʻ qadab, unib chiqqan nihollarni oʻz vaqtida sifatli parvarish qilib, moʻl hosil toʻplashga erishdilar. Bu yilgi mavsumda tumandagi 350 ta fermer xoʻjaliklariga qarashli 15 ming 30 gektar maydonda 46 ming 550 tonna paxta xomashyosini yetishtirish rejalashtirilgan. Sarbaland “oq oltin” xirmonini bunyod etish maqsadida paxta terimi uyushqoqlik bilan tashkil etildi. Fermer xoʻjaliklaridagi 290 ta terim otryadlarida 23 ming 266 nafar terimchilar dalalardagi oq oltinni nest-nobud qilmasdan yigʻib olishmoqda.

Paxta hosilini sifatli va tez fursatlarda yigʻishtirib olish maqsadida Namuna mahallasi hududidagi fermer xoʻjaligi ishchilari, uyushmagan aholidan tashkil qilingan terim otryadlari jonbozlik koʻrsatishmoqda. Terimchilar qulay ob-havo sharoitidan foydalanib, “oq oltin” xirmonining yanada baland boʻlishiga oʻzlarining hissalarini qoʻshishmoqda.

Hududdagi 7 ta fermer xoʻjaligida 362 gektar yerga chigit qadaldi. “Dostonbek-Zebo”, “Murodbek-Zebo”, “Sobir Eshchon” kabi ilgʻor fermer xoʻjaliklari ekin maydonlarida oʻz vaqtida amalga oshirilgan agrotexnik tadbirlar natijasida gʻoʻza nihollari tekis unib chiqdi. Vegetatsiya davrida barcha agrotexnik tadbirlar sifatli va oʻz vaqtida amalga oshirildi. Jumladan, gʻoʻza nihollarini yagonalash, qator oralariga ishlov berish, begona oʻtlardan tozalash, sugʻorish va oziqlantirish, defoliatsiya va chekanka qilish kabi tadbirlar malakali mutaxassislarning tavsiyalari va dehqonlarimizning koʻp yillik tajribalari asosida sifatli amalga oshirildi.

Olimboy Jumaniyozov boshchiligidagi “Dostonbek-Zebo” fermer xoʻjaligida 35 gektar yerga “Sulton” navli paxta ekilgan boʻlib, 35 nafar pudratchi tomonidan yetishtirilgan moʻl hosildan 107 tonna oʻrniga 125-130 tonna topshirish rejalashtirilgan. Shuningdek, Mansur Eshchonov rahbarligidagi “Murodbek-Zebo” fermer xoʻjaligida esa 38 gektar yerda paxta parvarish qilindi. Xoʻjalik terimchilari yetishtirilgan hosilni uyushqoqlik bilan terib olib, 124 tonna oq oltin topshirishni moʻljallashgan.

Sobir Xudoyberganov boshqarayotgan “Sobir eshchon” fermer xoʻjaligida 80 gektar yerga ham “Sulton” navli paxta urugʻi ekilib, moʻl hosil toʻplashga erishildi. Ayni kunlarda xoʻjalik dalalarida terimchilar paxta yigʻim-terimida faollik koʻrsatishmoqda va rejalarni ortigʻi bilan uddalab, daromadga ega boʻlishni koʻzlashmoqda.

Bu yilgi yigʻim-terim mavsumida karantin talablariga rioya qilinishi, majburiy mehnatga yoʻl qoʻymaslik, bolalar mehnatidan foydalanmaslik hamda oʻz vaqtida terim pullarini tarqatilishiga alohida eʼtibor qaratilmoqda.

Namunaliklar tumanimizda sarbaland “oq oltin” xirmoni yaratilishiga munosib hissa qoʻshishmoqda. Oʻz navbatida terimchilar uchun ham barcha sharoitlar yaratilib, dala boshida issiq ovqatlar tashkil qilinmoqda. Ularning madaniy hordiq chiqarishi uchun sharoit yaratilgani, terim pullarining oʻz vaqtida, dala boshida berib borilayotgani  terim surʼatini oshirishda muhim omil boʻlmoqda.

Ozoda Xudoyberganova.