Ичимлик суви ва оқова сув тармоқларидаги ҳолат қатъий назоратда

Сув – ҳаёт манбаи. Унинг беқиёс қадри ва ижтимоий аҳамияти айниқса, экологик вазият ўзига хос бўлган Оролбўйи минтақасида янада яққолроқ намоён бўлади. Шу боисдан ҳам, аҳолини тоза ичимлик суви билан узлуксиз таъминлаш, оқова сув тармоқларининг сифатли ва барқарор ишлашини назорат қилиш бугунги куннинг энг долзарб вазифаларидан саналади.

Қорақалпоғистон Республикаси қурилиш ва уй-жой коммунал хўжалиги соҳасида назорат қилиш инспекцияси томонидан ичимлик суви ҳамда оқова сув соҳасида хизматлар кўрсатиш сифатини ошириш, тизимдаги мавжуд муаммоларни бартараф этиш бўйича кенг кўламли, мақсадли ишлар амалга оширилмоқда.

Инспекция ҳамда Ўзбекистон маҳаллалар уюшмаси ўртасида тасдиқланган махсус меморандумга асосан, жорий йилнинг биринчи ярми давомида республика бўйлаб жами 119 та овул ва маҳаллаларда ўрганишлар ва мониторинг тадбирлари ўтказилди. Ушбу ўрганиш ишлари давомида 17 та маҳалла ҳудудида ичимлик суви таъминоти ҳамда оқова сув хизматларини кўрсатишда турли хил камчиликлар ва муаммолар борлиги аниқланди. Ҳолат юзасидан зудлик билан тегишли амалий чоралар кўрилиб, “Қорақалпоқ сув таъминоти” акциядорлик жамиятига мазкур камчиликларни тезкорлик билан бартараф қилиш бўйича қатъий кўрсатмалар берилди. Натижада аниқланган тизимли муаммоларнинг қарийб барчаси шу жойнинг ўзида ижобий ҳал этилишига эришилди.

Бу каби назорат ва аҳоли билан ишлаш тадбирлари шу кунларда ҳам изчил давом эттирилмоқда. Хусусан, Инспекция мутахассислари Амударё туманида ҳам хизмат сафарида бўлиб, Манғит шаҳрида жойлашган Гулзор ва Фаровон маҳалла фуқаролар йиғинлари биноларида аҳоли ва масъуллар иштирокида учрашув ўтказдилар.

Тадбир давомида маҳаллалар маъмуриятига биринчи галда аҳолини тоза ичимлик суви билан таъминлаш сифати устида қатъий жамоатчилик назоратини ўрнатиш кераклиги батафсил тушунтирилди. Шунингдек, амалдаги қонунчилик нормаларига сўзсиз риоя қилиш, сувни исроф қилмасдан, тежамкорлик билан фойдаланиш, сув ва канализация тармоқларига ўзбошимчалик билан уланиш ҳолатларининг олдини олиш, энг асосийси, кўрсатилган коммунал хизматлар учун тўловларнинг ўз вақтида амалга оширишни таъминлаш борасида ҳамкорликда иш олиб бориш зарурлиги алоҳида таъкидлаб ўтилди. Шу билан бирга, аҳолининг ҳуқуқий ва экологик маданиятини ошириш мақсадида кенг қамровли тарғибот ишларини янада кучайтириш лозимлиги қайд этилди.

Мулоқотлар давомида яна бир муҳим масалага алоҳида эътибор қаратилди. Ичимлик ҳамда оқова сув иншоотлари ва тармоқларда юзага келиши мумкин бўлган турли авариялар бўйича таъминотчиларни зудлик билан огоҳлантириш, шунингдек, режали ўчиришлар ва техник таъмирлаш ишлари олиб бориладиган вақтларда истеъмолчиларни олдиндан хабардор қилишнинг муҳим аҳамияти ҳақида маҳаллалар масъулларига тегишли маълумотлар берилди. Зеро, аҳолининг олдиндан огоҳлантирилиши турли тушунмовчиликларнинг олдини олади ва уларга ўз вақтида зарур сув захирасини шакллантириб олиш имконини беради.

Айтиш жоизки, жорий йил бошидан буён инспекция томонидан Қорақалпоғистон Республикаси бўйича жами 17 та авария ҳолати аниқланган бўлиб, шундан ичимлик сув тармоқларида 16 та ва оқова сув тармоқларида 1 та ҳолат қайд этилган. Бундай нохуш вазиятларни зудлик билан бартараф этишга қаратилган аниқ кўрсатмалар киритилиб, белгиланган тартибда ва ўз вақтида таъмирлаш, тиклаш ҳамда бартараф этиш чоралари кўрилган.

Сув таъминоти тизимининг узлуксиз ишлашини таъминлаш нафақат соҳа ходимлари, балки барчамизнинг доимий эътиборимизда бўлиши лозим бўлган умуммиллий масаладир. Истеъмолчиларга сифатли хизмат кўрсатилиши ва сувдан оқилона, тежамкорлик билан фойдаланилиши эса юртимиз фаровонлиги ҳамда экологик барқарорликнинг кафолатидир.