Туманимизда паррандачилик ва асаларичилик тармоқлари тобора ривожланмоқда

Мамлакатимизда паррандачилик соҳасини ривожлантириш ва экспортга мўлжалланган тайёр маҳсулотлар ишлаб чиқариш ҳажмини ошириш ва турларини кенгайтириш, шунингдек, аҳолини маҳаллий ишлаб чиқарилган сифатли ва арзон паррандачилик маҳсулотлари билан таъминлаш бўйича изчил чора-тадбирлар амалга оширилмоқда. Хусусан, Ўзбекистон Республикаси Президенти томонидан имзоланган “Паррандачиликни янада ривожлантириш бўйича қўшимча чора-тадбирлар тўғрисида”ги қарори ушбу соҳа ривожи учун муҳим дастуруламал бўлиб хизмат қилмоқда.

Амударё туманида паррандачилик соҳаси тараққиёти, бу борада қабул қилинаётган қонун ҳужжатлари ижросини таъминлаш юзасидан кенг қамровли ишлар қилинмоқда. Тумандаги Боғ маҳалласида жойлашган “Ўрта қалъа чорвадори” агрофирмасининг бугунги кундаги фаолияти фикримизнинг яққол далилидир.

Агрофирма раҳбари Эркин Расулов бошчилгидаги меҳнатсевар ишчилар туманда паррандачиликни янада ривожлантиришга ўзларининг ҳиссаларини қўшиб келмоқдалар. “Ўрта қалъа чорвадори” аграфирмаси 2019 йилда 150 минг бош паррандага мўлжалланган паррандачилик хўжалигини ташкил этиш лойиҳасини илгари сурди. Ушбу лойиҳа агрофирманинг 3 млрд. сўм ўз маблағи ҳисобидан 2020 йил март ойида ишга туширилди. Паррандачилк хўжалигини ташкил этиш лойиҳасининг амалга оширилиши орқали 30 та янги иш ўринлари яратилди. Лойиҳани қўллаб-қувватлаш мақсадида туман ҳокимлиги томонидан Беш том маҳалласи ҳудудидан ер майдони ажратилишида амалий ёрдам кўрсатилди. Бугунги кунда паррандачилик комплексида “бройлер” зотли гўштга ихтисослаштирилган парранда боқилмоқда. Шунингдек, корхона фаолиятини кенгайтириш мақсадида қиймати 400 млн.сўм бўлган гўшт сақлаш учун музлаткичли сиғимлар ташкил қилиш лойиҳаси амалга оширилмоқда.

Айтиш керакки, Ўзбекистон Республикаси Президенти томонидан имзоланган “Паррандачиликни янада ривожлантириш бўйича қўшимча чора-тадбирлар тўғрисида”ги қарорида паррандачиликни соҳасини янда ривожлантириш бўйича қатор устувор вазифалар белгиланган. Хусусан, рақобатбардош парранда маҳсулотлари ишлаб чиқариш орқали аҳолини етарли миқдорда парранда маҳсулотлари билан барқарор ва мақбул нархларда таъминлаш, экспорт салоҳиятини ошириш, илғор хорижий давлатлар тажрибасидан фойдаланган ҳолда паррандачилик кластерларини ташкил қилиш, бунда инновацион технологияларни кенг татбиқ этиш, соҳага фаол инвестиция жалб этиш орқали парранда маҳсулотларини, шу жумладан, парранда чиқиндиларини чуқур қайта ишлаш, юқори қўшилган қийматли парранда маҳсулотларини ишлаб чиқариш шулар жумласидандир. Ушбу вазифаларни амалга оширишда барча имконият ҳамда шароитлар яратилган.

Шунингдек, мамлакатимизда қишлоқ хўжалиги соҳаларидан асаларичиликни ривожлантиришга ҳам кенг эътибор қаратиб келинмоқда. Асаларичилик тармоғини бошқариш тизимини тубдан такомиллаштириш, тармоқда наслчилик ишларини илмий асосда ташкил этиш, асаларичилик хўжаликлари фаолияти самарадорлигини ошириш, асал маҳсулотларини ишлаб чиқариш ҳажми ва турларини янада кўпайтириш, асални қайта ишлаш бўйича замонавий технологияларни жорий этиш, соҳанинг экспорт салоҳиятини ошириш, шунингдек, асаларичилик соҳасидаги илғор тажрибаларни республикамизнинг барча ҳудудларида татбиқ этиш борасида изчил ишлар олиб борилмоқда.

Тадбиркор Эркин Расулов асаларичилик соҳасида ҳам катта тажрибага эга. “Эркин Расулов асалчи” фермер хўжалиги бугун асаларичилик тармоғини ривожлантиришда энг кўзга кўринган хўжаликлардан бирига айланмоқда. Мазкур фермер хўжалиги 2014 йилда ташкил этилган бўлиб, корхона раҳбари Эркин Расулов асаларичилик соҳасини пухта эгаллаган тадбиркор ҳисобланади. У асаларичилик фаолияти билан 40 йилдан узоқроқ шуғулланиб келади ҳамда соҳада кўп йиллик тажрибага эга.

Айтиш керакки, 2019 йилда “Ўрта қалъа чорвадори” агрофирмаси томонидан жами 2,4 млрд.сўм, шундан 1,2 млрд.сўм кредит маблағлари ҳисобидан асаларичиликни ривожлантириш лойиҳаси амалга оширилди. Ушбу маблағлар 200 та асалари оилалари харид қилишга йўналтирилди ҳамда лойиҳа амалга ошиши орқали янгидан 10 та доимий иш ўринлари яратилди.

Қолаверса, 2021 йилда “Эркин Расулов асалчи” фермер хўжалигининг 1,5 млрд.сўм маблағлари ҳисобига касаначилик усулида асаларичиликни ривожлантириш лойиҳаси амалга оширилиб, 118 та касаначилар ишга қабул қилинди. Мазкур лойиҳаларни амалга ошириш ҳамда фермер хўжалиги жамоасининг самарали меҳнати натижасида 2019 йилда 15 тонна, 2020 йилда 33 тонна, 2021 йил I мавсумида 12,5 тонна асал етиштиришга эришилди.

Шунингдек, хўжалик оғир пандемия шароитида ижтимоий ҳимояга муҳтож аҳолини қўллаб-қувватлашга ҳам ўз ҳиссасини қўшди. Хусусан, хўжалик томонидан пандемия даврида эхтиёжланд оилаларга жами 30 млн.сўмлик хомийлик ёрдамлари кўрсатилди.

Келажакда хўжалик томонидан асални қадоқлаш, зарур асбоб-ускуна ва бошқа анжомларни ишлаб чиқариш режалаштирилмоқда.

Чарос Арслонова, туман ҳокимлигининг Ахборот хизмати раҳбари.