Oʻzbekiston Respublikasi Ekologik partiyasi Amudaryo tuman kengashi tomonidan targʻibot-tashviqot tadbiri oʻtkazildi

10-sentyabr kuni Amudaryo tumanidagi 9-sonli Bolalar musiqa va sanʼat maktabida Oʻzbekiston Respublikasi Ekologik partiyasi tuman kengashi tomonidan “Ona tabiat – barchamizniki” shiori ostida targʻibot-tashviqot tadbiri oʻtkazildi.

Tadbirda partiyaning Qoraqalpigʻiston Respublikasi kengashi raisi Oysanam Begimova, Amudaryo tuman kengashi raisi Saʼdulla Sodiqov, partiya faxriy aʼzosi Tursinboy Ahmedov, partiya faollari, saylovchilar, keng jamoatchilik vakillari ishtirok etdilar.

Tadbirda soʻzga chiqqanlar taʼkidlaganlaridek, joriy yilning 24-oktyabrida oʻtkaziladigan Oʻzbekiston Respublikasi Prezidenti saylovi jarayonlari mutlaqo yangicha koʻrinishda, saylov qonunchiligiga asosan, demokratik printsiplarga xos boʻlgan ochiqlik va oshkoralik tamoyillariga muvofiq tashkil etilishi uchun munosib tayyorgarlik koʻrilmoqda.

Saylov kodeksiga muvofiq saylovoldi targʻibot-tashviqot tadbirlari, partiya faollari ishtirokidagi uchrashuvlar oʻta qizgʻin va koʻtarinki ruhda tashkil etilayotgani partiyalarning siyosiy maydondagi mavqeini oshirib, xayrixohlari safi kengayishiga xizmat qilmoqda.

Shuningdek, tadbirda soʻzga chiqqan masʼullar ekologik xavfsizlikni taʼminlashga qaratilgan davlat siyosatini amalga oshirish, atrof muhitni muhofaza qilish, tabiiy resurslardan oqilona foydalanish va aholi uchun qulay sharoitlar yaratish, iqlim oʻzgarishlariga moslashish, Orol fojiasi oqibatlarini yumshatish va Orolboʻyi hududini yanada rivojlantirish kabi ustuvor vazifalarni amalga oshirish Oʻzbekiston Respublikasi Ekologik partiyasining asosiy yoʻnalishlaridan ekanligini qayd etdilar.

Shundan soʻng targʻibot tadbiri tuman Madaniyat boʻlimi xonandalarining ajoyib kuy-qoʻshiqlari bilan davom ettirildi. Vatan, doʻstlik, tinchlik, istiqlol, muhabbat mavzularida yangragan taronalar tadbirga koʻtarinki ruh bagʻishladi.

Aytish joiyki, bugungi kunda mamlakatimizda tobora dolzarb boʻlib borayotgan ekologik muammolarni hal etish, jamiyatda aholining eʼtiborini ekologik muammolar va ularning yechimiga qaratish, inson salomatligini  asrash va sogʻlom turmush tarzini taʼminlash kabi ishlar jamiyat oldida turgan oʻta muhim masalalardan hisoblanadi. Oʻzbekiston Respublikasi Ekologik partiyasi ushbu dolzarb masalalarni oʻzida aks ettirgan dastur bilan Oʻzbekiston Respublikasi Prezidenti saylovida qatnashadi.

Targʻibot tadbirini yanada fayzli va mazmunli oʻtkazish maqsadida viktorina oʻyini tashkil etildi. Oʻyin yakunida eng koʻp javob bergan ishtirokchilar gʻolib deb topildilar hamda taqdirlandilar. 

Targʻibot tadbirlarining taniqli xonandalar ishtirokida, shou tadbirlari, viktorina savol-javoblari bilan oʻtkazilayotgani partiyaning aholi ichiga yanada yaqinroq kirib borishida, xalq bilan hamnafas boʻlib ish yuritishida muhim ahamiyat kasb etishi shubhasiz.

Tuman hokimligining Axborot xizmati.