Ўзбекистон Республикаси Президентининг туман Халқ қабулхонаси самарали фаолият юритмоқда

Маълумки, мамлакатимизда давлатимиз раҳбари ташаббуси билан инсонларни қийнаётган муаммоларни аниқлаш, уларни ҳар томонлама ижобий ҳал қилиш мақсадида Ўзбекистон Республикаси Президентининг Халқ қабулхонаси ҳамда унинг ҳудудий бўлинмалари ташкил этилди. Халқ қабулхоналари ташкил этилиши жойларда аҳолининг узоқ йиллар давомида қийнаб келган муаммолари билан ишлашга, уларнинг аксарияти жойида ҳал этилишига замин яратди.

Ўзбекистон Республикаси Президентининг Амударё туманидаги Халқ қабулхонаси бугунги кунда аҳоли мурожаатлари билан ишлаш, бу борада қабул қилинаётган қонун ҳужжатлари ижросини таъминлашда самарали фаолият юритиб келмоқда. Хусусан, Ўзбекистон Республикаси Президентининг “Аҳоли муаммолари билан ишлаш тизимини янада такомиллаштириш чора-тадбирлари тўғрисида”ги фармонига асосан жисмоний ва юридик шахсларнинг мурожаатларини кўриб чиқилиши борасида жорий йилнинг ўтган олти ойи давомида салмоқли ишлар амалга оширилди.

Ўзбекистон Республикаси Президентининг Амударё туманидаги Халқ Қабулхонасига жорий йил 6 ой давомида жисмоний ва юридик шахслардан жами 775 та мурожаатлар рўйхатга олинган бўлиб, шундан 721 таси ёзма ҳамда 54 таси оғзаки мурожаатлар ҳисобланади. Ушбу мурожаатларнинг 732 таси худуддаги ташкилотларга, 27 таси юқори турувчи ташкилотларга мазмунан тегишлилиги бўйича ўрганиш учун юборилган бўлиб, 16 та мурожаатлар жойида тегишли корхона ва ташкилотларни жалб этган ҳолда чоралар кўриш мақсадида туман Халқ қабулхонасида қолдирилган.

Келиб тушган мурожаатларнинг 555 таси яъни, 72 % қаноатлантирилган бўлиб, шундан 178 таси ўзининг ижобий ечимини топган. 371 таси ҳуқуқий маслаҳат ва маълумот бериш орқали ҳал қилинган бўлса, 171 тасига тушунтириш ишлари олиб борилган, қолган 47 та мурожаатлар юзасидан тегишли қарорлар қабул қилиш мақсадида мазмунан кўриб чиқилмоқда.

Айтиш керакки, ҳудудларни ижтимоий-иқтисодий ривожлантириш мақсадида ташкил этилган секторлар кесимида туман Халқ қабулхонаси ҳамда сектор раҳбарлари ҳамкорлигида жойларда ўтказилаётган оммавий сайёр қабулларда ҳам кўпчилик муаммоли масалалар ўз ечимини топмоқда.

Жумладан, жорий йилнинг шу даврига қадар жойларда жами 24 маротаба сайёр қабуллар ўтказилган бўлиб, уларда аҳоли томонидан 138 та мурожаатлар йўлланган. Шундан 58 та мурожаатлардаги масалалар қаноатлантирилган, 53 нафар фуқароларга мурожаатлари юзасидан асосли тушунтириш берилган, қолган мурожаатлар ўрганилмоқда.

Жорий йилнинг 8 июль санасида тумандаги 1-сектор ҳудудига кирувчи Қипчоқ шаҳарчасида ана шундай сайёр қабул ўтказилди. Сайёр қабулда Ўзбекистон Республикаси Президентининг тумандаги Халқ қабулхонаси мудири Эркин Ражабов, 1-сектор котиби Отабек Оллоёров ҳамда аҳоли вакиллари иштирок этдилар. Қабул жараёнидан аҳоли томонидан жами 8 та турли мазмундаги мурожаатлар йўлланди.

Мурожаатларда ички кўчаларга тош шағал ётқизиш, тикувчилик билан шуғулланиш учун имтиёзли кредит олишда, трансформаторни ишга тушириш, бандлигини таъминлаш, ер участкаси ҳужжатларини расмийлаштиришда амалий ёрдам сўраш мазмунидаги масалалар ўрганилди.

Шулардан Дилрабо Раҳимова ҳамда Қундузой Қураловаларнинг тикувчилик билан шуғулланиш учун имтиёзли кредит олишда амалий ёрдам сўраб қилган мурожаатлари шу ернинг ўзида тегишли масъуллар билан келишилган ҳолда ижобий ҳал этилди. Қолган мурожаатлар ўрганилиб, ўз ечимини топиши таъминланмоқда.

Қайд этиш жоизки, мамлакатимиздаги ёшларга оид давлат сиёсатида олиб борилаётган кенг қамровли ислоҳотлар мазмун-моҳиятини тушунтириш, ёшлар билан ишлашда маданий-маърифий ишлар самарадорлигини ошириш, уларда Ватанга муҳаббат ва садоқат, юрт равнақи йилида амалга оширилаётган чора-тадбирларга даҳлдорлик туйғуларини шакллантириш мақсадида Ўзбекистон Республикаси Президентининг Амударё туманидаги Халқ қабулхонаси ҳамда сектор раҳбарлари томонидан жойларда 24 маротаба ёшлар билан учрашувлар ўтказилган. Учрашувларда ёшларни қийнаётган муаммолар ўрганилган ҳамда уларни ҳал этишга амалий ёрдам кўрсатилган.

Инсонларнинг дард-у ташвишлари, муаммоларини тинглаш, уларга кўмак бериш мақсадида амалга оширилаётган шу каби қатор саъй-ҳаракатлар натижасида аҳоли турмуш шароитлари яхшиланиб, халқимизнинг давлат органларига ишончи ошмоқда.

Э.Д.Ражабов, Ўзбекистон Республикаси Президентининг Қорақалпоғистон Республикаси Амударё  туманидаги Халқ қабулхонаси мудири.