Xitoy ovulidagi 6-sonli qishloq oilaviy poliklinkasi 18 mingdan ziyod aholiga sifatli tibbiy xizmat koʻrsatmoqda

Butun mamlakatimizda boʻlgani kabi Amudaryo tumanida ham tibbiyot sohasida salmoqli ishlar amalga oshirilmoqda. Keyingi yillarda tibbiyot birlashmasiga qarashli Markaziy shifoxona, Koʻp tarmoqli markaziy poliklinika binosi taʼmirdan chiqarilib, atrofi obodonlashtirildi. Zamonaviy koʻrinishdagi Tez tibbiy yordam boʻlimi binosi ishga tushirildi. Ayniqsa, tibbiyot muassasalarining zamonaviy, soʻnggi rusumdagi tibbiyot asbob-anjomlari hamda texnikalar bilan taʼminlangani davolash ishlari samaradorligini oshirishda muhim ahamiyat kasb etmoqda.

Bu kabi yangilanishlar tumanning chekka hududlarida ham amalga oshirilib, aholining sifatli tibbiy xizmatlardan foydalanishiga imkoniyat yaratilmoqda.

Xitoy ovulida joylashgan 6-sonli oilaviy poliklinikada ham hudud aholisi uchun malakali tibbiy xizmat koʻrsatish yoʻlga qoʻyilgan. 2013-yilda qishloq vrachlik punkti sifatida tashkil etilib, 2020-yilda oilaviy poliklinkaga aylantirilgan ushbu tibbiyot maskanida xizmat sifatini yanada yaxshilash maqsadida aniq tadbirlar belgilanib, ijrosi toʻliq taʼminlanmoqda. Har bir oilaga kirib borilib, salomatligidan xabardor boʻlinmoqda va sogʻlom turmush tarzi keng targʻib etilmoqda. Bunday tarzdagi xizmatlar koʻrsatilayotganidan, el salomatligiga alohida eʼtibor qaratilayotganidan aholi nihoyatda mamnun.

Ovuldagi 18 mingdan ziyod aholiga mazkur poliklinikada terapevt, pediatr, xirurg, akusher-ginekolog, shifokor-laborant va UTT kabi tor soha shifokorlari tomonidan malakali tibbiy xizmat koʻrsatib kelinmoqda. Poliklinikada 7 nafar umumiy amaliyot shifokori, 7 nafar tor doiradagi mutaxassis shifokorlar, 54 nafar oʻrta tibbiyot xodimi va 20 nafardan ziyod patronaj hamshiralari ish olib bormoqda. Shuningdek, ushbu tibbiyot muassasasi zamonaviy uskunalar, jumladan, UZI apparati, laboratoriya tahlillari uchun zarur jihozlar bilan taʼminlangan. Buning samarasida tashxis qoʻyish sifati yaxshilanib, birlamchi tibbiy yordam koʻrsatish samaradorligi oshmoqda.

 Turli kasalliklarning oldini olish tibbiyot maskani faoliyatining asosiy yoʻnalishi hisoblanganligi sababli targʻibot va tashviqot ishlari muntazam ravishda amalga oshirilib, aholiga tushuntirish ishlari olib borilmoqda. Ayniqsa, koronavirus infektsiyasi tarqalishi avj olayotgan ayni paytda kasallikdan himoyalanish choralari, chalinishning oldini olish hamda vaktsinatsiyaning afzalliklari toʻgʻrisida keng tushunchalar berilmoqda.

Oilaviy shifokor va patronaj hamshiralar tomonidan esa oʻzlariga biriktirilgan hududlardagi oilalar tibbiy-ijtimoiy holati oʻrganib chiqilmoqda. Dispanser hisobidagi bemorlarni uyida koʻrikdan oʻtkazish va zarur muolajalarni amalga oshirish orqali turli kasalliklarning oldini olish ishlari yoʻlga qoʻyilgan. Hududda roʻyxatga olingan fertil yoshidagi ayollar, bolalar, keksa yoshdagilar va nogironlar salomatligi doimiy nazoratda. 

Poliklinikada birlamchi tibbiy yordam koʻrsatish, tashxis qoʻyish, sogʻlomlashtirish muolajalarini amalga oshirish, laboratoriya xonalari ishlab turibdi. Ayniqsa, tor doiradagi mutaxassislarning faoliyat koʻrsatayotgani aholiga koʻplab qulayliklar yaratmoqda. Jarroh, pediatr, akusher-ginekolog, stomatolog, ultratovush tekshiruvi mutaxassisi kabilar hudud fuqarolarining uzogʻini yaqin qilib, ogʻirini yengil qilmoqda.

Tibbiyot xodimlarining samarali faoliyati va bu yerda yaratilgan sharoitlar Xitoy ovuli aholisiga sifatli tibbiy xizmatdan foydalanish, salomatligini yanada yaxshilash, yuqumli kasalliklar boʻyicha barqaror holatni saqlash hamda bolalar oʻrtasida kasallikka chalinish holatlarini kamaytirish imkonini bermoqda.

O.Xudoyberganova.