Ўзбекистон Республикаси Экологик партияси Амударё туман кенгаши томонидан тарғибот-ташвиқот тадбири ўтказилди

10 сентябрь куни Амударё туманидаги 9-сонли Болалар мусиқа ва санъат мактабида Ўзбекистон Республикаси Экологик партияси туман кенгаши томонидан “Она табиат – барчамизники” шиори остида тарғибот-ташвиқот тадбири ўтказилди.

Тадбирда партиянинг Қорақалпиғистон Республикаси кенгаши раиси Ойсанам Бегимова, Амударё туман кенгаши раиси Саъдулла Содиқов, партия фахрий аъзоси Турсинбой Аҳмедов, партия фаоллари, сайловчилар, кенг жамоатчилик вакиллари иштирок этдилар.

Тадбирда сўзга чиққанлар таъкидлаганларидек, жорий йилнинг 24 октябрида ўтказиладиган Ўзбекистон Республикаси Президенти сайлови жараёнлари мутлақо янгича кўринишда, сайлов қонунчилигига асосан, демократик принципларга хос бўлган очиқлик ва ошкоралик тамойилларига мувофиқ ташкил этилиши учун муносиб тайёргарлик кўрилмоқда.

Сайлов кодексига мувофиқ сайловолди тарғибот-ташвиқот тадбирлари, партия фаоллари иштирокидаги учрашувлар ўта қизғин ва кўтаринки руҳда ташкил этилаётгани партияларнинг сиёсий майдондаги мавқеини ошириб, хайрихоҳлари сафи кенгайишига хизмат қилмоқда.

Шунингдек, тадбирда сўзга чиққан масъуллар экологик хавфсизликни таъминлашга қаратилган давлат сиёсатини амалга ошириш, атроф муҳитни муҳофаза қилиш, табиий ресурслардан оқилона фойдаланиш ва аҳоли учун қулай шароитлар яратиш, иқлим ўзгаришларига мослашиш, Орол фожиаси оқибатларини юмшатиш ва Оролбўйи ҳудудини янада ривожлантириш каби устувор вазифаларни амалга ошириш Ўзбекистон Республикаси Экологик партиясининг асосий йўналишларидан эканлигини қайд этдилар.

Шундан сўнг тарғибот тадбири туман Маданият бўлими хонандаларининг ажойиб куй-қўшиқлари билан давом эттирилди. Ватан, дўстлик, тинчлик, истиқлол, муҳаббат мавзуларида янграган тароналар тадбирга кўтаринки руҳ бағишлади.

Айтиш жоийки, бугунги кунда мамлакатимизда тобора долзарб бўлиб бораётган экологик муаммоларни ҳал этиш, жамиятда аҳолининг эътиборини экологик муаммолар ва уларнинг ечимига қаратиш, инсон саломатлигини  асраш ва соғлом турмуш тарзини таъминлаш каби ишлар жамият олдида турган ўта муҳим масалалардан ҳисобланади. Ўзбекистон Республикаси Экологик партияси ушбу долзарб масалаларни ўзида акс эттирган дастур билан Ўзбекистон Республикаси Президенти сайловида қатнашади.

Тарғибот тадбирини янада файзли ва мазмунли ўтказиш мақсадида викторина ўйини ташкил этилди. Ўйин якунида энг кўп жавоб берган иштирокчилар ғолиб деб топилдилар ҳамда тақдирландилар. 

Тарғибот тадбирларининг таниқли хонандалар иштирокида, шоу тадбирлари, викторина савол-жавоблари билан ўтказилаётгани партиянинг аҳоли ичига янада яқинроқ кириб боришида, халқ билан ҳамнафас бўлиб иш юритишида муҳим аҳамият касб этиши шубҳасиз.

Туман ҳокимлигининг Ахборот хизмати.