AHDI VA ShAHDI BALAND YoSh FERMER

Qishloqda tugʻilib-oʻsgani uchunmi, Samadjon qaysi  ishga qoʻl ursa, uddasidan chiqadigan, uddaburon bola boʻlib voyaga yetdi. Umumtaʼlim maktabida oʻqib yurgan kezlaridayoq vaqtdan unumli foydalanishga, har bir ishni reja asosida bajarishga odatlangan Samadjon oʻqishdan boʻsh vaqtlarida ota-onasiga tomorqa ishlarida yaqin koʻmakdosh boʻldi. Ayniqsa, otasi Xolboy ogʻa “Samad SXA” fermer xoʻjaligini tashkil etganida oʻzida yoʻq quvondi. Bu paytda Nukus Davlat Pedagogika institutida tahsil olayotgan Samadjonning bir oyogʻi ovulda boʻlib qoldi. U to institutni tamomlaguncha oʻqishdan boʻsh vaqtlarida otasi rahbarlik qilayotgan fermer xoʻjaligi dalalarida  opa-akalari, xoʻjalik ishchilari bilan bab-baravar mehnat qildi.

Qiziqishlari ustun keldimi, har qalay, institutni tugatib, “Samad SXA” fermer xoʻjaligi ish boshqaruvchisi sifatida ilk mehnat faoliyatini boshlagan Samadjon Xidirboyev bir yil davomida fermer xoʻjaligi faoliyatiga oid iqtisodiy-moliyaviy asoslarni puxta oʻzlashtirdi. Natijada 2014-yilda pensiyaga chiqqan otasi Xolboy ogʻa Xidirboyev fermer xoʻjaligini Samadjonga ishonch bilan topshirdi. Mana, sakkiz yildirki, Samadjon “Xidirboyev Samad” fermer xoʻjaligini mohirlik bilan boshqarib kelmoqda. U fermerlik faoliyatini boshlagan 2014-yildayoq pilla yetishtirish rejasi 115 foizga, 2015-yilda bu koʻrsatkich 118 foizga uddalandi. Faqat 2014-2015 qishloq xoʻjalik yilida “Xidirboyev Samad” fermer xoʻjaligida yillik daromad 210 mln. soʻmni tashkil etib, 68 mln. soʻm sof daromad olindi.

Oradan uch yil oʻtib, 2017-yilda yosh va tashabbuskor fermer Samadjon Xidirboyev Toshkent shahrida oʻtkazilgan Oʻzbekiston yosh fermerlarining 1-Respublika forumida faol ishtirok etib, diplom bilan taqdirlandi. Anʼanaviy ravishda har yili tashkil etiladigan “Tashabbus” koʻrik-tanlovining faol ishtirokchisi boʻlgan Samadjon Xidirboyev 2018-yilda “Yilning eng faol yosh mutaxassisi” respublika koʻrik-tanlovining tuman bosqichida “Eng yosh fermer” nominatsiyasi sovrindori, mazkur koʻrik-tanlovning Respublika bosqichida esa “Yilning eng faol yosh fermeri” yoʻnalishi boʻyicha 1-oʻrin sohibi boʻldi va 1-darajali diplom, qimmatbaho sovgʻalar bilan taqdirlandi.

Xalqimiz “Mehnat qilgan elda aziz”, – deya ardoqlaydi oʻz fidoyi farzandlarini. Samadjon ham yosh boʻlishiga qaramay, oʻzining ishbilarmonligi, elparvarligi bilan ovuldoshlari hurmatiga, eʼtiboriga sazovor boʻlganlardan.

Ayni paytda fermer xoʻjaligida 60 nafar kishi doimiy ish bilan taʼminlangan. Joriy dehqonchilik yilida 56 gektar yerga paxta ekkan xoʻjalik dehqonlarining koʻzlagan marralari yuksak. Har gektar hisobiga hosildorlikni 40 tsentnerga, umumiy paxta xirmonini 224 tonnaga yetkazishga ahd qilishgan. 2021-yilgi pilla topshirish rejasini esa 102 foizga uddalashdi.

Xoʻjalikda nafaqat paxta, gʻallachilik va pillachilik, balki ertagi hamda kuzgi sabzavot va poliz ekinlari yetishtirishga ham alohida eʼtibor qaratiladi. Shu bois, xoʻjalik ishchilarining moddiy manfaatdorligi ham yuqori. Xoʻjalik ishchilariga yil davomida har bir oila hisobiga 400 kg.dan kartoshka, 250 kg. piyoz, 350 kg. sabzi va turli mevalar berilishi yoʻlga qoʻyilgan.

– Ishchilarimiz mehnatiga yarasha haqlarini ham olishlari kerak, hayotlaridan rozi boʻlib yashashmasa, qilayotgan ishida unum boʻlmaydi, – deydi Samadjon Xidirboyev. – Xoʻjaligimiz ishchilari mening qoʻl-qanotlarim.

Ayni kunlarda xoʻjalik dalalarida joriy dehqonchilik yilining ikkinchi hosili – bugʻdoy oʻrim-yigʻimi ham nihoyasiga yetgan. Xoʻjalikning bu yilgi gʻalla xirmoni ham yuksalib, 50 tonna qirmizi don yigʻishtirib olindi, omborlar donga toʻldi. Yosh fermerning esa shahdi ham, ahdi ham baland. Biz Samadjon Xidirboyevga kelgusida yanada yuksak marralarni zabt etishida omadlar yor boʻlishini tilaymiz.

Robiya YOʻLDOShEVA.