Amudaryo tumanida “Yoshlar kuni” munosib nishonlandi

Mamlakatimizda yosh avlodni barkamol qilib tarbiyalash, har jihatdan yetuk, jismonan sogʻlom, intellektual salohiyatli, maʼnan barkamol qilib voyaga yetkazish, qolaversa, yoshlarni qilgan mehnati, erishgan yutuqlariga yarasha ragʻbatlantirish boʻyicha tizimli ishlar amalga oshirilmoqda.

30-iyun sanasi Prezidentimiz tashabbusi bilan “Yoshlar kuni”deya eʼlon qilinishi hamda har yili bayram sifatida nishonlanishi ertamiz egalariga qaratilgan yuksak eʼtibor namunasi, deyish mumkin. Ilgʻor va tashabbuskor yoshlarni ragʻbatlantirish, turli sohalarda yuksak natija va yutuqlarga erishayotgan fidoyi yoshlarimizni qoʻllab-quvvatlash maqsadida turli davlat mukofotlari taʼsis etilgan. Birgina keyingi yillarda “Mard oʻgʻlon” davlat mukofoti va “Kelajak bunyodkori” medali taʼsis etilgani va yuzlab  yoshlar mukofotlangani yoshlarimizga boʻlgan eʼtibor qanchalik yuksakligining isbotidir.

Amudaryo tumanida ham har yili 30-iyun sanasi “Yoshlar kuni” bayrami sifatida munosib nishonlanib kelinmoqda. Joriy yilda ham yoshlar bayrami tadbirlariga katta tayyorgarlik koʻrildi hamda tantanali tarzda oʻtkazildi.

30-iyun kuni sana munosabati bilan tumandagi Xotira maydonida ilm-fan, axborot texnologiyalari, sport, sanʼat, madaniyat va boshqa turli sohalarida yuksak natijalarga erishib kelayotgan, tumanimizning bugungi kundagi faxriga aylangan bir guruh tashabbuskor yoshlar tuman hokimligi, tumandagi toʻrtta sektor hamda hamkor tashkilotlar tomonidan turli qimmatbaho esdalik sovgʻalari va faxriy yorliqlar bilan munosib ragʻbatlantirildi.

Jumladan, tumanimizdagi barcha taʼlim muassasalarida taʼlim-tarbiya olayotgan yoshlarimizning sportga bilan shugʻullanishlarini yanada ragʻbatlantirish maqsadida ularga 500 dona futbol, 500 dona voleybol toʻpi, 85 dona voleybol toʻri sovgʻa qilindi.

Shuningdek, tumanimiz yoshlarining sanʼat va madaniyat sohalarigi qiziqishlarini qoʻllab-quvvatlash, ularga oʻzlarining ijodkorlik qobiliyatlarini namoyon etishlariga keng imkoniyat yaratish maqsadida ovullardagi madaniyat markazlari hamda maktablarga 20 dona qashqar rubobi, 59 dona doira, 4 ta ovoz kuchaytirgich, 1 dona sintezator tuman hokimligi tomonidan sovgʻa sifatida berildi.

Qayd etish joizki, bugun tumanimizda sport sohasi tobora rivojlanayotgan boʻlib, tumanimiz sportchilari turli musobaqalarda yuqori marralarni egallamoqdalar. Ana shunday 25 nafar yosh chempionlarimizga bayram munosabati bilan velosipedlar sovgʻa qilindi.

Tumanda “Yoshlar daftari”ga kiritilgan yordamga muhtoj, band boʻlmagan yoshlar har tomonlama qoʻllab-quvvatlanib, ularga moddiy va maʼnaviy koʻmak berilmoqda hamda ularni ish bilan taʼminlash va “Yoshlar daftari”dan chiqishlarigi amaliy yordam berish kabi qator choralar koʻrilmoqda.

Yoshlar kuni munosabati bilan tumandagi “Yoshlar daftari”ga kiritilgan 2 nafar yurtdoshlarimizga kompyuter hamda 5 nafariga suv nasoslari sovgʻa qilindi hamda ularning tadbirkorlik bilan shugʻullanib, oʻzini oʻzi band qilishlariga amaliy yordam koʻrsatildi.

Amudaryo tumani Xotira maydonida oʻtkazilgan ushbu tadbirda shuningdek, turli sport musobaqalarining gʻoliblari ham munosib ragʻbatlantirildi. Ertamiz egalari oʻzlariga koʻrsatilayotgan bu kabi eʼtibor hamda ragʻbatdan juda xursand boʻldilar.

Tumanimizdagi “Yoshlar kuni” bayram tadbirlari Istirohat bogʻida davom ettirildi. Yoshlar bayramini munosib nishonlash maqsadida Istirohat bogʻida gala kontsert dasturi tashkil qilindi.

Aytish kerakki, 2021-yilning mamlakatimizda "Yoshlarni qoʻllab-quvvatlash va aholi salomatligini mustahkamlash yili” deb nomalanishi hamda ijtimoiy himoyaga muhtoj, turmush sharoiti ogʻir, ishsiz va kasb-hunarga ega boʻlmagan yoshlarni davlat tomonidan qoʻllab-quvvatlash maqsadida joriy etilgan “Yoshlar daftari” ham yoshlarga keng imkoniyatlar eshigini ochib berdi.

Tumanimiz yoshlari ham bu kabi imkoniyatlardan samarali foydalanib kelmoqdalar. Jumladan, yoshlar bilan ishlashning yangicha tizimini joriy etish boʻyicha “Yoshlar dasturi” doirasida 1 258 nafar yoshlar doimiy va jamoat ishlariga joylashtirildi, 666 nafar yoshlar tadbirkorlikka va kasb-hunarga oʻqitilib tijorat banklari tomonidan 296 nafariga 8 mlrd 512 mln soʻm imtiyozli kredit mablagʻlari ajratildi.

Qishloq xoʻjaligi sohasida yoshlarning bandligini taʼminlash maqsadida 4 408 nafar yoshlarga 1 378 gektar, gʻalladan boʻshagan yer maydonlaridan takroriy ekin ekish uchun 404 nafar yoshlarga 80,8 gektar yer maydoni ajratib berildi.

“Yoshlar daftari” jamgʻarmasi xisobidan “Yoshlar daftari”ga kiritilgan 40 nafar yurtdoshimizga tadbirkorlik faoliyatini boshlash va oʻzini oʻzi band qilishga zarur boʻlgan 113,3 mln soʻmlik asbob-usunalar va mehnat qurollari olib berildi, moddiy ahvoli ogʻir boʻlgan 20 nafar yoshlarga jami 19,6 mln soʻm moddiy yordam berildi.

Bu kabi yuksak eʼtibor va ragʻbat, albatta, yoshlarimizni ham ilm-fan, kasb-hunar sirlarini puxta egallab, Vatanimizga munosib farzand boʻlib yetishishga ruhlantirmoqda.

Soʻnggi yillarda tumanimizdan fanlar olimpiadalarining mamlakat bosqichi gʻoliblari, turli sport oʻyinlarining Oʻzbekiston, Osiyo va jahon miqyosidagi bosqichlarining gʻolib va sovrindorlari yetishib chiqayotgani barchamizga quvonch bagʻishlaydi.

Ana shunday ilgʻor va tashabbuskor yoshlar ishtirokida oʻtgan kontsert dasturi ishtirokchilarga unutilmas onlarni baxshida etdi.

Oʻzbekistonda xizmat koʻrsatgan artist, betakror ovoz sohibi, opera xonandasi Jenisbek Piyazov kontsert dasturining mehmoni boʻldi.

Jenisbek Piyazov tumanimiz yoshlarini “Yoshlar kuni” bayrami bilan qizgʻin muborakbod etdi hamda bir-birda shoʻx kuy-qoʻshiqlar ijro etdi. Yoshlarimiz Jenisbek Piyazov ijrolarini katta qiziqish hamda oʻzgacha zavq bilan tinglab, tomosha qildilar.

Kontsert dasturida tuman madaniyat markazi xonandalari oʻzlarining ijod namunalari bilan ajoyib chiqishlar qildilar. Jumladan, Ikromjon Siytimov, Komiljon Boltaboyev, Rashidbek Rahimov, Davlatyor Shomuradov kabi Madaniyat boʻlimi xonandalari ijro etgan kuy-qoʻshiqlar barchaga koʻtarinki kayfiyat ulashdi.

Yoshlar kontsert dasturida yangragan kuy-qoʻshiqlarga raqsga tushib, bayramni munosib nishonladilar.

Fursatdan foydalanib biz ham yurtimiz yoshlarini yana bir bor “Yoshlar kuni” bayrami bilan chin dildan muborakbod etamiz.

Barcha yoshlarimizga komil insonlar boʻlib voyaga yetib, ota-onansi, jamiyatimiz hamda yurtimizga halol va fidoyi xizmat qilish, Vatanimiz taraqqiyoti va xalqimiz farovonligini taʼminlashdek sharafli ishga hissa baxti nasib qilsin!

Bayramingiz muborak boʻlsin, qadrli yoshlar!

Amudaryo tumani hokimligining Axborot xizmati.