Oʻzbekiston Respublikasi Prezidentining tuman Xalq qabulxonasi samarali faoliyat yuritmoqda

Maʼlumki, mamlakatimizda davlatimiz rahbari tashabbusi bilan insonlarni qiynayotgan muammolarni aniqlash, ularni har tomonlama ijobiy hal qilish maqsadida Oʻzbekiston Respublikasi Prezidentining Xalq qabulxonasi hamda uning hududiy boʻlinmalari tashkil etildi. Xalq qabulxonalari tashkil etilishi joylarda aholining uzoq yillar davomida qiynab kelgan muammolari bilan ishlashga, ularning aksariyati joyida hal etilishiga zamin yaratdi.

Oʻzbekiston Respublikasi Prezidentining Amudaryo tumanidagi Xalq qabulxonasi bugungi kunda aholi murojaatlari bilan ishlash, bu borada qabul qilinayotgan qonun hujjatlari ijrosini taʼminlashda samarali faoliyat yuritib kelmoqda. Xususan, Oʻzbekiston Respublikasi Prezidentining “Aholi muammolari bilan ishlash tizimini yanada takomillashtirish chora-tadbirlari toʻgʻrisida”gi farmoniga asosan jismoniy va yuridik shaxslarning murojaatlarini koʻrib chiqilishi borasida joriy yilning oʻtgan olti oyi davomida salmoqli ishlar amalga oshirildi.

Oʻzbekiston Respublikasi Prezidentining Amudaryo tumanidagi Xalq Qabulxonasiga joriy yil 6 oy davomida jismoniy va yuridik shaxslardan jami 775 ta murojaatlar roʻyxatga olingan boʻlib, shundan 721 tasi yozma hamda 54 tasi ogʻzaki murojaatlar hisoblanadi. Ushbu murojaatlarning 732 tasi xududdagi tashkilotlarga, 27 tasi yuqori turuvchi tashkilotlarga mazmunan tegishliligi boʻyicha oʻrganish uchun yuborilgan boʻlib, 16 ta murojaatlar joyida tegishli korxona va tashkilotlarni jalb etgan holda choralar koʻrish maqsadida tuman Xalq qabulxonasida qoldirilgan.

Kelib tushgan murojaatlarning 555 tasi yaʼni, 72 % qanoatlantirilgan boʻlib, shundan 178 tasi oʻzining ijobiy yechimini topgan. 371 tasi huquqiy maslahat va maʼlumot berish orqali hal qilingan boʻlsa, 171 tasiga tushuntirish ishlari olib borilgan, qolgan 47 ta murojaatlar yuzasidan tegishli qarorlar qabul qilish maqsadida mazmunan koʻrib chiqilmoqda.

Aytish kerakki, hududlarni ijtimoiy-iqtisodiy rivojlantirish maqsadida tashkil etilgan sektorlar kesimida tuman Xalq qabulxonasi hamda sektor rahbarlari hamkorligida joylarda oʻtkazilayotgan ommaviy sayyor qabullarda ham koʻpchilik muammoli masalalar oʻz yechimini topmoqda.

Jumladan, joriy yilning shu davriga qadar joylarda jami 24 marotaba sayyor qabullar oʻtkazilgan boʻlib, ularda aholi tomonidan 138 ta murojaatlar yoʻllangan. Shundan 58 ta murojaatlardagi masalalar qanoatlantirilgan, 53 nafar fuqarolarga murojaatlari yuzasidan asosli tushuntirish berilgan, qolgan murojaatlar oʻrganilmoqda.

Joriy yilning 8-iyul sanasida tumandagi 1-sektor hududiga kiruvchi Qipchoq shaharchasida ana shunday sayyor qabul oʻtkazildi. Sayyor qabulda Oʻzbekiston Respublikasi Prezidentining tumandagi Xalq qabulxonasi mudiri Erkin Rajabov, 1-sektor kotibi Otabek Olloyorov hamda aholi vakillari ishtirok etdilar. Qabul jarayonidan aholi tomonidan jami 8 ta turli mazmundagi murojaatlar yoʻllandi.

Murojaatlarda ichki koʻchalarga tosh shagʻal yotqizish, tikuvchilik bilan shugʻullanish uchun imtiyozli kredit olishda, transformatorni ishga tushirish, bandligini taʼminlash, yer uchastkasi hujjatlarini rasmiylashtirishda amaliy yordam soʻrash mazmunidagi masalalar oʻrganildi.

Shulardan Dilrabo Rahimova hamda Qunduzoy Quralovalarning tikuvchilik bilan shugʻullanish uchun imtiyozli kredit olishda amaliy yordam soʻrab qilgan murojaatlari shu yerning oʻzida tegishli masʼullar bilan kelishilgan holda ijobiy hal etildi. Qolgan murojaatlar oʻrganilib, oʻz yechimini topishi taʼminlanmoqda.

Qayd etish joizki, mamlakatimizdagi yoshlarga oid davlat siyosatida olib borilayotgan keng qamrovli islohotlar mazmun-mohiyatini tushuntirish, yoshlar bilan ishlashda madaniy-maʼrifiy ishlar samaradorligini oshirish, ularda Vatanga muhabbat va sadoqat, yurt ravnaqi yilida amalga oshirilayotgan chora-tadbirlarga dahldorlik tuygʻularini shakllantirish maqsadida Oʻzbekiston Respublikasi Prezidentining Amudaryo tumanidagi Xalq qabulxonasi hamda sektor rahbarlari tomonidan joylarda 24 marotaba yoshlar bilan uchrashuvlar oʻtkazilgan. Uchrashuvlarda yoshlarni qiynayotgan muammolar oʻrganilgan hamda ularni hal etishga amaliy yordam koʻrsatilgan.

Insonlarning dard-u tashvishlari, muammolarini tinglash, ularga koʻmak berish maqsadida amalga oshirilayotgan shu kabi qator saʼy-harakatlar natijasida aholi turmush sharoitlari yaxshilanib, xalqimizning davlat organlariga ishonchi oshmoqda.

E.D.Rajabov, Oʻzbekiston Respublikasi Prezidentining Qoraqalpogʻiston Respublikasi Amudaryo  tumanidagi Xalq qabulxonasi mudiri.