GIYoHVANDLAR QOʻLGA OLINIB, JAZOGA TORTILDI

Giyohvandlik inson umrini yemiruvchi, halokatga yetaklovchi illat boʻlib, ogʻir oqibatlarni keltirib chiqaradi. Afsus, shundayligini bila turib ham uning botqogʻiga botayotganlar hayotda koʻp uchraydi va ular nafaqat oʻzini, balki yaqinlari, oilasi, farzandlarini kasriga qoldirib, zulmat girdobiga tortadi.  

Yoshgina boʻlishiga qaramasdan koʻshni tumanlik Shermat (ismlar oʻzgartirilgan) ham shu baloi ofatning komiga tushdi. Kasalligini, kimdir giyohvandlik vositasini isteʼmol qilsang tuzalasan deganini bahona qildi. Faqat shuni izlab topishdan boshqa narsani oʻylamaydigan, hech kim koʻziga koʻrinmaydigan boʻlib qoldi. Oʻzi ruju qoʻygani yetmagandek, boshqalarga sotib, jinoiy yoʻl bilan moʻmay pulga ega boʻlishga ham harakat qildi.

Ammo bu gʻarazli niyatiga yetolmadi. U oʻzidagi ikki dona gugurt qutisiga solingan 4, 67 grammni tashkil qiluvchi «marixuana» giyohvandlik vositasini 1 mln. 200 ming soʻm pulga sotayotgan paytida huquqni muhofaza qiluvchi organ xodimlari tomonidan qoʻlga olindi.

Shu tumanda yashovchi Komil (oʻzgartirilgan) ham shu zahri qotilga anchagina oʻrgandi. Hatto urugʻini topib, noqonuniy tarzda tomorqasining chetida 3 tup taʼqiqlangan kannabis giyohvandlik oʻsimligini yetishtirdi. Olgan hosilini esa idishlarga solib yashirib qoʻydi. Ammo uning ham koʻngilxushligi uzoqqa bormadi.

Huquqni muhofaza qiluvchi organ xodimlari tomonidan oʻtkazilgan tezkor tadbir davomida uning oʻzi isteʼmol qilish uchun sof ogʻirligi 129,98 grammni tashkil qiluvchi koʻp miqdordagi «marixuana» giyohvandlik vositasini qonunga xilof ravishda saqlab kelayotgani aniqlandi.  

Har ikkala giyohvand qilmishiga yarasha qonunda koʻrsatilgan tartibda jazoga tortildi.

A.Koshanov, Jinoyat ishlari boʻyicha Taxiatosh tumani sudi raisi