Амударё туманида “Ёшлар куни” муносиб нишонланди

Мамлакатимизда ёш авлодни баркамол қилиб тарбиялаш, ҳар жиҳатдан етук, жисмонан соғлом, интеллектуал салоҳиятли, маънан баркамол қилиб вояга етказиш, қолаверса, ёшларни қилган меҳнати, эришган ютуқларига яраша рағбатлантириш бўйича тизимли ишлар амалга оширилмоқда.

30 июнь санаси Президентимиз ташаббуси билан “Ёшлар куни”дея эълон қилиниши ҳамда ҳар йили байрам сифатида нишонланиши эртамиз эгаларига қаратилган юксак эътибор намунаси, дейиш мумкин. Илғор ва ташаббускор ёшларни рағбатлантириш, турли соҳаларда юксак натижа ва ютуқларга эришаётган фидойи ёшларимизни қўллаб-қувватлаш мақсадида турли давлат мукофотлари таъсис этилган. Биргина кейинги йилларда “Мард ўғлон” давлат мукофоти ва “Келажак бунёдкори” медали таъсис этилгани ва юзлаб  ёшлар мукофотлангани ёшларимизга бўлган эътибор қанчалик юксаклигининг исботидир.

Амударё туманида ҳам ҳар йили 30 июнь санаси “Ёшлар куни” байрами сифатида муносиб нишонланиб келинмоқда. Жорий йилда ҳам ёшлар байрами тадбирларига катта тайёргарлик кўрилди ҳамда тантанали тарзда ўтказилди.

30 июнь куни сана муносабати билан тумандаги Хотира майдонида илм-фан, ахборот технологиялари, спорт, санъат, маданият ва бошқа турли соҳаларида юксак натижаларга эришиб келаётган, туманимизнинг бугунги кундаги фахрига айланган бир гуруҳ ташаббускор ёшлар туман ҳокимлиги, тумандаги тўртта сектор ҳамда ҳамкор ташкилотлар томонидан турли қимматбаҳо эсдалик совғалари ва фахрий ёрлиқлар билан муносиб рағбатлантирилди.

Жумладан, туманимиздаги барча таълим муассасаларида таълим-тарбия олаётган ёшларимизнинг спортга билан шуғулланишларини янада рағбатлантириш мақсадида уларга 500 дона футбол, 500 дона волейбол тўпи, 85 дона волейбол тўри совға қилинди.

Шунингдек, туманимиз ёшларининг санъат ва маданият соҳалариги қизиқишларини қўллаб-қувватлаш, уларга ўзларининг ижодкорлик қобилиятларини намоён этишларига кенг имконият яратиш мақсадида овуллардаги маданият марказлари ҳамда мактабларга 20 дона қашқар рубоби, 59 дона доира, 4 та овоз кучайтиргич, 1 дона синтезатор туман ҳокимлиги томонидан совға сифатида берилди.

Қайд этиш жоизки, бугун туманимизда спорт соҳаси тобора ривожланаётган бўлиб, туманимиз спортчилари турли мусобақаларда юқори марраларни эгалламоқдалар. Ана шундай 25 нафар ёш чемпионларимизга байрам муносабати билан велосипедлар совға қилинди.

Туманда “Ёшлар дафтари”га киритилган ёрдамга муҳтож, банд бўлмаган ёшлар ҳар томонлама қўллаб-қувватланиб, уларга моддий ва маънавий кўмак берилмоқда ҳамда уларни иш билан таъминлаш ва “Ёшлар дафтари”дан чиқишлариги амалий ёрдам бериш каби қатор чоралар кўрилмоқда.

Ёшлар куни муносабати билан тумандаги “Ёшлар дафтари”га киритилган 2 нафар юртдошларимизга компьютер ҳамда 5 нафарига сув насослари совға қилинди ҳамда уларнинг тадбиркорлик билан шуғулланиб, ўзини ўзи банд қилишларига амалий ёрдам кўрсатилди.

Амударё тумани Хотира майдонида ўтказилган ушбу тадбирда шунингдек, турли спорт мусобақаларининг ғолиблари ҳам муносиб рағбатлантирилди. Эртамиз эгалари ўзларига кўрсатилаётган бу каби эътибор ҳамда рағбатдан жуда хурсанд бўлдилар.

Туманимиздаги “Ёшлар куни” байрам тадбирлари Истироҳат боғида давом эттирилди. Ёшлар байрамини муносиб нишонлаш мақсадида Истироҳат боғида гала концерт дастури ташкил қилинди.

Айтиш керакки, 2021 йилнинг мамлакатимизда "Ёшларни қўллаб-қувватлаш ва аҳоли саломатлигини мустаҳкамлаш йили” деб номаланиши ҳамда ижтимоий ҳимояга муҳтож, турмуш шароити оғир, ишсиз ва касб-ҳунарга эга бўлмаган ёшларни давлат томонидан қўллаб-қувватлаш мақсадида жорий этилган “Ёшлар дафтари” ҳам ёшларга кенг имкониятлар эшигини очиб берди.

Туманимиз ёшлари ҳам бу каби имкониятлардан самарали фойдаланиб келмоқдалар. Жумладан, ёшлар билан ишлашнинг янгича тизимини жорий этиш бўйича “Ёшлар дастури” доирасида 1 258 нафар ёшлар доимий ва жамоат ишларига жойлаштирилди, 666 нафар ёшлар тадбиркорликка ва касб-ҳунарга ўқитилиб тижорат банклари томонидан 296 нафарига 8 млрд 512 млн сўм имтиёзли кредит маблағлари ажратилди.

Қишлоқ хўжалиги соҳасида ёшларнинг бандлигини таъминлаш мақсадида 4 408 нафар ёшларга 1 378 гектар, ғалладан бўшаган ер майдонларидан такрорий экин экиш учун 404 нафар ёшларга 80,8 гектар ер майдони ажратиб берилди.

“Ёшлар дафтари” жамғармаси хисобидан “Ёшлар дафтари”га киритилган 40 нафар юртдошимизга тадбиркорлик фаолиятини бошлаш ва ўзини ўзи банд қилишга зарур бўлган 113,3 млн сўмлик асбоб-усуналар ва меҳнат қуроллари олиб берилди, моддий аҳволи оғир бўлган 20 нафар ёшларга жами 19,6 млн сўм моддий ёрдам берилди.

Бу каби юксак эътибор ва рағбат, албатта, ёшларимизни ҳам илм-фан, касб-ҳунар сирларини пухта эгаллаб, Ватанимизга муносиб фарзанд бўлиб етишишга руҳлантирмоқда.

Сўнгги йилларда туманимиздан фанлар олимпиадаларининг мамлакат босқичи ғолиблари, турли спорт ўйинларининг Ўзбекистон, Осиё ва жаҳон миқёсидаги босқичларининг ғолиб ва совриндорлари етишиб чиқаётгани барчамизга қувонч бағишлайди.

Ана шундай илғор ва ташаббускор ёшлар иштирокида ўтган концерт дастури иштирокчиларга унутилмас онларни бахшида этди.

Ўзбекистонда хизмат кўрсатган артист, бетакрор овоз соҳиби, опера хонандаси Женисбек Пиязов концерт дастурининг меҳмони бўлди.

Женисбек Пиязов туманимиз ёшларини “Ёшлар куни” байрами билан қизғин муборакбод этди ҳамда бир-бирда шўх куй-қўшиқлар ижро этди. Ёшларимиз Женисбек Пиязов ижроларини катта қизиқиш ҳамда ўзгача завқ билан тинглаб, томоша қилдилар.

Концерт дастурида туман маданият маркази хонандалари ўзларининг ижод намуналари билан ажойиб чиқишлар қилдилар. Жумладан, Икромжон Сийтимов, Комилжон Болтабоев, Рашидбек Раҳимов, Давлатёр Шомурадов каби Маданият бўлими хонандалари ижро этган куй-қўшиқлар барчага кўтаринки кайфият улашди.

Ёшлар концерт дастурида янграган куй-қўшиқларга рақсга тушиб, байрамни муносиб нишонладилар.

Фурсатдан фойдаланиб биз ҳам юртимиз ёшларини яна бир бор “Ёшлар куни” байрами билан чин дилдан муборакбод этамиз.

Барча ёшларимизга комил инсонлар бўлиб вояга етиб, ота-онанси, жамиятимиз ҳамда юртимизга ҳалол ва фидойи хизмат қилиш, Ватанимиз тараққиёти ва халқимиз фаровонлигини таъминлашдек шарафли ишга ҳисса бахти насиб қилсин!

Байрамингиз муборак бўлсин, қадрли ёшлар!

Амударё тумани ҳокимлигининг Ахборот хизмати.