НАМУНАЛИКЛАР САРБАЛАНД “ОҚ ОЛТИН” ХИРМОНИ КЎТАРИЛИШИГА ҲИССА ҚЎШИШМОҚДА

Айни кунларда юртимизнинг барча ҳудудларида пахта йиғим-терими қизғин тусда давом этмоқда. Далаларда етиштирилган мўл ҳосил фермер хўжаликлар ишчилари ва ҳашарчилар ёрдамида йиғиб-териб олинмоқда.

Амударёлик деҳқонлар ҳам эрта баҳордан ерга уруғ қадаб, униб чиққан ниҳолларни ўз вақтида сифатли парвариш қилиб, мўл ҳосил тўплашга эришдилар. Бу йилги мавсумда тумандаги 350 та фермер хўжаликларига қарашли 15 минг 30 гектар майдонда 46 минг 550 тонна пахта хомашёсини етиштириш режалаштирилган. Сарбаланд “оқ олтин” хирмонини бунёд этиш мақсадида пахта терими уюшқоқлик билан ташкил этилди. Фермер хўжаликларидаги 290 та терим отрядларида 23 минг 266 нафар теримчилар далалардаги оқ олтинни нест-нобуд қилмасдан йиғиб олишмоқда.

Пахта ҳосилини сифатли ва тез фурсатларда йиғиштириб олиш мақсадида Намуна маҳалласи ҳудудидаги фермер хўжалиги ишчилари, уюшмаган аҳолидан ташкил қилинган терим отрядлари жонбозлик кўрсатишмоқда. Теримчилар қулай об-ҳаво шароитидан фойдаланиб, “оқ олтин” хирмонининг янада баланд бўлишига ўзларининг ҳиссаларини қўшишмоқда.

Ҳудуддаги 7 та фермер хўжалигида 362 гектар ерга чигит қадалди. “Достонбек-Зебо”, “Муродбек-Зебо”, “Собир Эшчон” каби илғор фермер хўжаликлари экин майдонларида ўз вақтида амалга оширилган агротехник тадбирлар натижасида ғўза ниҳоллари текис униб чиқди. Вегетация даврида барча агротехник тадбирлар сифатли ва ўз вақтида амалга оширилди. Жумладан, ғўза ниҳолларини ягоналаш, қатор ораларига ишлов бериш, бегона ўтлардан тозалаш, суғориш ва озиқлантириш, дефолиация ва чеканка қилиш каби тадбирлар малакали мутахассисларнинг тавсиялари ва деҳқонларимизнинг кўп йиллик тажрибалари асосида сифатли амалга оширилди.

Олимбой Жуманиёзов бошчилигидаги “Достонбек-Зебо” фермер хўжалигида 35 гектар ерга “Султон” навли пахта экилган бўлиб, 35 нафар пудратчи томонидан етиштирилган мўл ҳосилдан 107 тонна ўрнига 125-130 тонна топшириш режалаштирилган. Шунингдек, Мансур Эшчонов раҳбарлигидаги “Муродбек-Зебо” фермер хўжалигида эса 38 гектар ерда пахта парвариш қилинди. Хўжалик теримчилари етиштирилган ҳосилни уюшқоқлик билан териб олиб, 124 тонна оқ олтин топширишни мўлжаллашган.

Собир Худойберганов бошқараётган “Собир эшчон” фермер хўжалигида 80 гектар ерга ҳам “Султон” навли пахта уруғи экилиб, мўл ҳосил тўплашга эришилди. Айни кунларда хўжалик далаларида теримчилар пахта йиғим-теримида фаоллик кўрсатишмоқда ва режаларни ортиғи билан уддалаб, даромадга эга бўлишни кўзлашмоқда.

Бу йилги йиғим-терим мавсумида карантин талабларига риоя қилиниши, мажбурий меҳнатга йўл қўймаслик, болалар меҳнатидан фойдаланмаслик ҳамда ўз вақтида терим пулларини тарқатилишига алоҳида эътибор қаратилмоқда.

Намуналиклар туманимизда сарбаланд “оқ олтин” хирмони яратилишига муносиб ҳисса қўшишмоқда. Ўз навбатида теримчилар учун ҳам барча шароитлар яратилиб, дала бошида иссиқ овқатлар ташкил қилинмоқда. Уларнинг маданий ҳордиқ чиқариши учун шароит яратилгани, терим пулларининг ўз вақтида, дала бошида бериб борилаётгани  терим суръатини оширишда муҳим омил бўлмоқда.

Озода Худойберганова.