Tumanimizda parrandachilik va asalarichilik tarmoqlari tobora rivojlanmoqda

Mamlakatimizda parrandachilik sohasini rivojlantirish va eksportga moʻljallangan tayyor mahsulotlar ishlab chiqarish hajmini oshirish va turlarini kengaytirish, shuningdek, aholini mahalliy ishlab chiqarilgan sifatli va arzon parrandachilik mahsulotlari bilan taʼminlash boʻyicha izchil chora-tadbirlar amalga oshirilmoqda. Xususan, Oʻzbekiston Respublikasi Prezidenti tomonidan imzolangan “Parrandachilikni yanada rivojlantirish boʻyicha qoʻshimcha chora-tadbirlar toʻgʻrisida”gi qarori ushbu soha rivoji uchun muhim dasturulamal boʻlib xizmat qilmoqda.

Amudaryo tumanida parrandachilik sohasi taraqqiyoti, bu borada qabul qilinayotgan qonun hujjatlari ijrosini taʼminlash yuzasidan keng qamrovli ishlar qilinmoqda. Tumandagi Bogʻ mahallasida joylashgan “Oʻrta qalʼa chorvadori” agrofirmasining bugungi kundagi faoliyati fikrimizning yaqqol dalilidir.

Agrofirma rahbari Erkin Rasulov boshchilgidagi mehnatsevar ishchilar tumanda parrandachilikni yanada rivojlantirishga oʻzlarining hissalarini qoʻshib kelmoqdalar. “Oʻrta qalʼa chorvadori” agrafirmasi 2019-yilda 150 ming bosh parrandaga moʻljallangan parrandachilik xoʻjaligini tashkil etish loyihasini ilgari surdi. Ushbu loyiha agrofirmaning 3 mlrd. soʻm oʻz mablagʻi hisobidan 2020-yil mart oyida ishga tushirildi. Parrandachilk xoʻjaligini tashkil etish loyihasining amalga oshirilishi orqali 30 ta yangi ish oʻrinlari yaratildi. Loyihani qoʻllab-quvvatlash maqsadida tuman hokimligi tomonidan Besh tom mahallasi hududidan yer maydoni ajratilishida amaliy yordam koʻrsatildi. Bugungi kunda parrandachilik kompleksida “broyler” zotli goʻshtga ixtisoslashtirilgan parranda boqilmoqda. Shuningdek, korxona faoliyatini kengaytirish maqsadida qiymati 400 mln.soʻm boʻlgan goʻsht saqlash uchun muzlatkichli sigʻimlar tashkil qilish loyihasi amalga oshirilmoqda.

Aytish kerakki, Oʻzbekiston Respublikasi Prezidenti tomonidan imzolangan “Parrandachilikni yanada rivojlantirish boʻyicha qoʻshimcha chora-tadbirlar toʻgʻrisida”gi qarorida parrandachilikni sohasini yanda rivojlantirish boʻyicha qator ustuvor vazifalar belgilangan. Xususan, raqobatbardosh parranda mahsulotlari ishlab chiqarish orqali aholini yetarli miqdorda parranda mahsulotlari bilan barqaror va maqbul narxlarda taʼminlash, eksport salohiyatini oshirish, ilgʻor xorijiy davlatlar tajribasidan foydalangan holda parrandachilik klasterlarini tashkil qilish, bunda innovatsion texnologiyalarni keng tatbiq etish, sohaga faol investitsiya jalb etish orqali parranda mahsulotlarini, shu jumladan, parranda chiqindilarini chuqur qayta ishlash, yuqori qoʻshilgan qiymatli parranda mahsulotlarini ishlab chiqarish shular jumlasidandir. Ushbu vazifalarni amalga oshirishda barcha imkoniyat hamda sharoitlar yaratilgan.

Shuningdek, mamlakatimizda qishloq xoʻjaligi sohalaridan asalarichilikni rivojlantirishga ham keng eʼtibor qaratib kelinmoqda. Asalarichilik tarmogʻini boshqarish tizimini tubdan takomillashtirish, tarmoqda naslchilik ishlarini ilmiy asosda tashkil etish, asalarichilik xoʻjaliklari faoliyati samaradorligini oshirish, asal mahsulotlarini ishlab chiqarish hajmi va turlarini yanada koʻpaytirish, asalni qayta ishlash boʻyicha zamonaviy texnologiyalarni joriy etish, sohaning eksport salohiyatini oshirish, shuningdek, asalarichilik sohasidagi ilgʻor tajribalarni respublikamizning barcha hududlarida tatbiq etish borasida izchil ishlar olib borilmoqda.

Tadbirkor Erkin Rasulov asalarichilik sohasida ham katta tajribaga ega. “Erkin Rasulov asalchi” fermer xoʻjaligi bugun asalarichilik tarmogʻini rivojlantirishda eng koʻzga koʻringan xoʻjaliklardan biriga aylanmoqda. Mazkur fermer xoʻjaligi 2014-yilda tashkil etilgan boʻlib, korxona rahbari Erkin Rasulov asalarichilik sohasini puxta egallagan tadbirkor hisoblanadi. U asalarichilik faoliyati bilan 40-yildan uzoqroq shugʻullanib keladi hamda sohada koʻp yillik tajribaga ega.

Aytish kerakki, 2019-yilda “Oʻrta qalʼa chorvadori” agrofirmasi tomonidan jami 2,4 mlrd.soʻm, shundan 1,2 mlrd.soʻm kredit mablagʻlari hisobidan asalarichilikni rivojlantirish loyihasi amalga oshirildi. Ushbu mablagʻlar 200 ta asalari oilalari xarid qilishga yoʻnaltirildi hamda loyiha amalga oshishi orqali yangidan 10 ta doimiy ish oʻrinlari yaratildi.

Qolaversa, 2021-yilda “Erkin Rasulov asalchi” fermer xoʻjaligining 1,5 mlrd.soʻm mablagʻlari hisobiga kasanachilik usulida asalarichilikni rivojlantirish loyihasi amalga oshirilib, 118 ta kasanachilar ishga qabul qilindi. Mazkur loyihalarni amalga oshirish hamda fermer xoʻjaligi jamoasining samarali mehnati natijasida 2019-yilda 15 tonna, 2020-yilda 33 tonna, 2021-yil I mavsumida 12,5 tonna asal yetishtirishga erishildi.

Shuningdek, xoʻjalik ogʻir pandemiya sharoitida ijtimoiy himoyaga muhtoj aholini qoʻllab-quvvatlashga ham oʻz hissasini qoʻshdi. Xususan, xoʻjalik tomonidan pandemiya davrida extiyojland oilalarga jami 30 mln.soʻmlik xomiylik yordamlari koʻrsatildi.

Kelajakda xoʻjalik tomonidan asalni qadoqlash, zarur asbob-uskuna va boshqa anjomlarni ishlab chiqarish rejalashtirilmoqda.

Charos Arslonova, tuman hokimligining Axborot xizmati rahbari.